22
Ix lajvi chiꞌ,
axo jun ángel chiꞌ ix chꞌoxan jun nivan aꞌ te yaax dꞌayin.
Aton jun aꞌ tzꞌacꞌan qꞌuinal dꞌa juneln̈ej.
Yaxdꞌurinac aꞌ icha yilji cristal.
A dꞌa sdespacho Dios yedꞌ jun Calnel sbꞌi,
ataꞌ tzꞌelta aꞌ.
2 A dꞌa snan̈al scalleal jun chon̈abꞌ chiꞌ,
ataꞌ tzꞌel yoc aꞌ.
Axo dꞌa stitac aꞌ,
ay te teꞌ tzꞌacꞌan qꞌuinal dꞌa juneln̈ej.
A teꞌ chiꞌ,
lajchavel satan teꞌ dꞌa jun abꞌil.
Junjun ujal satan teꞌ.
Axo xil teꞌ,
a remeyo yaj dꞌa junjun nación.
3 Malaj junoc tas,
malaj pax junoc mach ayoch scatabꞌ Dios dꞌa yibꞌan̈ ol och taꞌ.
A dꞌa jun chon̈abꞌ chiꞌ,
ataꞌ ayecꞌ sdespacho Dios yedꞌ jun Calnel sbꞌi chiꞌ.
Axo masanil ebꞌ tzꞌacꞌan servil,
ol laj yal sbꞌa ebꞌ dꞌay.
4 Ol yil-lajoch sat ebꞌ yedꞌoc.
Ol laj och sbꞌi dꞌa snan̈al sat ebꞌ.
5 Ataꞌ,
man̈xalaj dꞌacꞌvalil.
Axo ebꞌ ol aj taꞌ,
man̈xalaj tzꞌoch junoc lámpara yuj ebꞌ.
Man̈xalaj tzꞌoch yoc cꞌu,
yujto a Dios Cajal ol acꞌan saquilqꞌuinal dꞌa ebꞌ.
Axo ebꞌ chiꞌ,
ol ochcan ebꞌ yajalil dꞌa juneln̈ej.
Toxo ol ja Jesucristo
6 Ix lajvi chiꞌ,
ix yalan jun ángel chiꞌ dꞌayin:
A juntzan̈ lolonel tic,
yel ton val.
Smojton val tzacꞌoch yipoc a cꞌool.
A Cajal,
aton Dios acꞌjinac lolon ebꞌ ix alanel slolonel.
Aton checjinaccot jun yángel,
ul yacꞌannac yojtaquejel ebꞌ tzꞌacꞌan servil,
tas juntzan̈ ol ja dꞌa elan̈chamel,
xchi.
7 Ix yalan Jesucristo:
Toxo val ol in javoc.
Te vachꞌ yic ebꞌ scꞌanabꞌajan tas tzꞌibꞌabꞌilcan dꞌa jun libro tic,
yujto a Dios ix acꞌan ojtacajeli tas syalaꞌ,
xchi.
8 A in Juan in tic ix vabꞌi,
ix vilan juntzan̈ tic.
Axo yic ix lajvi vabꞌani yedꞌ vilan juntzan̈ tic,
ix in em cuman valan in bꞌa dꞌa jun ángel ix acꞌan vojtaquejel chiꞌ.
9 Palta ix yalan dꞌayin:
Man̈ utoc a bꞌa icha tic,
yujto a in tic edꞌoc,
quetchecabꞌvumal co bꞌa yedꞌ pax ebꞌ yicxo Dios edꞌoc,
aton ebꞌ schecabꞌ yedꞌ jantacn̈ej ebꞌ scꞌanabꞌajan tas tzꞌibꞌyajcan dꞌa jun libro tic.
An̈ej dꞌa Dios tzaqꞌuem a bꞌa,
xchi.
10 Ix yalanxi:
Man̈ a cꞌubꞌejel juntzan̈ tas tzꞌibꞌabꞌilcan dꞌa jun libro yic Dios tic,
yujto toxo ol elcꞌoch tas syalaꞌ.
11 A ticnaic,
a ebꞌ an̈ejaꞌ scꞌulan chucal,
svachꞌ cꞌulejocabꞌ chucal chiꞌ ebꞌ.
