A chavaan̈ ebꞌ testigo
11
Ix acꞌji jun teꞌ aj dꞌayin,
icha junoc echlabꞌ.
Ix lajvi chiꞌ,
ix alji dꞌayin:
—Ixic,
ix echtej stemplo Dios yedꞌ jun altar.
Tza bꞌisan ebꞌ syal sbꞌa dꞌa Dios ayecꞌ dꞌa yool.
2 Axo yamaqꞌuil stiꞌ,
man̈ echtejlaj,
yujto a jun chiꞌ,
acꞌbꞌilxo dꞌa ebꞌ man̈ israeloc.
42 ujal ol stecꞌcanem schon̈abꞌ Dios ebꞌ.
3 A chavan̈ ebꞌ in testigo,
ol vacꞌ yopisio ebꞌ yalanel in lolonel dꞌa mil 260 cꞌual.
Ol yacꞌoch jun spichul ebꞌ ya svaꞌi,
yic chequel to cuscꞌolal yaj ebꞌ,
xchi.
4 A chavan̈ testigo chiꞌ,
aton chabꞌ snun teꞌ olivo albꞌilcan yuj vin̈aj Zacarías yedꞌ pax chabꞌ bꞌachnubꞌ candil ayecꞌ dꞌa yichan̈ Dios Yajalil yolyibꞌan̈qꞌuinal tic.
5 Tato ay mach sgana yixtan ebꞌ,
ol elta cꞌacꞌ dꞌa yol stiꞌ ebꞌ.
Axo ebꞌ schichonoch scꞌool dꞌa ebꞌ chiꞌ,
juneln̈ej ol tzꞌabꞌat ebꞌ yuuj.
Icha chiꞌ ol aj scham masanil ebꞌ sgana tzꞌixtan ebꞌ.
6 A ebꞌ testigo chiꞌ,
ay spoder ebꞌ smacanoch vaan n̈abꞌ,
yic maxtzac yacꞌaꞌ,
yacbꞌan tzꞌecꞌ ebꞌ yalel slolonel Dios.
Ay pax spoder ebꞌ yacꞌan meltzajoch a aꞌ chicꞌal.
Syal yacꞌanoch yaln̈ej tas yaelal ebꞌ dꞌa yolyibꞌan̈qꞌuinal tic,
ato syalaꞌ jayel sgana ebꞌ yacꞌanochi.
7 Palta ayic ol lajvoc yalanel slolonel Dios ebꞌ,
a jun Nocꞌ sbꞌi,
aton jun ol qꞌueul dꞌa yol jun xabꞌ olan,
aꞌ ol bꞌat jucnaj dꞌa ebꞌ,
ol yacꞌan oval yedꞌ ebꞌ.
Ol yal yuj jun Nocꞌ sbꞌi chiꞌ smilancham ebꞌ.
8 Axo snivanil ebꞌ chavan̈ chiꞌ ol can teljabꞌ dꞌa yol scalleal jun nivan chon̈abꞌ,
aton jun bꞌaj chamnac Cajal dꞌa teꞌ culus.
A jun chon̈abꞌ chiꞌ,
scuch Sodoma,
scuchan pax Egipto,
yic schꞌoxoꞌ tas yaji.
9 Nan̈al schan̈il cꞌual man̈xo jantacoc anima ol ilan snivanil ebꞌ,
tzijtum chon̈abꞌ,
tzijtum nación ol laj ilanoc.
Chꞌocchꞌoc tiꞌal syal junjun macan̈ ebꞌ anima chiꞌ.
Man̈ ol chajoclaj mucjoc snivanil ebꞌ chavan̈ chiꞌ yuj ebꞌ.
10 Ol laj qꞌuechaan̈ ebꞌ anima ay dꞌa yolyibꞌan̈qꞌuinal yujto ix cham ebꞌ.
Ol laj yacꞌpax silabꞌ ebꞌ dꞌa scal anima chiꞌ.
Ol te qꞌuechaan̈ ebꞌ yujto ix ste abꞌej syail ebꞌ yuj ebꞌ chavan̈ ix ecꞌ yalel Slolonel Dios chiꞌ.
