A Tas Chꞌoxbꞌil Yuj Jesucristo dꞌa San Juan
APOCALIPSIS
A juntzan̈ syacꞌ Cristo cojtaquejeli
1
A jun libro tic tzꞌalan yuj juntzan̈ tas acꞌbꞌil entregar dꞌa Jesucristo yuj Dios yic scojtaquejel a on̈ schecabꞌ on̈ tic.
A juntzan̈ syal tic toxo ol ujoc.
A Jesús chiꞌ ix checancot jun yángel yal juntzan̈ tic dꞌayin a in Juan in schecabꞌ in tic.
2 Svacꞌ testigoal in bꞌa yuj tas ix vilaꞌ yedꞌ yuj tas ix yal Dios yedꞌ pax yuj tas ix yal Jesucristo.
3 A jun libro tic,
a Dios ix acꞌan tzꞌibꞌchajoc.
Yuj chiꞌ a ebꞌ tzꞌavtani yedꞌ ebꞌ tzꞌabꞌani,
tato scꞌanabꞌajej ebꞌ tas syalaꞌ,
te vachꞌ yic ebꞌ,
yujto toxo ol ujoc juntzan̈ syal tic.
A juntzan̈ scarta vin̈aj Juan dꞌa uqueꞌ iglesia
4 A in Juan in tic,
tzin tzꞌibꞌejbꞌat dꞌayex ex yicxo Dios dꞌa uqueꞌ iglesia dꞌa yol yic Asia.
Yacꞌocabꞌ svachꞌcꞌolal Dios yedꞌ sjuncꞌolal dꞌayex.
A Dios ayecꞌ ticnaic,
aytaxoneqꞌui,
toto pax ol javoc.
Yacꞌocabꞌ svachꞌcꞌolal ucvan̈ ebꞌ espíritu ayecꞌ dꞌa yichan̈ bꞌaj cꞌojanem Dios dꞌayex.
5 Axo Jesucristo,
aton testigo te yeln̈ej syalaꞌ,
yacꞌocabꞌ svachꞌcꞌolal yedꞌ sjuncꞌolal dꞌayex.
A bꞌabꞌlaj pitzvinac pax dꞌa scal ebꞌ chamnac.
A Yajal yaj dꞌa ebꞌ yajal dꞌa yolyibꞌan̈qꞌuinal tic.
Te xajan on̈ yuuj.
Ix yicꞌcanel co mul yedꞌ schiqꞌuil,
6 on̈ yacꞌanoch schon̈abꞌoc yic tzon̈ och sacerdoteal,
yic scacꞌ servil Dios,
aton Smam.
Calec to te nivan yelcꞌoch Jesucristo,
te ay spoder dꞌa masanil qꞌuinal.
Amén.
7 A Cristo toxo ol javoc dꞌa scal asun.
Masanil ebꞌ anima ol ilan sjavi.
Yedꞌ pax ebꞌ tecjinacchamoc,
ol yil ebꞌ sjavi.
Axo ebꞌ anima dꞌa junjun chon̈abꞌ dꞌa yolyibꞌan̈qꞌuinal tic,
ayic ol yilan ebꞌ,
ol laj ocꞌ ebꞌ.
Val yel icha chiꞌ ol ajoc.
Amén.
8 A in ton tic bꞌabꞌel in dꞌa smasanil,
an̈ejaꞌ slajvubꞌ in paxi.
Icha chabꞌ letra,
A yedꞌ Zeta,
icha chiꞌ vaji,
xchi Dios Cajal,
aton syal yuj smasanil.
Ayecꞌ ticnaic,
aytaxoneqꞌui,
toto pax ol javoc.
A tas yilnac vin̈aj Juan icha vayichal
9 A in Juan in tic,
cucꞌtac co bꞌa eyedꞌoc.
Quetbꞌeyum co bꞌa cabꞌan syail.
An̈ejtonaꞌ quetbꞌeyum pax co bꞌa dꞌa yol scꞌabꞌ Dios.
Junxon̈ej scutej co chaan co tecꞌanil syacꞌ Jesucristo dꞌayon̈.
