A stiꞌ Dios dꞌa vin̈aj David
Sbꞌit ebꞌ israel ayic van sqꞌue ebꞌ dꞌa sbꞌeal Jerusalén.
132
1-2 Mamin Jehová Te ay ip, co Diosal ach a on̈ yin̈til on̈ vin̈aj Jacob, nacot vin̈aj David yedꞌ syaelal. Nacot stiꞌ vin̈ ix yacꞌ dꞌayach ayic ix yalan vin̈:3 Man̈ ol in och dꞌa yol in pat, man̈ ol in ecꞌlaj jichan dꞌa sat in chꞌat,
4 man̈ ol in mutzꞌlaj in sat, man̈ ol ochlaj numnaj jabꞌoc in vayan̈
5 ayic manto in bꞌo junoc cajnubꞌ bꞌaj scajnaj Jehová co Diosal Te ay yip a on̈ yin̈til on̈ vin̈aj Jacob, xchican vin̈.
6 A dꞌa Efrata ix cabꞌ yabꞌixal teꞌ scaxail strato Dios, axo dꞌa yol lum smacbꞌen vin̈aj Jaar ix ilchaj teꞌ cuuj.
7 Coyec dꞌa stemplo Jehová, axo taꞌ tzon̈ emec cuman dꞌa yichan̈.
8 Mamin Jehová, cotan̈ dꞌa a cajnubꞌ ayn̈ej eqꞌui. Cotan̈ yedꞌ teꞌ scaxail a trato, aton bꞌaj scheclajel a poder.
9 Aocabꞌ vachꞌil sbꞌeybꞌalej ebꞌ a sacerdote. Elocabꞌ yav ebꞌ icxo dꞌa tzalajcꞌolal.
10 Yuj tas alnaccan dꞌa vin̈ a checabꞌ aj David, man̈ iqꞌuel a sat dꞌa vin̈ rey sicꞌbꞌilel uuj.
11 Ach Jehová, ix acꞌcan a tiꞌ dꞌa vin̈aj David dꞌa sjichanil to man̈ ol a qꞌuexlaj tas ix alaꞌ, ayic ix alan icha tic: A junoc uninal ol vacꞌcanoch reyal a qꞌuexuloc.
12 Tato scꞌanabꞌajej in trato ebꞌ in̈tilal yedꞌ tastac ol val dꞌa ebꞌ, ol ochn̈ej ebꞌ dꞌa a despacho dꞌa masanil tiempo, xa chi dꞌa vin̈.
13 Mamin Jehová, a ach ix a sicꞌcanel lum tzalan Sion yic tzach cajnaj taꞌ, yujto icha chiꞌ snibꞌej a cꞌool.
14 Ix alan icha tic: Aton jun tzalan tic bꞌaj in gana tzin cajnaji. Ol in cajnaj dꞌa luum yujto icha chiꞌ ix aj schaan in cꞌool.
15 Man̈ jantacoc vael uqꞌuel ol vacꞌ dꞌa ebꞌ ayecꞌ cajan taꞌ, ol vacꞌan bꞌudꞌjoc scꞌool ebꞌ mebꞌaꞌ.
16 Ol in col ebꞌ sacerdote. Axo ebꞌ ol in cꞌanabꞌajanoc, ol vacꞌ avajqꞌue ebꞌ yuj tzalajcꞌolal.
17 A dꞌa Sion chiꞌ, ol vacꞌoch jun yin̈tilal vin̈aj David reyal. A vin̈ sicꞌbꞌilel vuuj, man̈xa bꞌaqꞌuin̈ ol yactej ebꞌ yin̈tilal vin̈ yacꞌan reyal.
18 A ebꞌ ayoch ajcꞌolal dꞌa vin̈ ol vacꞌcan qꞌuixvelal ebꞌ. Axo yopisio vin̈, ol vicꞌchaan̈, xa chican ach Jehová.