A jun Calnel sbꞌi yedꞌ pax jun uum
5
Ix vilaꞌ to a dꞌa svachꞌ cꞌabꞌ jun cꞌojanecꞌ dꞌa scꞌojnubꞌ,
ay jun chꞌan̈ uum chulbꞌil.
Tzꞌibꞌabꞌil dꞌa yool yedꞌ dꞌa spatic.
Ay uqueꞌ spixul* ayoch dꞌa spatictac,
yuj chiꞌ max yal-laj xuyjibꞌati.
2 Ix vilan pax jun ángel te ay spoder,
te chaan̈ ix scꞌanbꞌej:
—¿Mach val junoc smoj sdꞌin̈chitan juntzan̈ spixul chiꞌ yic xuyjibꞌat chꞌan̈ uum chiꞌ?
xchi.
3 Palta a dꞌa satchaan̈,
dꞌa sat luum yedꞌ pax dꞌa yalan̈ lum luum,
malaj junoc mach smoj xuyanbꞌati yedꞌ yavtan yol chꞌan̈.
4 Ix el val veqꞌuecꞌoc vav voqꞌui,
yujto malaj junoc mach smoj xuyan jun uum chiꞌ yic syavtan tas syalaꞌ.
5 Palta ay junoc ebꞌ ichamtac vinac ix alan dꞌayin:
—Man̈ ach ocꞌoc.
Dꞌa scal ebꞌ yin̈tilal vin̈aj Judá,
a jun Choj sbꞌi,
aton jun yin̈tilalcan vin̈aj rey David,
a acꞌjinac ganar.
A smoj sdꞌin̈chitan uqueꞌ spixul chiꞌ,
an̈ejaꞌ ol xuyanbꞌat chꞌan̈ uum chiꞌ,
xchi dꞌayin.
6 Axo dꞌa snan̈al jun despacho chiꞌ,
dꞌa scal chan̈van̈ querubín,
dꞌa scal ebꞌ ichamtac vinac,
ataꞌ ix vil jun Calnel sbꞌi.
Lin̈aneqꞌui,
chequel to milbꞌilxo chamoc.
Uqueꞌ schꞌaac,
uqueꞌ pax yol sat.
Axo yol sat chiꞌ,
aton Yespíritu Dios yucvan̈il checbꞌilbꞌat dꞌa masanil yolyibꞌan̈qꞌuinal tic schꞌoxoꞌ.
7 A jun Calnel sbꞌi chiꞌ,
aꞌ ix bꞌat chaanelta jun uum chiꞌ dꞌa svachꞌ cꞌabꞌ jun cꞌojanem dꞌa scꞌojnubꞌ chiꞌ.
8 Ix lajvi schaanelta jun uum chiꞌ,
axo ebꞌ querubín schan̈van̈il yedꞌ ebꞌ 24 ichamtac vinac,
ix em cuman ebꞌ dꞌa yichan̈ jun Calnel sbꞌi chiꞌ.
Ay yarpa junjun ebꞌ,
yedꞌnacpax junjun yucꞌabꞌ ebꞌ nabꞌa oro,
bꞌudꞌan dꞌa incienso.
A incienso chiꞌ,
a slesal ebꞌ yicxo Dios schꞌoxoꞌ.
9 Ix sbꞌitan jun acꞌ bꞌit ebꞌ icha tic:
A ach tic,
a moj tza chaecꞌ jun chꞌan̈ uum chiꞌ yic tza dꞌin̈chitanel spixul.
Yujto ach miljichamoc,
yuj chiꞌ ix a manel ebꞌ anima yedꞌ a chiqꞌuil yic tzꞌoch ebꞌ yicoc Dios.
Tzijtum ebꞌ dꞌa junjun in̈tilal,
dꞌa junjun tiꞌal,
dꞌa junjun chon̈abꞌ yedꞌ dꞌa junjun nación ix a mancaneli.
10 Yujto a ach ix acꞌoch jun chon̈abꞌil ebꞌ dꞌa sacerdoteal yic syacꞌan servil co Diosal ebꞌ.
Ol yacꞌ yajalil ebꞌ dꞌa yolyibꞌan̈qꞌuinal tic,
xchi ebꞌ.
11 Ix lajvi chiꞌ,
ix vilani,
tzijtum ebꞌ ángel dꞌa spatic yichan̈ jun sdespacho chiꞌ yedꞌ ebꞌ querubín chiꞌ yedꞌ ebꞌ ichamtac vinac chiꞌ.
Ix vabꞌan yoch sjaj ebꞌ.
Man̈ jantacoc sbꞌisul ebꞌ,
man̈xo bꞌischajbꞌenoc.
12 Te chaan̈ ix yal ebꞌ:
A jun Calnel sbꞌi,
aton milbꞌilchamoc,
smoj scalaꞌ to ay spoder,
ay sbꞌeyumal,
ay sjelanil,
ay pax yip.
Te nivan yelcꞌochi,
te nivan svachꞌilal.
Smojton val calan vachꞌ lolonel dꞌay,
xchi ebꞌ.
13 Ix vabꞌ pax sjaj masanil tas bꞌobꞌil yuj Dios dꞌa satchaan̈,
dꞌa yolyibꞌan̈qꞌuinal tic,
dꞌa yalan̈ lum luum yedꞌ dꞌa yol aꞌ mar.
Masanil tas ay dꞌa juntzan̈ lugar chiꞌ ix laj yalaꞌ:
Calec vachꞌ lolonel dꞌa jun cꞌojanem dꞌa scꞌojnubꞌ yedꞌ dꞌa jun Calnel sbꞌi.
Calec dꞌa masanil tiempo to te nivan yelcꞌochi,
te nivan stziquiquial,
an̈ej Yajal yaji,
xchi ebꞌ.
14 Axo ebꞌ querubín schan̈van̈il ix alani:
—Ichaton chiꞌ,
xchi ebꞌ.
Axo ebꞌ 24 ichamtac vinac,
ix em cuman ebꞌ,
ix laj yacꞌanem sbꞌa ebꞌ dꞌay.