A junel,
preso vaj dꞌa jun lugar scuchan Patmos,
dꞌa snan̈al aꞌ mar,
yujn̈ej to svalel slolonel Dios,
svacꞌanpax testigoal in bꞌa yuj Jesucristo.
10 Axo dꞌa scꞌual Cajal,
ix javi spoder Yespíritu Dios dꞌa vibꞌan̈.
Ix vabꞌani,
ay jun te chaan̈ ix avaj dꞌa in patic,
icha yocꞌ junoc qꞌuen trompeta.
11 Ix yalan dꞌayin:
A tas van ilan tic,
tzꞌibꞌejcan dꞌa chꞌan̈ uum.
Tzacꞌanbꞌat dꞌa ebꞌ creyente dꞌa uqueꞌ iglesia:
Aton dꞌa Éfeso,
dꞌa Esmirna,
dꞌa Pérgamo,
dꞌa Tiatira,
dꞌa Sardis,
dꞌa Filadelfia yedꞌ dꞌa Laodicea,
xchi dꞌayin.
12 Ix lajvi chiꞌ,
ix in bꞌat qꞌuelnaj dꞌa in patic,
ix vilani mach jun tzꞌavaj chiꞌ dꞌayin.
Axo ix vilani,
ay uqueꞌ sbꞌachnubꞌ candil nabꞌa oro.
13 Axo dꞌa snan̈al juntzan̈ bꞌachnubꞌ chiꞌ,
ay jun icha anima yilji.
Ayoch jun spichul jucan,
ayemcꞌoch dꞌa yibꞌan̈ yoc.
Ayoch jun tzecꞌul nabꞌa oro levan sat dꞌa sn̈iꞌ scꞌool.
14 Axo xil sjolom,
icha nocꞌ sacsac lana,
icha pax saquil qꞌuen sacbꞌat.
Axo yol sat,
lajan yilji icha teꞌ cꞌacꞌ.
15 Axo yoc,
toxon̈ej sveei yilji icha qꞌuen bronce sn̈usji dꞌa yol horno,
sn̈icjipaxel smical.
Toxon̈ej sn̈ilili sjaj sloloni,
icha scꞌan̈ yem aꞌ nivac pajav.
16 Yedꞌnacqꞌue uqueꞌ cꞌanal dꞌa svachꞌ cꞌabꞌ.
A dꞌa yol stiꞌ ayelta jun espada jay ye dꞌa schabꞌil pacꞌan̈.
A sat,
copopi yilji icha yoc cꞌu stup yoc co sat quilani.
17 Ayic ix vilan chiꞌ,
in telvi,
icha chamnac in aj dꞌa yichan̈.
Palta ix yacꞌanqꞌue svachꞌ cꞌabꞌ dꞌa vibꞌan̈,
ix yalan dꞌayin:
—Man̈ ach xivoc.
A in ton tic bꞌabꞌel in dꞌa smasanil,
slajvubꞌ in paxi.
18 Pitzan in,
milbꞌil in chamoc palta pitzvinaquinxi dꞌa juneln̈ej.
A dꞌayin ay sllaveal yic chamel yedꞌ jun lugar bꞌaj ay ebꞌ chamnac.
19 Tzꞌibꞌejcan juntzan̈ ix il tic:
Aton juntzan̈ ayecꞌ ticnaic yedꞌ juntzan̈ toto ol ujoc.
20 Ol val dꞌayach tas syalelcꞌoch uqueꞌ cꞌanal ix il dꞌa in vachꞌ cꞌabꞌ yedꞌ pax uqueꞌ sbꞌachnubꞌ candil nabꞌa oro ix ilaꞌ.
A uqueꞌ cꞌanal chiꞌ,
aton ebꞌ ucvan̈ in checabꞌ dꞌa uqueꞌ iglesia schꞌoxoꞌ.
Axo uqueꞌ sbꞌachnubꞌ candil chiꞌ,
aton uqueꞌ iglesia chiꞌ schꞌoxoꞌ.