A ebꞌ sbꞌitan jun acꞌ bꞌit
14
Ix lajvi chiꞌ ix vilani,
a jun Calnel sbꞌi,
lin̈anecꞌ dꞌa sjolom lum tzalan Sion.
Ayecꞌ pax 144 mil ebꞌ anima yedꞌoc.
Axo dꞌa snan̈al sat junjun ebꞌ,
tzꞌibꞌabꞌiloch sbꞌi jun Calnel sbꞌi chiꞌ yedꞌ sbꞌi Smam.
2 Axo ix vabꞌani,
scꞌan̈ juntzan̈ tas dꞌa satchaan̈.
N̈ilili scꞌan̈ icha scꞌan̈ aꞌ nivac pajav.
An̈ejaꞌ n̈ilili scꞌan̈xi cꞌu.
A jun chiꞌ,
ichato man̈ jantacoc anima van sonan yedꞌ juntzan̈ arpa.
3 Ay ebꞌ sbꞌitan jun acꞌ bꞌit dꞌa yichan̈ bꞌaj cꞌojanem Dios yedꞌ dꞌa yichan̈ ebꞌ chan̈van̈ querubín yedꞌ pax dꞌa yichan̈ ebꞌ 24 ichamtac vinac.
Malaj junoc mach syal scꞌaybꞌan jun bꞌit chiꞌ.
An̈ej ebꞌ 144 mil colchajnaquel dꞌa scal ebꞌ anima dꞌa yolyibꞌan̈qꞌuinal,
an̈ej ebꞌ syal sbꞌitani.
4 A ebꞌ chiꞌ,
maj saylaj yix ebꞌ.
Malaj bꞌaj ix och schucal ebꞌ.
Tzacꞌann̈ej och ebꞌ yuj jun Calnel sbꞌi chiꞌ dꞌa bꞌajtac tzꞌeqꞌui.
Ix colchajel ebꞌ dꞌa scal ebꞌ anima.
Yuj chiꞌ,
lajan ebꞌ icha junoc bꞌabꞌel sat aval in̈at tzꞌacꞌji dꞌa Dios yedꞌ dꞌa jun Calnel sbꞌi chiꞌ.
5 Malaj juneloc ix yesej ebꞌ.
Malaj junoc schucal ebꞌ ix ilchaji.
A tas ol yal oxvan̈ ebꞌ ángel
6 Ix lajvi chiꞌ,
ix vilan junxo ángel jen̈en̈i yecꞌ dꞌa nan̈al satchaan̈.
A jun vachꞌ abꞌix ay dꞌa juneln̈ej,
a yedꞌnac yuj yalanel dꞌa scal ebꞌ anima dꞌa junjun nación,
dꞌa junjun chon̈abꞌ dꞌa yolyibꞌan̈qꞌuinal,
vachꞌchom chꞌocchꞌoc stiꞌ ebꞌ.
7 Te chaan̈ ix yal dꞌa ebꞌ icha tic:
—Xivan̈ec dꞌa Dios.
Alec vachꞌ lolonel dꞌay,
yujto toxo ix ja stiempoal yic ol ex schꞌolbꞌitej.
Aqꞌuec em e bꞌa dꞌay,
yujto a bꞌojinac satchaan̈,
sat luum,
aꞌ mar yedꞌ juntzan̈ sjaj a aꞌ,
xchi.
8 Ay pax junxo ángel tzacꞌan sja yuuj.
Ix yalan icha tic:
—Toxo ix acꞌji ganar jun chon̈abꞌ Babilonia.
Nivan ton val yelcꞌochi,
palta ix can dꞌa yalan̈.
A jun chiꞌ ix acꞌan juvoquel masanil nación yuj smontan ebꞌ anima yic syacꞌanem sbꞌa ebꞌ dꞌa juntzan̈ comon dios malaj bꞌaj scꞌanabꞌajaxi,
yuj chiꞌ ichato ix em dꞌa ajmulal.
Ichato ix laj och junjun nación ucꞌuman̈il yuuj,
xchi.
9 Ix lajvi chiꞌ,
ay pax junxo yoxil ángel tzacꞌan yuuj.
Te chaan̈ ix yalaꞌ:
—A ebꞌ ix laj yaqꞌuem sbꞌa dꞌa jun Nocꞌ sbꞌi yedꞌ dꞌa yechel,
aton ebꞌ ix laj schaoch yechel dꞌa snan̈al sat,
ma dꞌa scꞌabꞌ,
10 yovalil ol ja jun nivan yaelal dꞌa yibꞌan̈ ebꞌ yuj Dios.
Icha junoc vino ov,
malaj jabꞌoc a aꞌ aybꞌat dꞌa scal,
icha val chiꞌ jun yoval scꞌool Dios ol javoc chiꞌ dꞌa yibꞌan̈ ebꞌ.
Te ov sicꞌlabꞌil.