11 Palta a val slajvi nan̈al schan̈il cꞌual ol acꞌjocxi pitzvoc ebꞌ yuj Dios,
ol qꞌuex lin̈an ebꞌ.
Ol te xiv jantac ebꞌ ol ilanoc.
12 Ol lajvoc chiꞌ ol och jun av dꞌa satchaan̈.
Te chaan̈ ol yal dꞌa ebꞌ chavan̈ chiꞌ:
—Qꞌuean̈eccot dꞌa satchan̈ tic,
xcham dꞌa ebꞌ.
Yuj chiꞌ ol bꞌat ebꞌ dꞌa scal jun asun dꞌa satchaan̈.
Axo ebꞌ ix chichonoch scꞌool chiꞌ dꞌa ebꞌ,
toxon̈ej ol och qꞌueljabꞌ ebꞌ.
13 Junanto rato chiꞌ ol ecꞌ jun quixcabꞌ.
Te ov ol yutej sbꞌa.
Dꞌa jun nivan chon̈abꞌ chiꞌ,
a bꞌaj ay lajlajun̈eoc pat,
jun ol lan̈chajoc.
Uqueꞌ pax mil anima ol cham yuuj.
Axo juntzan̈xo ebꞌ anima,
ol te xiv chaan̈ ebꞌ,
yuj chiꞌ ol yal ebꞌ to te nivan yelcꞌoch co Mam Dios aj satchaan̈.
14 Icha chiꞌ ol aj yecꞌbꞌat jun schabꞌil yaelal,
palta ayto val junxo ol ja dꞌa elan̈chamel.
A jun yuquil trompeta ix oqꞌui
15 Axo ix spuꞌan strompeta jun yuquil ángel,
ix och juntzan̈ av dꞌa satchaan̈.
Te chan̈ ix alji:
A ebꞌ yajal dꞌa yolyibꞌan̈qꞌuinal,
toxo ix can yopisio ebꞌ dꞌa yol scꞌabꞌ Dios Cajal yedꞌ dꞌa yol scꞌabꞌ Cristo,
aton jun acꞌbꞌil yopisio yuj Dios.
A ol acꞌan yajalil dꞌa masanil tiempo,
xchi ebꞌ.
16 Axo ebꞌ 24 ichamtac vinac,
cꞌojjabꞌem ebꞌ dꞌa junjun xila dꞌa yichan̈ Dios,
ix em cumjabꞌ ebꞌ,
ix yacꞌanem sbꞌa ebꞌ dꞌa Dios chiꞌ.
17 Ix yalan ebꞌ icha tic:
Ach Dios Cajalil,
masanil tas syal uuj.
Ay ach ecꞌ ticnaic,
ay achtaxon eqꞌui.
Scacꞌ yuj diosal dꞌayach ach Cajalil,
yujto ix a chꞌoxoꞌ to te nivan a poder ayic ix a chaanel yich acꞌan mandar dꞌa yolyibꞌan̈qꞌuinal.
18 A juntzan̈ nación,
ix laj cot yoval,
palta ix ja scꞌual acꞌan syaelal.
Ix ja pax stiempoal a chꞌolbꞌitan tas yaj ebꞌ chamnac.
Ol acꞌan spac dꞌa junjun ebꞌ tzach acꞌan servil,
aton ebꞌ tzꞌalanel a lolonel yedꞌ ebꞌ icxo yaji yedꞌ pax ebꞌ tzach cꞌanabꞌajani.
Vachꞌchom ebꞌ nivac yelcꞌochi,
ma ebꞌ malaj yelcꞌochi ol acꞌn̈ej spac dꞌa junjun ebꞌ.
An̈ejaꞌ,
ix ja pax stiempoal a satanel ebꞌ satanel lum luum,
xchi ebꞌ.
19 Ix lajvi chiꞌ,
ix jacvi stemplo Dios dꞌa satchaan̈.
Axo taꞌ ix checlaj scaxail strato Dios.
Ix laj ecꞌ copoljoc lebꞌlon,
ay juntzan̈ tas ix laj cꞌan̈i,
ix laj cꞌan̈ cꞌu,
ix ecꞌ pax jun quixcabꞌ,
ix ja pax qꞌuen nivac sacbꞌat.