A ebꞌ israel ix och sello dꞌay
7
Ix lajvi chiꞌ,
ix vilani,
ay chan̈van̈ ángel lin̈jabꞌecꞌ dꞌa junjun yesquinail yolyibꞌan̈qꞌuinal tic.
Syamoch vaan chan̈eꞌ icꞌ ebꞌ tzꞌecꞌ dꞌa yolyibꞌan̈qꞌuinal tic.
Yuj chiꞌ man̈xalaj icꞌ ix ecꞌ dꞌa sat luum yedꞌ dꞌa yibꞌan̈ aꞌ mar.
Man̈xa val junoc te teꞌ ix ibꞌxi.
2 Ix vilani,
ix javi junxo ángel bꞌaj sjavi cꞌu.
Yedꞌnac jun sello yic Dios pitzan.
Te chaan̈ ix avaj dꞌa chan̈van̈ ebꞌ ángel chiꞌ.
Aton ebꞌ chan̈van̈ chiꞌ acꞌbꞌil spoder yixtan sat luum tic yedꞌ aꞌ mar.
Ix yalan dꞌa ebꞌ icha tic:
3 —Manto eyixtejbꞌat tastac ay dꞌa sat luum,
tastac ay dꞌa yol aꞌ mar yedꞌ te teꞌ,
masanto ol cacꞌoch sello dꞌa snan̈al sat ebꞌ tzꞌacꞌan servil co Diosal,
xchi dꞌa ebꞌ.
4 Axo ix vabꞌani,
a ebꞌ ix och sello chiꞌ dꞌay,
ay 144 mil sbꞌisul ebꞌ.
A ebꞌ chiꞌ,
vetisraelal ebꞌ.
Ayn̈ej ebꞌ dꞌa junjun macan̈ in̈tilal.
5-8 Ay 12 mil ebꞌ dꞌa junjun in̈tilal ix och sello dꞌay:
Aton ebꞌ yic Judá,
ebꞌ yic Rubén,
ebꞌ yic Gad,
ebꞌ yic Aser,
ebꞌ yic Neftalí,
ebꞌ yic Manasés,
ebꞌ yic Simeón,
ebꞌ yic Leví,
ebꞌ yic Isacar,
ebꞌ yic Zabulón,
ebꞌ yic José yedꞌ ebꞌ yic Benjamín.
Ebꞌ anima sacsac spichul
9 Ix lajvi chiꞌ ix vilani,
man̈xo jantacoc anima ayecꞌ dꞌa yichan̈ Dios bꞌaj cꞌojanemi yedꞌ dꞌa yichan̈ jun Calnel sbꞌi.
A ebꞌ chiꞌ,
cotnac ebꞌ dꞌa junjun nación,
dꞌa junjun in̈tilal,
dꞌa junjun chon̈abꞌ yedꞌ dꞌa junjun tiꞌal.
Man̈xo jantacoc sbꞌisul ebꞌ.
Te sacn̈ej spichul junjun ebꞌ.
Yedꞌnacqꞌue xil yapacꞌ junjun ebꞌ.
10 Ix laj yalan ebꞌ smasanil icha tic:
A co colnabꞌil,
scot dꞌa co Diosal cꞌojanem dꞌa scꞌojnubꞌ yedꞌ dꞌa jun Calnel sbꞌi chiꞌ,
xchi ebꞌ.
11 Axo ebꞌ ángel smasanil,
lin̈jabꞌecꞌ ebꞌ.
Oyanpaxoch ebꞌ dꞌa jun cꞌojnubꞌ chiꞌ yedꞌ ebꞌ ichamtac vinac yedꞌ pax chan̈van̈ ebꞌ querubín.
Ix em cumnaj ebꞌ dꞌa sat luum dꞌa yichan̈ Dios bꞌaj cꞌojanem chiꞌ,
ix yacꞌanem sbꞌa ebꞌ dꞌay.
12 Ix yalan ebꞌ icha tic:
Ujocabꞌi.
Alchajocabꞌ vachꞌ lolonel dꞌa Dios dꞌa masanil qꞌuinal.
Alchajocabꞌi to a Dios te ay stziquiquial,
te jelan paxi.
Smojton val tzꞌacꞌji yuj diosal dꞌay.
Te nivan yelcꞌochi,
te bꞌinajnac,
te ay pax spoder.
Ujocabꞌi,
xchi ebꞌ.
13 Ix lajvi chiꞌ ay jun icham vinac ix alan dꞌayin:
—¿Mach ebꞌ sacsac spichul tic tza naꞌa?
¿Bꞌajtil cotnac ebꞌ tza naꞌa?
xchi dꞌayin.
14 —Mamin,
a ach ojtac.
Xal in tic,
man̈ vojtacoc,
xin chi dꞌay.
Yuj chiꞌ ix yalanxi dꞌayin:
—Aton ebꞌ tic ecꞌnac val dꞌa jun nivan yaelal.
Ix icꞌjiel smul ebꞌ yuj schiqꞌuil jun Calnel sbꞌi.
Ichato ix jucꞌji spichul ebꞌ,
te sac ix ajcan yuj schiqꞌuil chiꞌ.
15 Yuj chiꞌ ayecꞌ ebꞌ dꞌa yichan̈ Dios dꞌa scajnubꞌ.
Dꞌa cꞌual dꞌacꞌval syacꞌ servil ebꞌ taꞌ.
Axo jun cꞌojanem dꞌa scꞌojnubꞌ chiꞌ,
a tzꞌilan ebꞌ yujto ayn̈ejecꞌ yedꞌ ebꞌ.
16 Man̈xo ol yacꞌlaj vejel,
ma taquin̈tial ebꞌ.
Man̈xo ol tzꞌa ebꞌ yuj yoc cꞌu.
Man̈xa cꞌacꞌ ol yabꞌ ebꞌ.
17 Yujto a jun Calnel sbꞌi ayecꞌ dꞌa snan̈al jun despacho,
aꞌ stan̈van ebꞌ icha junoc tan̈vum calnel.
Aꞌ tzꞌicꞌanbꞌat ebꞌ dꞌa jun a aꞌ yic qꞌuinal dꞌa juneln̈ej.
Axo Dios ol sucanel yal sat ebꞌ smasanil,
xchi dꞌayin.