A chavan̈ nivac nocꞌ
13
Ix vilani,
ix qꞌueta jun Nocꞌ sbꞌi dꞌa yol aꞌ mar.
Uqueꞌ sjolom,
lajun̈eꞌ schꞌaac.
Axo dꞌa junjun schꞌac chiꞌ,
ayqꞌue scorona.
Axo dꞌa juntzan̈ sjolom chiꞌ,
tzꞌibꞌabꞌiloch junjun bꞌi sbꞌuchvaj dꞌa Dios.
2 A jun Nocꞌ sbꞌi chiꞌ,
lajan yilji icha junoc nocꞌ tzꞌibꞌchoj.
Axo yoc,
lajan icha yoc nocꞌ oso.
Axo stiꞌ,
lajan icha stiꞌ nocꞌ choj.
Axo jun dragón chiꞌ ix yacꞌ spoder dꞌay.
Ix och yajalil yuuj.
Ix yacꞌ jantac sbꞌinajnaquil dꞌay.
3 Axo jun Nocꞌ sbꞌi chiꞌ,
ay jun sjolom lajvinac.
Ichato chamnac jun sjolom chiꞌ yuj yechen chiꞌ.
Palta ix bꞌoxi.
Yuj chiꞌ,
ix te sat val scꞌool ebꞌ anima dꞌa masanil yolyibꞌan̈qꞌuinal yuuj.
Ix yacꞌanoch sbꞌa ebꞌ yedꞌoc.
4 Ix yaqꞌuem sbꞌa ebꞌ dꞌa jun dragón chiꞌ,
yujto ix yacꞌbꞌat sbꞌinajnaquil dꞌa jun Nocꞌ sbꞌi chiꞌ.
Ix yacꞌanpaxem sbꞌa ebꞌ dꞌa jun Nocꞌ sbꞌi chiꞌ.
Ix laj yalan ebꞌ:
—¿Toc ay junocxo stzacꞌvan dꞌa jun Nocꞌ sbꞌi tic?
¿Tom ay junoc syal yacꞌan oval yedꞌoc?
xchi ebꞌ.
5 Ix chajipax lolon jun Nocꞌ sbꞌi chiꞌ,
yic syicꞌanchaan̈ sbꞌa,
sbꞌuchvaj pax dꞌa Dios.
42 ujal ix chaji yacꞌ yajalil.
6 Ix och ijan sbꞌuchvaj dꞌa Dios yedꞌ dꞌa scajnubꞌ.
Ix bꞌuchvajpax dꞌa jantac ebꞌ cajan dꞌa satchaan̈.
7 Ix chajipax yacꞌ oval yedꞌ ebꞌ yicxo Dios,
masanto ix can ebꞌ dꞌa yalan̈ yuuj.
Ix acꞌji yopisio yacꞌan mandar masanil anima dꞌa junjun chon̈abꞌ,
dꞌa junjun nación,
junjun in̈tilal yedꞌ dꞌa junjun tiꞌal,
ix acꞌji mandar ebꞌ yuuj.
8 Masanil ebꞌ ay dꞌa yolyibꞌan̈qꞌuinal ix yaqꞌuem sbꞌa dꞌa jun Nocꞌ sbꞌi chiꞌ,
aton ebꞌ man̈ tzꞌibꞌabꞌiloccan sbꞌi dꞌa jun libro yic qꞌuinal yictax manto bꞌo yolyibꞌan̈qꞌuinal.
A jun libro chiꞌ,
yic jun Calnel sbꞌi,
aton jun ix miljichamoc.
9 Masanil ebꞌ tzꞌabꞌani,
yacꞌocabꞌoch schiquin ebꞌ dꞌa juntzan̈ tic.
10 A mach yic yaj yicꞌjibꞌat preso,
ol icꞌjocbꞌatoc.
A mach yic yaj stecjicham dꞌa qꞌuen espada,
a dꞌa qꞌuen ol chamoc.
Yuj chiꞌ a on̈ yic on̈xo Dios,
tecꞌanocabꞌ scutej co bꞌa cabꞌan syail,
scacꞌanpaxoch Dios dꞌa co cꞌool.
11 Ix lajvi chiꞌ ix vilanxi,
ay junxo Schabꞌil Nocꞌ sbꞌi ix qꞌueta dꞌa yol luum.
A jun chiꞌ,
chabꞌ schꞌaac icha schꞌac nocꞌ calnel.
Palta lajan slolon icha slolon junoc dragón.
12 A jun bꞌabꞌel Nocꞌ sbꞌi chiꞌ ix acꞌan masanil sbꞌinajnaquil dꞌa jun schabꞌil Nocꞌ chiꞌ yic tzꞌacꞌji servil yuuj.
Ix yacꞌan pural masanil ebꞌ anima dꞌa yolyibꞌan̈qꞌuinal yic syacꞌanem sbꞌa ebꞌ dꞌa jun bꞌabꞌel Nocꞌ sbꞌi chiꞌ,
aton jun lajvinac jun sjolom,
palta bꞌonacxi.
13 Ay juntzan̈ milagro te nivan yelcꞌoch ix schꞌoxoꞌ.
Ato dꞌa satchan̈ ix yicꞌcot jun cꞌacꞌ ix emul dꞌa yolyibꞌan̈qꞌuinal yil ebꞌ anima.
14 Ix chaji schꞌox juntzan̈ milagro chiꞌ dꞌa yichan̈ jun bꞌabꞌel Nocꞌ sbꞌi chiꞌ.
Icha chiꞌ ix aj smusan sat ebꞌ anima ay dꞌa yolyibꞌan̈qꞌuinal.
Ix yalanxi dꞌa ebꞌ to yovalil sbꞌo junoc yechel ebꞌ dꞌa qꞌuen qꞌueen,
aton yechel jun bꞌabꞌel Nocꞌ sbꞌi chiꞌ,
aton jun lajvinac yuj qꞌuen espada,
palta an̈ejaꞌ pitzan.
15 Axo jun schabꞌil Nocꞌ sbꞌi chiꞌ,
ix chaji yacꞌoch spixan jun yechel chiꞌ.
Yuj chiꞌ ix och ijan slolonqꞌuei,
ix yalani to smiljicham masanil ebꞌ max yaqꞌuem sbꞌa dꞌay.
16 Ix yacꞌanpax pural masanil ebꞌ anima to schaoch junoc yechel ebꞌ dꞌa scꞌabꞌ dꞌa svachꞌ,
ma to dꞌa snan̈al sat.
Vachꞌchom unin,
ma icham anima,
vachꞌchom bꞌeyum,
ma mebꞌaꞌ,
vachꞌchom yic sbꞌa,
ma checabꞌ yaji,
ix laj och yechel junjun.
17 A jun yechel chiꞌ,
aton sbꞌi jun Nocꞌ sbꞌi chiꞌ,
ma jun snumeroal sbꞌi.
Axo ebꞌ malaj jun yechel chiꞌ dꞌay,
max chajilaj manvaj ebꞌ,
ma schon̈vaj ebꞌ.
18 Tato ayex jelan ex,
tato snachajel eyuuj,
ol yal e naaneli tas syalelcꞌoch jun snumeroal jun Nocꞌ sbꞌi chiꞌ.
Yujto a jun número chiꞌ schꞌoxan sbꞌi jun anima,
aton 666.