—Cotan̈,

xchi.

2 Axo ix vilani,

ay jun nocꞌ sacsac chej.

Ay jun ayqꞌue dꞌa yibꞌan̈ nocꞌ,

ay jun jul-labꞌ yedꞌnac.

Ix acꞌjipax jun scorona.

Ix lajvi chiꞌ ix bꞌat yacꞌan oval yic syacꞌan ganar.

3 Ayic ix sdꞌin̈chitan schabꞌil spixul chiꞌ,

ix vabꞌan yalan jun schabꞌil querubín:

—Cotan̈,

xchi.

4 Axo ix vilani,

ix elta junxo nocꞌ chacchac chej.

Ay jun ayqꞌue dꞌa yibꞌan̈ nocꞌ,

ix acꞌji jun qꞌuen nivan machit dꞌay,

ix och yopisio yicꞌanel juncꞌolal dꞌa masanil yolyibꞌan̈qꞌuinal tic,

yic slaj smil-lancham sbꞌa ebꞌ anima.

5 Ayic ix sdꞌin̈chitanel jun yoxil spixul chiꞌ,

ix vabꞌan yalan junxo yoxil querubín:

—Cotan̈,

xchi.

Axo ix vilani,

ayecꞌ junxo nocꞌ qꞌuiqꞌuicꞌ chej.

Ay jun ayqꞌue dꞌa yibꞌan̈ nocꞌ yedꞌqꞌue jun libra.

6 Ix vabꞌan yoch sjaj jun dꞌa snan̈al ebꞌ querubín chiꞌ schan̈van̈il,

ix yalan icha tic:

—Chabꞌn̈ej libra ixim trigo dꞌa jun denario,

vaquen̈ej pax libra ixim cebada dꞌa jun denario.

Man̈ eyixtej aceite yedꞌ vino,

xchi.

7 Ayic ix sdꞌin̈chitanel jun schan̈il spixul chiꞌ,

ix vabꞌan yalan junxo schan̈il querubín:

—Cotan̈,

xchi.

8 Axo ix vilani ayecꞌ junxo nocꞌ cꞌancꞌan chej.

A jun ayqꞌue dꞌa yibꞌan̈ nocꞌ,

Chamel sbꞌi.

Axo jun lugar bꞌaj ayecꞌ spixan ebꞌ chamnac,

tzacꞌanoch yuuj.

A jun Chamel sbꞌi chiꞌ,

ix acꞌji spoder smilancham junjun anima dꞌa scal chan̈tacvan̈ ebꞌ anima dꞌa yolyibꞌan̈qꞌuinal tic.

Ay ebꞌ ol miljoccham dꞌa oval,

ay ebꞌ ol cham yuj vejel,

ay ebꞌ ol cham yuj yabꞌil,

ay ebꞌ ol cham yuj juntzan̈ nocꞌ chium nocꞌ.

9 Ayic ix sdꞌin̈chitanel jun yoil spixul chiꞌ,

ix vilan spixan ebꞌ milbꞌilcham yuj slolonel Dios,

yujto yacꞌnac testigoal sbꞌa ebꞌ yuuj.

A dꞌa yalan̈ jun altar ayecꞌ ebꞌ.

10 A ebꞌ chiꞌ te chaan̈ ix yal ebꞌ icha tic:

—Ach Cajal,

vachꞌ achn̈ej toni.

Yelton val tzalaꞌ.

¿Bꞌaqꞌuin̈ val ol a chꞌolbꞌitej tas yaj ebꞌ ay dꞌa yolyibꞌan̈qꞌuinal yic tzacꞌanecꞌ co pac dꞌa ebꞌ yujto smilnac on̈ cham ebꞌ?

xchi ebꞌ.

11 Ichato chiꞌ bꞌian,

ix acꞌji junjun spichul ebꞌ sacsac.

Ix alji dꞌa ebꞌ to syicꞌ jabꞌocxo yip ebꞌ,

masanto ol tzꞌacvoc sbꞌisul ebꞌ yetcreyenteal ebꞌ,

aton ebꞌ dꞌin̈an smiljicham icha ebꞌ chiꞌ,

aton ebꞌ tzꞌacꞌan servil Cristo icha ebꞌ chiꞌ.

12 Ix vilani,

ayic ix sdꞌin̈chitanel jun svaquil spixul chiꞌ,

ix vabꞌani,

ix ecꞌ jun nivan quixcabꞌ.

Axo cꞌu,

ix qꞌuicꞌbꞌiel icha nocꞌ lopil.

Axo qꞌuen uj chac ix aj qꞌueen icha chicꞌ.

13 Axo qꞌuen cꞌanal,

ix laj emta ran̈aljoc qꞌueen dꞌa yolyibꞌan̈qꞌuinal tic.

Icha tzꞌaj yemta sat teꞌ higo vanxo slajvieqꞌui a tzꞌibꞌxi teꞌ yuj icꞌ,

icha chiꞌ ix aj yemta qꞌueen.

14 Icha tzꞌaj schulji junoc uum,

icha chiꞌ ix aj satjiel satchaan̈.

Axo masanil lum vitz yedꞌ juntzan̈ lum luum ay dꞌa snan̈al a aꞌ,

ix laj icꞌjiel lum dꞌa yedꞌtal.

15 Axo ebꞌ rey dꞌa yolyibꞌan̈qꞌuinal tic,

ix laj scꞌubꞌejel sbꞌa ebꞌ dꞌa yoltac qꞌuen nivac n̈aqꞌueen yedꞌ dꞌa caltac qꞌueen dꞌa tzalquixtac.

Icha pax chiꞌ ix yutej sbꞌa masanil ebꞌ nivac vinac,

ebꞌ bꞌeyum,

ebꞌ yajal yedꞌ ebꞌ ay yelcꞌochi.

Vachꞌchom ebꞌ checabꞌ yaji,

vachꞌchom pax ebꞌ yic sbꞌa,

ix laj bꞌat ebꞌ smasanil elelal.

16 Ix laj yalan ebꞌ icha tic:

—Comonoc scot lum nivac vitz tic yedꞌ qꞌuen nivac tenam tic dꞌa quibꞌan̈ tzon̈ scꞌubꞌanel dꞌa jun cꞌojanem dꞌa scꞌojnubꞌ,

tzon̈ scolan pax el dꞌa yoval scꞌol jun Calnel sbꞌi chiꞌ.

17 Yujto ix javi jun cꞌual te nivan yelcꞌochi yic syacꞌancot yoval scꞌol Dios dꞌa quibꞌan̈.

Malaj junoc mach ol techaj jun cꞌual chiꞌ yuuj,

xchi ebꞌ.