A chꞌan̈ carta dꞌa ebꞌ creyente dꞌa Éfeso
2
Ix yalan Jesús dꞌayin:
Tzꞌibꞌejbꞌat dꞌa in checabꞌ ayecꞌ dꞌa scal ebꞌ creyente dꞌa chon̈abꞌ Éfeso icha tic.
A jun yamjinacqꞌue uqueꞌ cꞌanal dꞌa svachꞌ cꞌabꞌ,
aton jun sbꞌeyecꞌ dꞌa scal uqueꞌ sbꞌachnubꞌ candil nabꞌa oro,
a tzꞌalan dꞌayex:
2 Vojtac masanil tas tze cꞌulej.
Vojtac to tzeyacꞌ val och dꞌa e cꞌol e munlaj dꞌa yic Dios,
te nivan pax tzeyutej e cꞌol eyacꞌan techajoc,
max e chapaxoch ebꞌ man̈ vachꞌoc dꞌa e cal.
Vojtac paxi to ix laj eyacꞌ proval ebꞌ syaloch sbꞌa in checabꞌoc.
Ix ilchajelta eyuuj to yes ebꞌ.
3 Vuujn̈ej te nivan yaelal sjavi dꞌa eyibꞌan̈,
palta tzeyacꞌ techajoc,
max eyacꞌpaxlaj chabꞌax e cꞌool.
4 Palta ay val syal janicꞌ in cꞌool dꞌayex,
yujto maxtzac in e xajanej icha dꞌa sbꞌabꞌelal.
5 Yuj chiꞌ naeccoti,
chajtil eyaji ayic manto chabꞌax e cꞌool.
Naec e bꞌa,
bꞌoecxi e bꞌa icha dꞌa yalan̈taxo.
Tato max e na e bꞌa,
elan̈chamel ol in javoc dꞌayex,
ol vicꞌanel sbꞌachnubꞌ e candil dꞌa yedꞌtal.
6 Palta ay jun vachꞌ tze cꞌulej svilaꞌ,
yujto a sbꞌeybꞌal ebꞌ nicolaíta tze chaqueli,
icha svutej in chacanpaxel a in tic.
7 Masanil mach tzꞌabꞌani,
yacꞌocabꞌoch schiquin dꞌa tas syal Espíritu dꞌa junjun iglesia.
A ebꞌ ol acꞌan techajoc,
ol vacꞌ sat jun te teꞌ yic qꞌuinal dꞌa juneln̈ej slo ebꞌ.
A jun te teꞌ chiꞌ,
a dꞌa svachꞌilal Dios ayecꞌ teꞌ,
xchi Jesús dꞌayin.
A chꞌan̈ carta dꞌa ebꞌ creyente dꞌa Esmirna
8 Ix yalanxi Jesús dꞌayin:
Tzꞌibꞌejbꞌat dꞌa in checabꞌ ayecꞌ dꞌa scal ebꞌ creyente dꞌa chon̈abꞌ Esmirna icha tic:
A jun mach bꞌabꞌel dꞌa yichan̈ smasanil,
slajvubꞌ paxi,
aton jun chamnac,
palta pitzvinacxi,
a tzꞌalan dꞌayex icha tic:
9 Vojtac jantac syaelal sjavi dꞌa eyibꞌan̈.
Te mebꞌaꞌ ex,
palta val yel te bꞌeyum ex.
Vojtac paxi chajtil tzꞌaj e bꞌuchji yuj ebꞌ syaloch sbꞌa israelal,
palta a smolanil ebꞌ chiꞌ yic vin̈ Satanás yaji.
10 Man̈ ex xiv yuj juntzan̈ yaelal ol javoc dꞌa eyibꞌan̈.
Yujto ayex ol ex acꞌjoc och dꞌa preso yuj vin̈ diablo yuj eyacꞌji proval.
Lajun̈eꞌ cꞌu ol ex och dꞌa syaelal.
Palta cꞌanabꞌajumn̈ej tzeyutej e bꞌa masanto dꞌa chamel.
