Apocalipsis sbꞌi jun libro tic, yujto a dꞌay tzꞌibꞌabꞌilcan tas chꞌoxbꞌil dꞌa vin̈aj apóstol Juan ayic preso yaj vin̈ dꞌa Patmos, aton jun lum luum ay dꞌa snan̈al aꞌ mar. Ix tzꞌibꞌchaj jun libro tic ayic van spechji bꞌeyecꞌ ebꞌ creyente yujto syacꞌoch Cristo ebꞌ dꞌa scꞌool. A tas nabꞌil yuj vin̈aj Juan chiꞌ, to scꞌaybꞌej ebꞌ creyente vin̈ yic tecꞌan syutej sbꞌa ebꞌ yacꞌanoch Cristo dꞌa scꞌool, yic tecꞌanpax syutej sbꞌa ebꞌ dꞌa scal yaelal van yabꞌan ebꞌ chiꞌ. A jun libro tic tzꞌalancot yuj tas ix chꞌoxji yil vin̈aj Juan icha vayich, yic snachajel yuj ebꞌ creyente tzꞌavtan jun libro tic, vachꞌchom max nachajel yuj anima smasanil.

An̈ej jun libro tic tzꞌalan yuj juntzan̈ tastac satubꞌtac ol ujoc. Tzijtum juntzan̈ yechel ol checlaj dꞌa satchaan̈ yedꞌ dꞌa sat luum tic. Syalanpaxcot yuj jun tas nivan yelcꞌochi, aton tas ol aj sjax Jesucristo dꞌa schaelal, tas pax ol aj satel ebꞌ man̈ ol acꞌanoch Cristo chiꞌ dꞌa scꞌool yuj Dios yedꞌ pax tas ol aj syamchaj vin̈ diablo ayic ol emcan vin̈ mil abꞌil dꞌa jun xabꞌ olan yedꞌ pax yic ol bꞌatcan vin̈ dꞌa cal cꞌacꞌ dꞌa juneln̈ej yedꞌ ebꞌ ol och tzacꞌan yedꞌ vin̈. Syalanpaxi to ol yacꞌ yajalil Cristo yedꞌ yiglesia mil abꞌil, yedꞌ tas ol aj yacꞌan spac Dios dꞌa ebꞌ yuninal, aton ebꞌ scꞌanabꞌajan Dios chiꞌ, yedꞌ tas ol aj schꞌolbꞌitaj masanil anima dꞌa slajvubꞌ cꞌual yuj Dios. Syalanpax yuj tas ol aj satancanel jun yolyibꞌan̈qꞌuinal tic Dios yedꞌ satchaan̈. Syalanpaxcot yuj jun acꞌ satchaan̈ yedꞌ jun acꞌ yolyibꞌan̈qꞌuinal.