A jun yuquil spixul
8
Ayic ix sn̈icꞌanel jun yuquil spixul chꞌan̈ uum jun Calnel sbꞌi chiꞌ,
ay am nan̈aloc hora ix tzꞌincꞌaj masanil tas dꞌa satchaan̈.
2 Axo ix vilani,
lin̈anecꞌ ucvan̈ ángel dꞌa yichan̈ Dios.
Ix acꞌji strompeta junjun ebꞌ.
3 Ix lajvi chiꞌ,
ix ja junxo ángel yedꞌnac jun schaynubꞌ yic incienso nabꞌa oro.
Ix och lin̈an dꞌa yichan̈ jun altar nabꞌa oro,
ajun slesal ebꞌ yicxo Dios yedꞌoc.
Nivan jun sucꞌuqꞌui sjabꞌ ix acꞌji dꞌay yic sn̈usantzꞌa dꞌa yibꞌan̈ jun altar ayecꞌ dꞌa yichan̈ Dios bꞌaj cꞌojanem chiꞌ.
Ayic ix bꞌat numumoc stabꞌil jun sucꞌuqꞌui sjabꞌ chiꞌ,
ix bꞌatpax slesal ebꞌ yicxo Dios chiꞌ yedꞌoc.
4 A dꞌa yol scꞌabꞌ jun ángel chiꞌ ix qꞌue numumoc stabꞌil jun sucꞌuqꞌui sjabꞌ chiꞌ yedꞌ slesal ebꞌ yicxo Dios dꞌa yichan̈.
5 Ix lajvi chiꞌ bꞌian,
ix yacꞌan bꞌudꞌjoc schaynubꞌ chiꞌ dꞌa teꞌ tzacꞌacꞌ ayqꞌue dꞌa yibꞌan̈ jun altar chiꞌ.
Ix spocꞌanem dꞌa sat luum.
Ix lajvi chiꞌ,
ix och ijan sn̈ilili scꞌan̈ cꞌu yedꞌ juntzan̈xo tas ix laj n̈ilili.
Ix laj ecꞌpax copoljoc lebꞌlon.
Ix ecꞌ pax jun quixcabꞌ.
Ix puji juntzan̈ qꞌuen trompeta
6 Axo ebꞌ ángel yucvan̈il,
ix yacꞌ lista sbꞌa junjun ebꞌ yic spuꞌan strompeta.
7 Axo ix spuꞌan yic jun bꞌabꞌel ángel chiꞌ,
yedꞌn̈ej chiꞌ ix secchajcot qꞌuen sacbꞌat yedꞌ cꞌacꞌ calan yaj yedꞌ chicꞌ dꞌa sat luum tic.
Yuj chiꞌ quen man̈ nan̈aloc ix tzꞌabꞌati.
An̈ejtonaꞌ te teꞌ smasanil,
quen man̈ nan̈aloc teꞌ ix laj tzꞌabꞌati.
Axo an̈ an̈ cꞌultac,
ix stzꞌabꞌat an̈ smasanil.
8 Axo ix spuꞌan yic jun schabꞌil ángel chiꞌ,
yedꞌn̈ej chiꞌ ix yumchajbꞌat jun icha nivan vitz ayoch scꞌacꞌal dꞌa yol aꞌ mar.
Yuj chiꞌ quen man̈ nan̈aloc aꞌ mar chiꞌ ix och chicꞌal.
9 Axo nocꞌ nocꞌ ay dꞌa yol aꞌ,
quen man̈ nan̈aloc nocꞌ ix chami.
Yedꞌ juntzan̈ barco,
quen man̈ nan̈aloc ix lajvieli.
10 Axo ix spuꞌan yic jun yoxil ángel chiꞌ,
yedꞌn̈ej chiꞌ ix emta jun nivan cꞌanal.
Ix qꞌue copnaj yoc icha cꞌacꞌ.
Jabꞌxon̈ej man̈ nan̈aloc aꞌ nivac aꞌ yedꞌ sjaj aꞌ bꞌajtil ix laj emi.
11 A jun cꞌanal chiꞌ,
scuch Ixaj.
A juntzan̈ a aꞌ bꞌaj ix laj em chiꞌ,
lajan ix aj aꞌ icha an̈ ixaj.
Tzijtum anima ix cham yuj aꞌ,
yujto te cꞌaꞌ ix aj aꞌ.
12 Axo ix spuꞌan yic jun schan̈il ángel chiꞌ,
yedꞌn̈ej chiꞌ quen man̈ nan̈aloc ix aj yixtax cꞌu,
qꞌuen uj yedꞌ qꞌuen cꞌanal.
Quen man̈ nan̈aloc ix aj sqꞌuicꞌbꞌieli.
Yuj chiꞌ junjun cꞌu,
junjun acꞌval,
quen man̈ nan̈aloc ix aj sqꞌuicꞌbꞌibꞌat qꞌuinal.
13 Ix lajvi chiꞌ,
ix vilani,
ay jun ángel tzꞌecꞌ jen̈en̈oc dꞌa nan̈al chaan̈.
Ix vabꞌani,
te chaan̈ ix avaji:
—Ay,
Ay,
Ay.
Obꞌiltac ebꞌ anima dꞌa yolyibꞌan̈qꞌuinal,
yujto ayic ol spuꞌan strompeta oxvan̈xo ebꞌ ángel,
oxeto nivac yaelal ol javoc,
xchi.