A chꞌan̈ carta dꞌa ebꞌ creyente dꞌa Sardis
3
Ix yalanxi Jesús dꞌayin:
Tzꞌibꞌejbꞌat dꞌa in checabꞌ ayecꞌ dꞌa scal ebꞌ creyente dꞌa Sardis icha tic:
A jun ayoch ucvan̈ Yespíritu Dios dꞌay,
aypaxecꞌ uqueꞌ cꞌanal dꞌay,
a tzꞌalan dꞌayex:
Vojtac masanil tas tze cꞌulej.
A dꞌa sat ebꞌ eyetanimail pitzan ex val,
palta axo dꞌa in sat,
chamnac ex eli.
2 Yuj chiꞌ naec val e bꞌa.
Vachꞌchom ayto val jabꞌxo e vachꞌ bꞌeybꞌal svilaꞌ,
palta ijan val slajvieli.
Yuj chiꞌ tzeyacꞌ val eyip e cꞌulan juntzan̈ chiꞌ yic man̈ ol vachꞌ sateloc.
Svalbꞌat juntzan̈ tic dꞌayex yujto a juntzan̈ van e cꞌulani,
man̈ vachꞌoc dꞌa yichan̈ in Diosal.
3 Yuj chiꞌ naeccot juntzan̈ cꞌaybꞌubꞌal bꞌaj eyacꞌnac och e pensar dꞌa yalan̈taxo,
naecpax e bꞌa.
Aqꞌuecxi och e pensar dꞌay.
Macvajan̈ec,
tato maay,
ol in javoc dꞌayex icha junoc elcꞌum malaj mach ojtannac jantac hora scꞌochi.
4 Palta ay jayvan̈ ex dꞌa Sardis chiꞌ,
manto ex juviel-laj.
Icha junoc mach malaj bꞌaj smicax jabꞌoc spichul,
icha chiꞌ eyaji.
Yuj chiꞌ ol acꞌjoc och junjun e pichul te sac.
Ol ex bꞌeyecꞌ vedꞌoc,
yujto smoj icha chiꞌ tzex aji.
5 A ebꞌ ol acꞌan ganar,
ol acꞌjococh jun pichul te sac dꞌa ebꞌ.
Malaj bꞌaqꞌuin̈ ol in suc sat sbꞌi ebꞌ dꞌa jun libro yic qꞌuinal dꞌa juneln̈ej.
Ol valan dꞌa yichan̈ in Mam yedꞌ dꞌa yichan̈ ebꞌ yángel to vic ebꞌ.
6 Masanil mach tzꞌabꞌani,
yacꞌocabꞌ och schiquin dꞌa tas syal Espíritu dꞌa junjun iglesia,
xchi Jesús dꞌayin.
A chꞌan̈ carta dꞌa ebꞌ creyente dꞌa Filadelfia
7 Ix yalanxi Jesús dꞌayin:
Tzꞌibꞌejbꞌat dꞌa in checabꞌ ayecꞌ dꞌa scal ebꞌ creyente dꞌa chon̈abꞌ Filadelfia icha tic:
A jun te vachꞌn̈ej,
jun te yeln̈ej syalaꞌ,
jun edꞌjinac sllave vin̈aj rey David.
Ayic sjacani,
malaj mach syal smacanxi.
Ayic smacani,
malaj mach syal sjacanxi.
A tzꞌalan dꞌayex:
8 Vojtac masanil tas tze cꞌulej.
Ay jun puerta ix in jac dꞌa eyichan̈.
Malaj mach syal smacanxi.
Vachꞌchom quenn̈ej val e tecꞌanil,
palta tze cꞌanabꞌajej in lolonel.
Malaj bꞌaj ix eyalaꞌ to man̈ in eyojtacoc.
9 Yuj chiꞌ a ebꞌ tzꞌacꞌan servil vin̈ Satanás,
ebꞌ stzꞌac yaloch sbꞌa israelal,
ol vacꞌbꞌat ebꞌ dꞌayex,
ol em cuman ebꞌ dꞌa sat lum dꞌa eyichan̈.
Icha chiꞌ ol vutoc ebꞌ yic ol nachajel yuj ebꞌ to xajan ex vuuj.
10 Yujto tze cꞌanabꞌajej in checnabꞌil,
tecꞌan val tzeyutej e bꞌa dꞌa scal syaelal.
