Chꞌan̈ yuneꞌ uum yedꞌ jun ángel
10
Ix lajvi chiꞌ,
ix vilan junxo ángel dꞌa satchaan̈,
te nivan spoder.
Ix emta dꞌa yolyibꞌan̈qꞌuinal.
Moyanoch jun asun dꞌay,
ichato aꞌ ayoch spichuloc.
Axo dꞌa sjolom,
ayqꞌue jun chacpan.
Axo sat,
toxon̈ej sveei icha yoc cꞌu.
Axo yoc,
lajan icha yoc cꞌacꞌ sqꞌue n̈iln̈onoc.
2 Ay jun chꞌan̈ yuneꞌ uum dꞌa yol scꞌabꞌ,
jacan chꞌan̈.
Axo jun yoc dꞌa svachꞌ ix yaqꞌuem tecꞌtecꞌ dꞌa sat aꞌ mar.
Axo sqꞌuexan̈ ix yaqꞌuem tecꞌtecꞌ dꞌa sat luum.
3 Ix lajvi chiꞌ ix avaji.
Te chaan̈ ix avaj icha yel yav nocꞌ choj.
Ayic ix avaj chiꞌ,
uquel ix cꞌan̈ cꞌu ix loloni.
4 Ayic ix lajvi slolon jun cꞌu scꞌan̈ chiꞌ dꞌa yuquelal,
ijan ix in tzꞌibꞌej tas ix vabꞌ chiꞌ,
palta ay jun ix lolonemta dꞌayin dꞌa satchaan̈:
—Ichn̈ejocabꞌta scan tas ix yal jun cꞌu uquel ix cꞌan̈ chiꞌ.
Man̈ a tzꞌibꞌejcani,
xchi dꞌayin.
5 Axo jun ángel tecꞌteqꞌuem yoc dꞌa sat aꞌ mar yedꞌ dꞌa sat luum chiꞌ,
ix yicꞌchaan̈ svachꞌcꞌabꞌ.
6 Ayic ix loloni,
ix sloc sbꞌi Dios pitzan dꞌa juneln̈ej,
aton jun bꞌoannac satchaan̈ yedꞌ sat luum,
aꞌ mar yedꞌ masanil tas ay dꞌa junjun.
Ix yalan jun ángel chiꞌ:
7 —Man̈xo ol ecꞌlaj tiempo yelcꞌoch tas nabꞌilcan yuj Dios.
Ayic ol schaanel yich jun yuquil ángel spuꞌan strompeta,
axo yelcꞌoch tas nabꞌilcan yuj chiꞌ,
albꞌilxo yuuj dꞌa ebꞌ yacꞌumal servil,
aton ebꞌ schecabꞌ,
xchi jun ángel chiꞌ.
8 A jun jaj ix vabꞌ yoch dꞌa satchaan̈ chiꞌ,
ix lolonpax dꞌayin junelxo:
—Ixic.
Ix bꞌat cha jun chꞌan̈ yuneꞌ uum jacan,
aton jun chꞌan̈ ayecꞌ dꞌa yol scꞌabꞌ jun ángel tecꞌteqꞌuem yoc dꞌa sat aꞌ mar yedꞌ dꞌa sat luum,
xchi.
9 Yuj chiꞌ ix in bꞌat dꞌa jun ángel chiꞌ,
ix in cꞌananecꞌ jun chꞌan̈ uum chiꞌ dꞌay.
Axo ix yalan dꞌayin:
—Ina chꞌan̈ tic.
Cꞌuxbꞌat chꞌan̈.
Te chiꞌ ol aj yol a tiꞌ yuj chꞌan̈ icha nocꞌ yal chabꞌ,
axo yol a cꞌool,
te cꞌaꞌ ol aj yuj chꞌan̈,
xchi dꞌayin.
10 Ix lajvi chiꞌ,
ix in chaanecꞌ chꞌan̈ dꞌay.
Ix in cꞌuxan chꞌan̈.
Chiꞌ julinac yochcꞌoch chꞌan̈ dꞌa yol in tiꞌ icha yal chabꞌ,
palta axo yol in cꞌool te cꞌa ix aj yuj chꞌan̈.
11 Ix lajvi chiꞌ,
ix aljipax dꞌayin:
—Yovalil ol al junelxo tastac ol ja dꞌa yibꞌan̈ juntzan̈ anima,
dꞌa yibꞌan̈ juntzan̈ nación,
dꞌa yibꞌan̈ junjun macan̈ tiꞌal yedꞌ dꞌa yibꞌan̈ ebꞌ rey,
xchi dꞌayin.