3 Ex xajanabꞌil vuuj,

ijan in tzꞌibꞌejnacbꞌat jun in carta yic svalbꞌat dꞌayex yuj co colnabꞌil.

Axo ticnaic,

ay jun más yovalil svalbꞌat dꞌayex.

Svalbꞌati to tzeyacꞌ val eyip yic max juvi juntzan̈ co cꞌaybꞌubꞌal acꞌbꞌil dꞌayon̈ dꞌa juneln̈ej a on̈ yic on̈xo Dios tic.

4 Svalbꞌat juntzan̈ tic dꞌayex,

yujto ay ebꞌ tzꞌoch dꞌa co cal dꞌa elcꞌaltac.

A ebꞌ chiꞌ te chuc ebꞌ.

Syal ebꞌ icha tic:

—Colchajnac on̈xo yuj svachꞌcꞌolal Dios.

Yuj chiꞌ,

yaln̈ej tas chucal co gana,

syaln̈ej co cꞌulani,

xchi ebꞌ.

Spatiquejcanel Jesucristo ebꞌ,

an̈ejton Cajal yaji.

Aton ebꞌ chiꞌ tzꞌibꞌabꞌilcan yabꞌixal dꞌa Slolonel Dios dꞌa pecaꞌ,

syalani to ol bꞌatcan ebꞌ dꞌa syaelal.

5 A jun svalbꞌat tic dꞌayex,

eyojtacxo,

palta in gana tze nacot jabꞌoc vedꞌoc.

A ebꞌ vetchon̈abꞌ israel dꞌa pecaꞌ,

colchajnac el ebꞌ smasanil dꞌa Egipto yuj Dios Cajal.

Palta slajvi chiꞌ tzijtum ebꞌ yacꞌnac chamoc,

yujto maj yacꞌoch scꞌool ebꞌ dꞌay.

6 An̈ejtonaꞌ tze nacot tas ajnac juntzan̈ ebꞌ ángel dꞌa pecaꞌ,

yujto yactejnaccan yopisio ebꞌ,

yactannacpaxcan scajnubꞌ ebꞌ.

Yuj chiꞌ tzecꞌbꞌilcan cꞌotan ebꞌ dꞌa qꞌuen cadena dꞌa juneln̈ej.

A ticnaic preso yaj ebꞌ dꞌa scal qꞌuicꞌalqꞌuinal yuj Dios.

Icha chiꞌ yajcan ebꞌ masanto ol ja jun cꞌual te nivan yelcꞌochi.

Ato taꞌ ol chꞌolbꞌitaj ebꞌ.

7 An̈ejtonaꞌ tze nacot tas ajnac ebꞌ aj Sodoma yedꞌ ebꞌ aj Gomorra yedꞌ juntzan̈xo chon̈abꞌ ay dꞌa slacꞌanil.

An̈ej ajmulal scꞌulejnac ebꞌ.

Scꞌulannac pax ajmulal ebꞌ yedꞌ ebꞌ yetvinaquil.

Icha yutejnac sbꞌa ebꞌ ángel chiꞌ,

icha chiꞌ yutejnac pax sbꞌa ebꞌ.

A ebꞌ chiꞌ,

chꞌoxnabꞌil yaj ebꞌ dꞌa masanil anima ticnaic,

yujto van yabꞌan syail ebꞌ dꞌa cal cꞌacꞌ dꞌa juneln̈ej.

8 Axo ebꞌ ayoch dꞌa co cal ticnaic,

an̈ej chucal naan yuj ebꞌ,

yuj chiꞌ syacꞌbꞌat sbꞌa ebꞌ dꞌa scal.

Malaj yelcꞌoch spoder Dios dꞌa ebꞌ.

Ton̈ej sbꞌuchvaj ebꞌ dꞌa ebꞌ te nivac yelcꞌochi.

9 Sco nacot jun sat ángel scuchan Miguel.

Ayic junel yacꞌnac oval yedꞌ vin̈ diablo,

ayic stelannac sbꞌa yedꞌ vin̈ diablo chiꞌ yuj snivanil vin̈aj Moisés.

A jun ángel chiꞌ,

vachꞌchom te nivan spoder,

palta maj stecꞌbꞌejlaj sbꞌa sbꞌuchvaj dꞌa vin̈ diablo chiꞌ,

maj scatabꞌej paxlaj vin̈.

Ton̈ej yalnac icha tic:

Aocabꞌ Dios Cajal tzach cachani,

xchin̈ej dꞌa vin̈.

10 Palta a ebꞌ chiꞌ,

ton̈ej scomon bꞌuchvaj ebꞌ dꞌa junoc tas man̈ yojtacoc.

Ay juntzan̈ tas yojtac ebꞌ icha snaan junoc nocꞌ nocꞌ malaj spensar.

A dꞌa juntzan̈ tic ton̈ej svachꞌ juejel sbꞌa ebꞌ.

11 Obꞌiltac ebꞌ,

yujto lajan syutej sbꞌa ebꞌ icha yutejnac sbꞌa vin̈aj Caín.

Yujn̈ej qꞌuen tumin schon̈el sbꞌa ebꞌ,

icha yutejnac sbꞌa vin̈aj Balaam.^*

Icha vin̈aj Coré,^*

satnac el vin̈,

yujto yacꞌnac oval vin̈ dꞌa spatic Dios,

icha chiꞌ ol aj satel ebꞌ yuj spitalil.

12 Qꞌuixvelal tzꞌajoch ebꞌ dꞌa e cal ayic tzex mol vaꞌi yic tze chꞌoxani to tze xajanej e bꞌa.

Yujto comonn̈ej tzꞌoch ebꞌ vael dꞌa e cal,

max xiv jabꞌoc ebꞌ.