Yuj chiꞌ ol ex in tan̈vej dꞌa scal jun nivan yaelal ol javoc yic syacꞌan proval masanil anima dꞌa yolyibꞌan̈qꞌuinal tic.
11 Toxo ol in javoc,
yuj chiꞌ vachꞌ tzeyutej e bꞌeybꞌal ichataxon eyaji,
yic malaj mach ol yal yicꞌanecꞌ spac eyic junjun ex.
12 A ebꞌ ol acꞌan techajoc,
icha juntzan̈ yoyal stemplo in Diosal,
icha chiꞌ ol aj ebꞌ vuuj,
yujto malaj bꞌaqꞌuin̈ ol elta ebꞌ taꞌ.
Ol in tzꞌibꞌejoch sbꞌi in Diosal dꞌa ebꞌ yedꞌ sbꞌi schon̈abꞌ,
aton jun acꞌ Jerusalén ol emta dꞌa satchaan̈ bꞌaj ay in Diosal.
An̈ejtonaꞌ ol in tzꞌibꞌejpaxoch in bꞌi acꞌto dꞌa ebꞌ.
13 Masanil mach tzꞌabꞌani,
yacꞌocabꞌoch schiquin dꞌa tas syal Espíritu dꞌa junjun iglesia,
xchi Jesús dꞌayin.
A chꞌan̈ carta dꞌa ebꞌ creyente dꞌa Laodicea
14 Ix yalanxi Jesús dꞌayin:
Tzꞌibꞌejbꞌat dꞌa in checabꞌ ayecꞌ dꞌa scal ebꞌ creyente dꞌa chon̈abꞌ Laodicea icha tic:
A jun yeln̈ej syalaꞌ,
vachꞌn̈ej syutej sbꞌa yacꞌan testigoal,
aꞌ bꞌojinac masanil tas yedꞌ Dios,
aꞌ tzꞌalan dꞌayex:
15 Vojtac masanil tas tze cꞌulej.
Lajan ex icha junoc tas tzꞌucꞌji,
mantoc te siic,
mantoc te cꞌacꞌ.
Octom siic ex,
ma te cꞌacꞌ ex paxi.
16 Palta lajan ex icha junoc tas namqꞌuixin,
malaj vachꞌ yochi.
Yuj chiꞌ,
ichato ol ex in puchꞌejeli.
17 Yujto tzeyalaꞌ:
A on̈ tic bꞌeyum on̈,
vachꞌ on̈,
malaj jabꞌoc co paltail,
nivanoc xe chi.
Palta man̈ jabꞌoc snachajel eyuuj tato malaj jabꞌoc e vachꞌil,
malaj jabꞌoc eyelcꞌochi.
Icha yaj junoc mach malaj tas ay dꞌay,
max uji yilani,
bꞌeraneli,
icha chiꞌ eyaji.
18 Yuj chiꞌ sval dꞌayex,
bꞌoec val e bꞌeybꞌal.
Tato icha chiꞌ,
ichato ol e man jun oro bꞌobꞌil dꞌa scal cꞌacꞌ dꞌayin,
yic ol e cha e bꞌeyumal dꞌa val yel.
Ichato ol e man jun e pichul te sac dꞌayin,
yuj chiꞌ man̈xo ol ex qꞌuixvoclaj,
ina to bꞌeranexeli.
An̈ejtonaꞌ,
ichato ol e man yan̈al yol e sat dꞌayin,
yic ol yal eyilani.
19 Jantacn̈ej ebꞌ xajan vuuj,
tzin cachoch vaan ebꞌ,
svacꞌanpaxoch syaelal ebꞌ.
Yuj chiꞌ,
naec val e bꞌa,
tzeyacꞌpaxoch e pensar dꞌayin.
20 Abꞌec val,
ichato van vavajoch dꞌa tiꞌ pat.
Tato ay mach tzꞌabꞌan in jaj,
sjacan teꞌ dꞌayin,
ol in och yedꞌoc.
Ol in va yedꞌoc,
ol va pax vedꞌoc.
21 A ebꞌ ol acꞌan techajoc,
ol vaqꞌuem cꞌojan ebꞌ bꞌaj ay in despacho,
icha ix aj vem cꞌojan yedꞌ in Mam bꞌaj ay sdespacho,
yujto vacꞌnac techajoc.
22 Masanil mach tzꞌabꞌani,
yacꞌocabꞌoch schiquin dꞌa tas syal Espíritu dꞌa junjun iglesia,
xchi Jesús dꞌayin.