Tato icha chiꞌ tzeyutej e bꞌa,
ol vacꞌ spac dꞌayex,
aton e qꞌuinal dꞌa juneln̈ej.
11 Masanil mach tzꞌabꞌani,
yacꞌocabꞌ och schiquin dꞌa tas syal Espíritu dꞌa junjun iglesia.
A ebꞌ ol acꞌan techajoc,
man̈xo ol yabꞌlaj syail ebꞌ dꞌa junxo schabꞌil chamel,
xchi Jesús dꞌayin.
A chꞌan̈ carta dꞌa ebꞌ creyente dꞌa Pérgamo
12 Ix yalanpax Jesús dꞌayin:
Tzꞌibꞌejbꞌat dꞌa in checabꞌ ayecꞌ dꞌa scal ebꞌ creyente dꞌa Pérgamo icha tic:
A jun ay yespada te jay ye dꞌa schabꞌil pacꞌan̈,
a tzꞌalan dꞌayex:
13 Vojtac bꞌajtil ayex eqꞌui.
Ay ex ecꞌ dꞌa jun chon̈abꞌ bꞌaj syacꞌ yajalil vin̈ Satanás,
palta an̈ejaꞌ tzin e cꞌanabꞌajej.
A vin̈aj Antipas,
yacꞌnac val testigoal sbꞌa vin̈ vuuj.
Milbꞌilcham vin̈ dꞌa e cal bꞌaj ayecꞌ vin̈ Satanás chiꞌ,
palta an̈ejaꞌ tecꞌan ix eyutej e bꞌa dꞌayin.
14 Palta ayto juntzan̈ e paltail svilaꞌ,
yujto ayex tzato eyacꞌoch e chiquin dꞌa scꞌaybꞌubꞌal vin̈aj Balaam.*
A vin̈ acꞌjinac scꞌool vin̈aj Balac ayic yacꞌannac juvoquel ebꞌ israel vin̈.
Yuj vin̈aj Balac chiꞌ,
schinac juntzan̈ nocꞌ ebꞌ,
juntzan̈ nocꞌ tzꞌacꞌji dꞌa scomon diosal ebꞌ.
Emnac pax ebꞌ ajmulal.
15 An̈ejaꞌ ayex pax tzeyacꞌoch e pensar dꞌa scꞌaybꞌubꞌal ebꞌ nicolaíta.
16 Yuj chiꞌ,
naec e bꞌa ticnaic,
tato maay,
elan̈chamel ol in javoc dꞌayex,
ol vacꞌan oval yedꞌ ebꞌ icha chiꞌ scꞌulej.
A jun espada ayelta dꞌa yol in tiꞌ,
a ol vacꞌlabꞌej.
17 Masanil mach tzꞌabꞌani,
yacꞌocabꞌ och schiquin dꞌa tas syal Espíritu dꞌa junjun iglesia.
A ebꞌ ol acꞌan techajoc,
ol vacꞌ jun maná sva ebꞌ,
aton jun cꞌubꞌaneli.
Ol vacꞌanpax junjunoc qꞌuen qꞌueen sacsac dꞌa ebꞌ.
A dꞌa jun qꞌueen chiꞌ tzꞌibꞌabꞌiloch jun acꞌ bꞌi malaj mach ojtannac.
A ebꞌ ol chaan yicoꞌ,
an̈ej ebꞌ ol ojtacaneloc,
xchi Jesús dꞌayin.
A chꞌan̈ carta dꞌa ebꞌ creyente dꞌa Tiatira
18 Ix yalanxi Jesús dꞌayin:
Icha tic tzutej a tzꞌibꞌanbꞌat dꞌa in checabꞌ ayecꞌ dꞌa scal ebꞌ creyente dꞌa chon̈abꞌ Tiatira:
A Yuninal Dios icha cꞌacꞌ yol sat,
axo yoc toxon̈ej sveei icha qꞌuen bronce,
a tzꞌalan jun tic dꞌayex:
19 Vojtac masanil tas tze cꞌulej.
Tzin e xajanej.
