9
Axo ix spuꞌan yic jun yoil ángel chiꞌ,
yedꞌn̈ej chiꞌ ix vilani,
ay jun cꞌanal ix cot dꞌa satchaan̈,
ix emul dꞌa sat luum tic.
Ix acꞌji sllaveal jun xabꞌ olan dꞌay.
2 Elan̈chamel ix sjac jun olan chiꞌ.
Axo taꞌ ix qꞌueul jun nivan tabꞌ icha stabꞌil junoc nivan horno.
Ix te qꞌuicꞌbꞌiel yoc cꞌu yuj jun tabꞌ chiꞌ.
3 Axo dꞌa scal jun tabꞌ chiꞌ,
ix elta nocꞌ cꞌulubꞌ.
A nocꞌ chiꞌ man̈xo bꞌischajbꞌenoc nocꞌ.
Ix laj pucaxbꞌat nocꞌ dꞌa yolyibꞌan̈qꞌuinal tic,
ix acꞌji spoder nocꞌ schivaj icha schivaj nocꞌ sinaan.
4 Ix alji dꞌa nocꞌ to max slajel-laj an̈cꞌultac nocꞌ ay dꞌa yolyibꞌan̈qꞌuinal tic.
Toxon malaj junoc te teꞌ syal syaman nocꞌ.
An̈ej val ebꞌ anima malaj sello Dios dꞌa snan̈al sat,
an̈ej ebꞌ ix chiji yuj nocꞌ.
5 Maj chajilaj smilcham anima chiꞌ nocꞌ,
palta oyeꞌ ujal ix acꞌji yic tzꞌacꞌjioch syaelal ebꞌ yuj nocꞌ.
A jun yaelal syacꞌ nocꞌ chiꞌ,
icha val syail schivaj nocꞌ sinaan.
6 A dꞌa jun tiempoal chiꞌ,
ol laj sayecꞌ ebꞌ anima tas tzꞌaj schami,
palta man̈ ol chaxlaj yuj ebꞌ,
vachꞌchom ol snibꞌej cham sbꞌa ebꞌ,
palta man̈ ol chamlaj ebꞌ.
7 A nocꞌ cꞌulubꞌ chiꞌ,
lajan yilji nocꞌ icha nocꞌ chej lista yaj sbꞌat dꞌa oval.
A dꞌa sjolom nocꞌ ayqꞌue jun icha corona oro.
Axo sat nocꞌ,
lajan yilji icha sat anima.
8 Axo xiil nocꞌ,
lajan icha xil sjolom ebꞌ ix ix.
Axo pax ye nocꞌ,
lajan icha ye nocꞌ choj.
9 Ay jun ayoch dꞌa snivanil nocꞌ,
lajan yilji icha sqꞌuen pichul ebꞌ soldado.
Axo scꞌan̈ scꞌaxil nocꞌ,
lajan icha scꞌan̈ tzijtumal carreta yedꞌ scꞌan̈ yoc tzijtumal chej sn̈eranbꞌat carreta sbꞌat yacꞌ oval.
10 Ay sjis nocꞌ dꞌa sn̈e icha sjis nocꞌ sinaan.
A sjis nocꞌ chiꞌ syacꞌlabꞌej yixtan ebꞌ anima dꞌa oyeꞌ ujal chiꞌ.
11 Axo dꞌa jun xabꞌ olan chiꞌ ix qꞌueta jun ángel.
Aton yajal nocꞌ.
A jun chiꞌ,
Abadón sbꞌi dꞌa tiꞌ hebreo.
Axo dꞌa tiꞌ griego,
Apolión sbꞌi.
Syalelcꞌochi,
Satumeli.
12 Ichaton chiꞌ ix aj yecꞌ jun bꞌabꞌel yaelal,
palta ayto val chabꞌxo ol javoc.
