A jun ix ix yedꞌ jun dragón
12
Ix lajvi chiꞌ,
ix checlaj jun yechel dꞌa satchaan̈ te nivan yelcꞌochi.
Ay jun ix ix,
a cꞌu ayoch spichuloc ix,
axo qꞌuen uj ayoch scꞌan̈oc yoc ix,
aypaxqꞌue lajchaveꞌ qꞌuen cꞌanal scoronaoc ix.
2 Yabꞌix ix,
ayxocot syail yuneꞌ ix.
Ix el val yav ix,
yujto sgana ix scolchaji.
3 An̈ejtonaꞌ dꞌa jun rato chiꞌ,
ay junxo yechel ix checlaj dꞌa satchaan̈ chiꞌ.
Ay jun nivan dragón chacchac.
Uqueꞌ sjolom,
lajun̈eꞌ schꞌaac.
Axo dꞌa junjun sjolom chiꞌ,
ayqꞌue scorona.
4 Quenxon̈ej man̈ nan̈aloc qꞌuen cꞌanal ix sloccot yedꞌ sn̈e dꞌa satchaan̈ chiꞌ,
ix syumanem dꞌa sat luum.
Ix lajvi chiꞌ ix cꞌoch lin̈an dꞌa yichan̈ ix yabꞌix chiꞌ,
yic schibꞌat jun unin chiꞌ yalani,
ayic ol ajoc.
5 Axo ix alji jun yuneꞌ ix chiꞌ,
vinac unin.
Aton jun chiꞌ ol acꞌan mandar masanil nación,
ichato a jun qꞌuen cꞌococh ol schaꞌa.
Ato val yalji,
ix icꞌjibꞌat dꞌa Dios bꞌaj ay sdespacho.
6 Axo jun ix ix chiꞌ,
ix bꞌat ix elelal dꞌa tzꞌinan luum.
Ataꞌ ay jun lugar lista yaj yuj Dios.
Mil 260 cꞌual ix acꞌji va ix taꞌ.
7 Ix yamchajoch oval dꞌa satchaan̈.
Ay jun sat ángel scuch Miguel yedꞌ ebꞌ yetángelal,
ix yacꞌ oval ebꞌ yedꞌ jun dragón chiꞌ.
An̈ejaꞌ jun dragón chiꞌ yedꞌ ebꞌ yángel,
ix yacꞌpax oval yedꞌ ebꞌ.
8 Palta maj yacꞌlaj ganar jun dragón chiꞌ.
Yuj chiꞌ man̈xalaj slugar ebꞌ ix acꞌchaj dꞌa satchaan̈ chiꞌ.
9 Ichaton chiꞌ ix aj syumchajcanel jun nivan dragón chiꞌ,
aton jun yacꞌnacoch sbꞌa chanil dꞌa pecaꞌ,
aton vin̈ diablo,
vin̈ Satanás.
Aton vin̈ tzꞌacꞌan musansatil masanil anima ay dꞌa yolyibꞌan̈qꞌuinal.
A vin̈ chiꞌ,
ix yumjicanemta vin̈ dꞌa yolyibꞌan̈qꞌuinal yedꞌ ebꞌ yángel.
10 Ix lajvi chiꞌ,
ix vabꞌan yoch jun av dꞌa satchaan̈.
Te chaan̈ ix yalaꞌ:
A ticnaic ix checlajel jun colnabꞌil syacꞌ co Diosal.
Scheclaj spoder to Yajal yaji.
Ix checlajpaxi to a Cristo Acꞌbꞌil Yopisio yuuj,
a ix chꞌoxaneli to aꞌ scuchbꞌan masanil.
Yujto a vin̈ tzꞌacꞌanoch dꞌa yibꞌan̈ ebꞌ yicxo Dios,
ix yumjicanel vin̈.
A vin̈ chiꞌ,
dꞌa cꞌual dꞌacꞌval ix yacꞌ scꞌool co Diosal vin̈ dꞌa spatic ebꞌ.
11 A ebꞌ chiꞌ,
ix yacꞌ techaj ebꞌ,
yujto yujn̈ej ebꞌ chamnac jun Calnel sbꞌi elnac schiqꞌuil.
Ix yacꞌ val ganar ebꞌ,
yujto tecꞌan ix yutej val sbꞌa ebꞌ yacꞌan testigoal sbꞌa yuuj.
Man̈ jabꞌoc ix xiv ebꞌ schami,
yujto tecꞌtecꞌ ix yutej sbꞌa ebꞌ.
12 Yuj chiꞌ,
ayocabꞌ tzalajcꞌolal dꞌa satchaan̈ yedꞌ masanil ebꞌ ayecꞌ taꞌ.
Palta te chuc eyic a ex ayex ecꞌ dꞌa sat luum yedꞌ ex tzex bꞌeyecꞌ dꞌa sat aꞌ mar.
Yujto ix emcꞌoch vin̈ diablo bꞌaj ayex ecꞌ chiꞌ.
Te yoval vin̈,
yujto yojtac vin̈ to quenxon̈ej tiempo ayecꞌ vin̈.
13 Axo yic ix yilan vin̈ dragón chiꞌ to ix yumjicancot ebꞌ dꞌa yolyibꞌan̈qꞌuinal,
ix bꞌat yacꞌlej yacꞌanoch yaelal dꞌa yibꞌan̈ jun ix ix aj yuneꞌ chiꞌ.
14 Palta ix acꞌjioch scꞌaxil ix te nivac,
lajan yedꞌ scꞌaxil nocꞌ dꞌiv.
Yuj chiꞌ ix bꞌat jen̈en̈oc ix dꞌa slugar listaxo yaj dꞌa tzꞌinan luum,
yic max yamchaj ix yuj jun Chan sbꞌi chiꞌ.
Ataꞌ ix acꞌji va ix nan̈al schan̈il abꞌil.
15 Axo jun Chan sbꞌi ayoch dꞌa spatic ix chiꞌ,
ay val jun nivan aꞌ ix elta dꞌa yol stiꞌ,
sgana a jun aꞌ chiꞌ tzecꞌ leman ix.
16 Palta axo lum luum ix colvaj yedꞌ ix.
Ix jacvi jun nivan xabꞌ dꞌa luum.
Axo taꞌ ix satcanem jun nivan aꞌ chiꞌ.
17 Ichato chiꞌ bꞌian,
ix vachꞌcot yoval jun dragón chiꞌ dꞌa ix.
Yuj chiꞌ ix bꞌat yacꞌ oval yedꞌ juntzan̈xo ebꞌ yin̈tilal ix,
aton ebꞌ scꞌanabꞌajan tas syal schecnabꞌil Dios,
ebꞌ tecꞌan syutej yacꞌanoch spensar dꞌa slolonel Jesucristo.
18 Ix lajvi chiꞌ,
ix aj tecꞌtecꞌ jun dragón chiꞌ dꞌa yarenail stiꞌ aꞌ mar.