Tzin eyacꞌanoch dꞌa e cꞌool.
Tzin eyacꞌanpax servil.
Tecꞌan val tzeyutej e bꞌa eyacꞌan techajoc.
Vojtac to ecꞌalto tzex munlaj ticnaic icha dꞌa yalan̈taxo.
20 Palta ay janicꞌ tas tzin na dꞌa e patic,
yujto tze chaoch ix Jezabel dꞌa e cal.
A jun ix chiꞌ,
syaloch sbꞌa ix schecabꞌoc Dios,
palta ton̈ej syacꞌ musansatil ebꞌ in checabꞌ ix.
Yujto a ix tzꞌacꞌan scꞌool ebꞌ yic tzꞌem ebꞌ ajmulal,
scuchbꞌan pax ebꞌ ix schi juntzan̈ nocꞌ nocꞌ tzꞌacꞌji silabꞌil dꞌa juntzan̈ comon dios.
21 Nivan ix vutej in cꞌool dꞌa ix,
talaj sna sbꞌa ix yuj jun yajmulal chiꞌ,
palta malaj sgana ix sna sbꞌa dꞌa smul chiꞌ.
22 Yuj chiꞌ ol vacꞌoch syaelal ix,
ol bꞌatcan ix dꞌa sat chꞌat.
Yedꞌ pax ebꞌ scꞌulan ajmulal chiꞌ yedꞌ ix,
tato man̈ ol sna sbꞌa ebꞌ,
tato max yactejcan ebꞌ scꞌulan icha scꞌulej ix chiꞌ,
ol vacꞌpax val och syaelal ebꞌ.
23 An̈ejtonaꞌ ol vacꞌpax miljoccham ebꞌ yuneꞌ ix.
Icha chiꞌ ol aj in yojtacanel ebꞌ creyente dꞌa junjun iglesia to a in tic vojtac masanil tas ay dꞌa spensar ebꞌ yedꞌ tastac sna ebꞌ.
Ol yojtaquejpaxel ebꞌ to a in tic ol vacꞌ spac dꞌayex junjun ex ato syalaꞌ tas tze cꞌulej.
24-25 Palta a exxo aj Tiatira ex chiꞌ,
a ex ton max eyacꞌoch e pensar dꞌa scꞌaybꞌubꞌal jun ix chiꞌ,
aton juntzan̈ cꞌaybꞌubꞌal syal ebꞌ to yic vin̈ Satanás yaji,
man̈ comonoc tzꞌojtacajeli.
Palta a exxo max eyacꞌoch e bꞌa yedꞌ ebꞌ,
an̈ej jun tic svalbꞌat dꞌayex:
Vachꞌn̈ej tzeyutej e bꞌa masanto ol in jaxoc,
man̈xa junocxo checnabꞌil syal valanbꞌat dꞌayex.
26 A ebꞌ ol acꞌan techaj scꞌulan icha in gana masanto dꞌa slajvubꞌ,
aton ebꞌ ol vacꞌoch yopisio yacꞌan yajalil dꞌa juntzan̈ nación.
27 Icha yutejnac in Mam yacꞌan vopisio,
icha chiꞌ ol vutoc vacꞌan yopisio ebꞌ.
Yuj chiꞌ ol yacꞌ yajalil ebꞌ,
man̈xo ol ocꞌlaj scꞌool ebꞌ.
Ol satel juntzan̈ nivac nación chiꞌ ebꞌ,
icha tzꞌaj smacꞌjipoj junoc lum chen yedꞌ junoc qꞌuen cꞌococh.
28 An̈ejtonaꞌ ol vacꞌpax jun qꞌuen nit cꞌanal dꞌa ebꞌ.
29 Masanil mach tzꞌabꞌani,
yacꞌocabꞌ och schiquin dꞌa tas syal Espíritu dꞌa junjun iglesia,
xchi Jesús dꞌayin.