13 Axo ix spuꞌan yic jun svaquil ángel chiꞌ,
yedꞌn̈ej chiꞌ ix vabꞌan yoch jun av dꞌa scal snan̈al chan̈eꞌ qꞌuen schꞌaac jun altar nabꞌa oro ayecꞌ dꞌa yichan̈ Dios.
14 A dꞌa jun av chiꞌ ix alji dꞌa jun svaquil ángel chiꞌ:
—Tijel chan̈van̈ ángel tzecꞌbꞌil dꞌa stiꞌ aꞌ nivan Éufrates,
xchi dꞌay.
15 Yuj chiꞌ ix bꞌat stijel chan̈van̈ ángel chiꞌ,
yic sbꞌat ebꞌ milojcham anima.
Quenxon̈ej man̈ nan̈aloc anima ix cham yuj ebꞌ dꞌa sat luum tic.
Chequelxo yaj yorail,
scꞌual,
yujal yedꞌ yabꞌilal yic tzꞌoch ebꞌ dꞌa milojcham anima chiꞌ.
16 Axo ix vabꞌan sbꞌisul ebꞌ soldado ayqꞌue dꞌa yibꞌan̈ chej chiꞌ,
chabꞌ ciento millón sbꞌisul ebꞌ.
17 Icha dꞌa vayichal ix aj vilan nocꞌ schej ebꞌ.
A sjolom nocꞌ lajan yedꞌ sjolom nocꞌ choj.
Axo ebꞌ ayqꞌue dꞌa yibꞌan̈ chej chiꞌ,
ayoch qꞌueen smaculoc sn̈iꞌ scꞌool junjun ebꞌ,
chacchac icha yilji sqꞌue yoc teꞌ cꞌacꞌ,
yaax,
cꞌancꞌan yilji qꞌueen.
Axo dꞌa yol stiꞌ nocꞌ chej chiꞌ,
ix elta cꞌacꞌ,
tabꞌ yedꞌ azufre.
18 Axo ebꞌ anima ay dꞌa yolyibꞌan̈qꞌuinal tic,
quenxon̈ej man̈ nan̈aloc ebꞌ ix cham yuj oxeꞌ yaelal ix elta dꞌa yol stiꞌ nocꞌ chiꞌ,
aton cꞌacꞌ,
tabꞌ yedꞌ azufre.
19 Yujto a juntzan̈ nocꞌ chiꞌ,
ay spoder nocꞌ yixtan anima dꞌa stiꞌ yedꞌ dꞌa sn̈e.
A sn̈e nocꞌ chiꞌ lajan yedꞌ nocꞌ chan,
ay sjolom,
yuj chiꞌ yedꞌoc syixtej anima chiꞌ nocꞌ.
20 Palta axo ebꞌ anima maj cham yuj juntzan̈ yaelal chiꞌ,
man̈ jabꞌoc ix sna sbꞌa ebꞌ,
an̈ejaꞌ yacꞌanem sbꞌa ebꞌ dꞌa tas bꞌobꞌil yuuj.
Maj yactej ebꞌ yacꞌanem sbꞌa dꞌa ebꞌ enemigo.
Maj yactej ebꞌ yacꞌanpaxem sbꞌa dꞌa juntzan̈ comon dios,
aton juntzan̈ bꞌobꞌil dꞌa qꞌuen oro,
dꞌa qꞌuen plata,
dꞌa qꞌuen bronce,
dꞌa qꞌuen qꞌueen yedꞌ pax dꞌa te teꞌ.
A juntzan̈ chiꞌ,
max yil-laj,
max yabꞌlaj,
max bꞌeylaj.
21 A dꞌa scal ebꞌ anima chiꞌ,
ay ebꞌ macꞌumcham anima,
ay ebꞌ ajbꞌaal,
ay ebꞌ ajmul,
ay pax ebꞌ elcꞌum.
Palta max snalaj jabꞌoc sbꞌa ebꞌ yuj smul chiꞌ.