Icha junoc tan̈vum calnel an̈ej stan̈vej sbꞌa,

icha chiꞌ syutej sbꞌa ebꞌ.

Icha taquin̈ asun ton̈ej sbꞌeyecꞌ yuj icꞌ,

icha chiꞌ yaj ebꞌ.

Lajan ebꞌ icha junoc te teꞌ max satanlaj dꞌa stiempoal.

Ton̈ej stacjieli,

schamel teꞌ.

Slajvi chiꞌ,

stocꞌjiqꞌueta teꞌ smasanil yedꞌ schꞌan̈al yibꞌ.

Svachꞌ satel teꞌ dꞌa juneln̈ej.

13 Icha val yovaj aꞌ mar sqꞌue chulan,

icha chiꞌ yaj ebꞌ,

yujto max yal scachjioch vaan ebꞌ.

Icha juntzan̈ svom a aꞌ tzꞌelcan dꞌa stitac,

jantac chucal yedꞌnac,

icha chiꞌ ebꞌ yuj juntzan̈ tas qꞌuixvelal scꞌulej chiꞌ.

Icha junoc qꞌuen cꞌanal satbꞌat dꞌa sbꞌe,

icha chiꞌ yaj ebꞌ.

Lista yaj qꞌuicꞌalqꞌuinal bꞌaj yovalil ol cꞌochcan ebꞌ dꞌa juneln̈ej.

14 A vin̈aj Enoc,

yuquilxo yin̈tilal vin̈aj Adán yaj vin̈.

A vin̈ aljinaccan yabꞌixal ebꞌ ayecꞌ dꞌa co cal tic icha tic:

Ol jax Cajalil,

man̈ jantacoc smilal ebꞌ yicxo yedꞌnac ayic ol jaxoc.

15 Ato taꞌ ol chꞌolbꞌitaj yaj ebꞌ anima smasanil.

Jantacn̈ej ebꞌ chuc,

ol ochcan yaelal dꞌa yibꞌan̈ ebꞌ yuj smul,

yujto chuc scꞌulej ebꞌ.

Syalanpax chucal ebꞌ dꞌa spatic Dios Cajal,

yujto te chuc spensar ebꞌ,

xchinaccan vin̈aj Enoc chiꞌ.

16 A ebꞌ ay dꞌa co cal tic,

malaj tas scha scꞌol ebꞌ,

alum pecal ebꞌ.

An̈ej tas snibꞌej snivanil ebꞌ scꞌulej.

Ton̈ej ste iqꞌuejchaan̈ sbꞌa ebꞌ.

Yalxon̈ej mach syal ebꞌ vachꞌil yujn̈ej to sgana ebꞌ syacꞌ ganar jabꞌoc tas dꞌa spatic ebꞌ.

17 Ex xajanabꞌil vuuj,

naeccot juntzan̈ yalnacbꞌat ebꞌ schecabꞌ Cajal Jesús dꞌayex icha tic:

18 A dꞌa jun slajvubꞌ tiempoal,

ay ebꞌ comonn̈ej ol bꞌuchvajoc.

An̈ej juntzan̈ chucal sgana ebꞌ,

a ol sbꞌeybꞌalej ebꞌ,

xchi ebꞌ.

19 Yuj ebꞌ chiꞌ ol spoj sbꞌa ebꞌ yicxo Dios.

An̈ej dꞌa yic yolyibꞌan̈qꞌuinal tic ayoch spensar ebꞌ.

Malaj Yespíritu Dios ayoch dꞌa ebꞌ.

20 Palta a ex xajanabꞌil ex vuuj,

tecꞌan tzeyutej e bꞌa dꞌa juntzan̈ cꞌaybꞌubꞌal eyacꞌnacoch dꞌa e cꞌool to yicn̈ej Dios yaji.

Tzex lesalvi yedꞌ spoder Yespíritu Dios.

21 Naann̈ejocabꞌ eyuuj to xajan ex yuj Dios yacbꞌan sco tan̈vejec sja jun cꞌual yic ol yacꞌan co qꞌuinal Cajal Jesucristo dꞌa juneln̈ej,

yujto tzꞌocꞌ scꞌool dꞌayon̈.

22 Co montejec ebꞌ ay schabꞌcꞌolal,

yic ol stecꞌbꞌejxi sbꞌa ebꞌ.

23 Yedꞌ pax ebꞌ ichato aybꞌat dꞌa cal cꞌacꞌ,

co colequelta ebꞌ.

Ichato van co n̈eranelta ebꞌ dꞌa cal cꞌacꞌ chiꞌ.

Ay juntzan̈xo ebꞌ yovalil tzꞌocꞌ co cꞌool yuuj,

palta xivoc on̈ec dꞌa ebꞌ,

yujto ay smay co juviel yuj ebꞌ.

Axo juntzan̈ chucal scꞌulej ebꞌ chiꞌ,

co yajequel smasanil icha co yajanel junoc pichul mictac.

24-25 Junn̈ej ton Dios,

aton co Columal.

A tzon̈ tan̈vani yic vachꞌ Aꞌ ol on̈ icꞌanbꞌat dꞌa yichan̈,

malaj co paltail ayic ol on̈ cꞌoch dꞌa svachꞌilal.

Ol on̈ te tzalaj yedꞌ taꞌ.

Yuj Cajal Jesucristo,

yuj chiꞌ calec to a Dios te nivan svachꞌil,

te nivan yelcꞌochi,

te ay spoder.

An̈ej Yajal dꞌa Smasanil.

Ichataxon chiꞌ yaji,

ayic manto bꞌo yolyibꞌan̈qꞌuinal tic.

An̈ejaꞌ icha pax chiꞌ ticnaic.

An̈ejaꞌ icha pax chiꞌ dꞌa bꞌaqꞌuin̈.

Amén.