Ol yabꞌ val syail ebꞌ dꞌa scal cꞌacꞌ yedꞌ azufre dꞌa yichan̈ ebꞌ yángel Dios yedꞌ dꞌa yichan̈ jun Calnel sbꞌi chiꞌ.
11 A jun bꞌaj ol yabꞌ syail ebꞌ chiꞌ,
ol qꞌue stabꞌil dꞌa juneln̈ej,
cꞌual dꞌacꞌval,
man̈xa bꞌaqꞌuin̈ ol yicꞌ yip ebꞌ.
A ebꞌ ayecꞌ taꞌ,
aton ebꞌ slaj yaqꞌuem sbꞌa dꞌa jun Nocꞌ sbꞌi yedꞌ dꞌa yechel,
ebꞌ ix laj schaoch jun yechel sbꞌi dꞌay,
xchi jun ángel chiꞌ.
12 Yuj chiꞌ,
a ex yic exxo Dios,
a ex tze cꞌanabꞌajej tas syal schecnabꞌil,
tecꞌan val tzeyutej e bꞌa dꞌa scal syaelal.
Tecꞌan tzeyutej eyacꞌanoch e cꞌool dꞌa Jesús.
13 Ix lajvi chiꞌ ix vabꞌani,
ix och jun av dꞌa satchaan̈.
Ix yalan dꞌayin:
—Tzꞌibꞌej junxo ol val tic:
A ticnaic,
te vachꞌ yic mach ayoch dꞌa yol scꞌabꞌ Cajal ayic ol chamoc.
Yel,
icha tic ix yal Yespíritu Dios,
yujto ol yicꞌ yip ebꞌ dꞌa smunlajel.
A jun icha uum bꞌaj tzꞌibꞌabꞌil tastac vachꞌil ix scꞌulej ebꞌ,
ol cꞌoch yedꞌ ebꞌ dꞌa satchaan̈ chiꞌ,
xchi jun av chiꞌ.
Sicꞌnabꞌilel ebꞌ anima
14 Ix vilanxi,
ay jun asun sacsac.
Ay jun lajan val yilji icha anima cꞌojanem dꞌa yibꞌan̈ jun asun chiꞌ.
Ayqꞌue jun corona oro dꞌa sjolom,
yedꞌnacpaxqꞌue jun jochlabꞌ trigo te jay ye.
15 Axo dꞌa yol stemplo Dios ix elta junxo ángel.
Chaan̈ ix yal dꞌa jun cꞌojanem dꞌa yibꞌan̈ jun asun chiꞌ icha tic:
—Acꞌlabꞌej a jochlabꞌ chiꞌ yic tza molbꞌan ebꞌ anima to vachꞌxo yaji,
yujto stiempoalxo smolchajqꞌue vaan ebꞌ,
xchi dꞌay.
16 Elan̈chamel ix yacꞌoch jun sjochlabꞌ jun cꞌojanem dꞌa yibꞌan̈ jun asun chiꞌ.
Ix laj sicꞌancanqꞌue vaan ebꞌ anima icha yaj ixim trigo.
17 Ix lajvi chiꞌ,
ix elta junxo ángel dꞌa yol stemplo Dios ay dꞌa satchaan̈.
Yedꞌnacpax junxo sjochlabꞌ trigo,
jay ye.
18 Ix elta pax junxo ángel bꞌaj ayoch jun altar.
Aton jun chiꞌ ay yopisio yacꞌan mandar jun cꞌacꞌ.
Te chaan̈ ix yal dꞌa junxo ángel yambꞌil jun sjochlabꞌ chiꞌ yuuj:
—Acꞌoch a jochlabꞌ jay ye chiꞌ,
yujto a juntzan̈ uva dꞌa yolyibꞌan̈qꞌuinal,
te stiempoxo,
xchi.
19 Yuj chiꞌ,
ix sjochoch sjochlabꞌ jun ángel chiꞌ dꞌa yolyibꞌan̈qꞌuinal.
Ix yicꞌanqꞌue vaan juntzan̈ uva chiꞌ smasanil.
Ix yacꞌanem dꞌa yol jun nivan tecꞌlabꞌel sat uva.
A jun chiꞌ,
syalelcꞌochi,
aton yoval scꞌool Dios ol cot dꞌa yibꞌan̈ ebꞌ anima.
20 A jun tecꞌlabꞌel yal sat uva chiꞌ,
dꞌa stiel chon̈abꞌ ay.
Icha tzꞌaj stecꞌji sat uva sicꞌlabꞌil,
icha chiꞌ ix utaj ebꞌ anima chiꞌ.
Axo schiqꞌuil ebꞌ ix eli,
ix qꞌue spimal masanto dꞌa schaan̈il yalan̈ stiꞌ nocꞌ chej.
Axo snajatil ix el yoc schiqꞌuil ebꞌ chiꞌ,
72 legua.
Icha val junoc nivan n̈ajabꞌ ix ajqꞌuei.