Yedꞌ ebꞌ qꞌuixvubꞌtac scꞌulej,
svachꞌ cꞌulejocabꞌ ebꞌ.
Axo ebꞌ vachꞌ scꞌulej jun,
svachꞌ cꞌulejocabꞌ vachꞌil chiꞌ ebꞌ.
Yedꞌ ebꞌ ayoch spensar dꞌa Dios,
svachꞌ aqꞌuejocabꞌ och spensar ebꞌ dꞌay,
xchi jun ángel chiꞌ.
12 Ix yalan Jesucristo:
Abꞌec,
toxo ol in jaxoc.
Vedꞌnac spac yic junjun,
ato syalaꞌ tas ix scꞌulej,
xchi.
13 A in tic,
bꞌabꞌel vaj dꞌa smasanil,
slajvubꞌ in paxi.
Icha yaj chabꞌ letra A yedꞌ Zeta vaji.
A in bꞌabꞌel in dꞌa masanil tastac,
slajvubꞌ in paxi.
14 A ebꞌ tzꞌicꞌjiel smul,
ichato sjucꞌjiel spichul ebꞌ,
te vachꞌ yic ebꞌ,
yujto ay yalan yic ebꞌ sloan sat te teꞌ tzꞌacꞌan qꞌuinal dꞌa juneln̈ej.
Ol yal yoch ebꞌ dꞌa spuertail jun chon̈abꞌ chiꞌ.
15 Palta man̈ ol ochlaj ebꞌ scꞌulan chucal icha nocꞌ tzꞌiꞌ,
aton ebꞌ ajbꞌaal,
ebꞌ ajchum,
ebꞌ tzꞌem dꞌa ajmulal,
ebꞌ milumcham anima,
ebꞌ tzꞌem cuman dꞌa juntzan̈ comon dios yedꞌ jantacn̈ej ebꞌ ayoch spensar dꞌa juntzan̈ es,
syesejn̈ejpax ebꞌ.
Aton ebꞌ tic man̈ ol ochlaj.
16 A in Jesús in,
ix in checbꞌat jun vángel yal juntzan̈ tic dꞌayach,
yic vachꞌ ol laj aljoc dꞌa ebꞌ creyente dꞌa junjun iglesia.
A in tic,
yin̈til in can vin̈aj David.
Lajan in icha qꞌuen nitcꞌanal,
sveei,
xchi.
17 A Yespíritu Dios yedꞌ ebꞌ ol och yetbꞌeyumoc jun Calnel sbꞌi,
syal ebꞌ:
Cotan̈,
xchi ebꞌ.
A ebꞌ tzꞌabꞌan tas syal jun Uum tic,
yalocabꞌpax ebꞌ:
Cotan̈,
xchiocabꞌ ebꞌ.
A ebꞌ stacji stiꞌ,
tato sgana ebꞌ,
cotocabꞌ ebꞌ.
Yucꞌocabꞌ jun a aꞌ ebꞌ,
aton aꞌ tzꞌacꞌan qꞌuinal dꞌa juneln̈ej.
Aton jun aꞌ nabꞌan̈ej tzꞌacꞌji.
18 A exxo e masanil tzeyabꞌ tas syal jun Uum yic Dios tic,
ol valbꞌat junxo tic dꞌayex:
Tato ay mach tzꞌacꞌanoch xicul juntzan̈ tic,
a juntzan̈ yaelal tzꞌibꞌabꞌil dꞌay,
ol yacꞌoch Dios dꞌa yibꞌan̈.
19 Tato ay mach ol icꞌanel junoc tas tzꞌibꞌabꞌil dꞌa jun Uum yic Dios tic,
axo Dios chiꞌ ol icꞌanel sderecho dꞌa te teꞌ tzꞌacꞌan qꞌuinal dꞌa juneln̈ej yedꞌ dꞌa schon̈abꞌ,
aton juntzan̈ tic aycan yabꞌixal dꞌa jun Uum tic.
20 A jun ix alan juntzan̈ tic,
ix yalxi:
Val yel,
toxo ol in jaxoc,
xchi.
Ichocabꞌ taꞌ.
Cotan̈ ach Cajal Jesús.
21 Yacꞌocabꞌ svachꞌcꞌolal Cajal Jesucristo dꞌayex e masanil.
Amén.