E Isu i Lakea na Ruma ne Sakeus
19
E Isu i dili na tanga e Ieriko,
ta ge laho polo.
Lukas 19:1-27
2 A bakovi tara i made vona a tanga iea,
a rana e Sakeus,
a bakovi i muga ne huriki a bakovi ni bole a takis.
Ia a bakovi na mahala.
3 I ngaru ni masia e Isu,
pali i keri ni masia a vuhuna i kapo,
i kupo hateka e huriki ri vapesihi halui e Isu.
4 Lakea e Sakeus i nunu muga na dala,
i rike na kai a pik,
ge made langa,
ge matai kamumua e Isu na tahuna i laho polo.
5 Na tahuna e Isu i bele vona a hini nga,
i mata rike,
i masia e Sakeus,
lakea i takia,
“Sakeus,
o puru valai malaviriri!
Mona ga made turamu na ruma vomu.”
6 Lakea e Sakeus i puru malaviriri,
i vivi hateka ni taguia e Isu.
7 *E huriki ri masia ri ta barangungu,
ri ta maea,
“Re Isu,
i navai i vano i made turana bakovi hale iea?”
8 *Na tahuna ri made na ruma,
e Sakeus i pesi rike,
i takia e Bakovi Dagi,
i ta maea,
“Ga veru na naguna ge rua a maki lobo nau.
A tabekena tara ga habi ne huriki a matasia.
E huriki a tami ria hosi,
a panaho a maki ne ria,
ga koli balaka va tabu.”
9 *Lakea e Isu i takia i ta maea,
“Mona a Vure i korimule e huriki na ruma iea,
a vuhuna ra bakovi iea,
ia tara a hamone Abraham.
10 *A Tuna Bakovi i valai ge matakana e huriki ri velu,
ge korimule ria.”
A Vora ala Ravulu
11 E huriki ri talangaki a ngava i taki,
lakea e Isu i taki tabua ne ria tara nita vakakika,
a vuhuna i valai tabukoi pali o Ierusalem,
e huriki ri luhoi ta a harikianga na Vure i popote ge valai.
12 Lakea e Isu i taki ria i ta maea,
“A bakovi dagi tara ta ge havai lakea na tanga basi,
ni gi rata ge ia a hariki,
muri ge hamule valai,
ge matakari a harikianga.
13 Lakea i gale valai a vora vona ala ravulu,
i habi ne ria takutaku a moni dagi.a
Lakea i taki ria i ta maea,
‘Mu rata a leho vona a moni nga ge harena na tahuna ga hamule valai vona.’
Muri i vano.
14 “Pali e huriki na tanga vona ri marikoi vona.
Lakea ri rudu muri vona e huriki a vinuru,
ri gi ta maea,
‘Mi marikoi vona a bakovi iea.
Nahea ge ia a hariki ne mia.’
15 “Pali na tahuna i bele vona a tanga basi iea,
ni rata ia a hariki.
Na tahuna i hamule na tanga vona,
i ta maea,
‘Mu gale valai nau e huriki a vora a habi a moni ne ria,
ri gi vakasiri iau vona i riva tabu ri vakabele.’
16 “I valai muga a vora tara,
i ta maea,
‘Bakovi dagi,
iau a leho vona a moni vomu,
a vakabele tabu a moni vomu i ravulu.’
17 *“Lakea a hariki i takia a vora i ta maea,
‘Kamumu hateka!
Ioe a vora kamumu.
Ngane o matakari a tanga dagi ge ravulu,
a vuhuna o rata kamumu a leho kiroko.’
18 “Muri i valai tabu tara vora,
i ta maea,
‘Bakovi dagi,
a leho vona a moni vomu,
a vakabele tabu a moni vomu i lima.’
19 “Lakea a hariki i takia a vora i ta maea,
‘Ioe ngane o matakari a tanga dagi ge lima.’
20 “Muri i valai tabu tara vora,
i takia a hariki,
i ta maea,
‘Bakovi dagi,
a moni vomu o habi nau,
a sivu na marapena kala a ruhulolo.
21 A rata mavonga,
a vuhuna a mangenge vomu,
ioe a bakovi hateka.
A mahala i vakabele e huriki,
o bole.
A maki ni kani i varo e huriki,
o bole.’
22 “Muri a hariki i takia a vora,
i ta maea,
‘Ioe a bakovi hale!
Na ngavamu kunana ga vakasiri e huriki ne ioe o rata hale.
Ioe o lohoka nau,
iau a bakovi hateka,
a bole tavula a mahala ne huriki,
a bole tavula a maki ni kani ne huriki.
23 Pali i navai o uka ma o ru dili na tava a moni nau?
Na tahuna a hamule valai,
bara bole mule turana ranga moni o vakabele tabu.’
24 “Lakea a hariki i taki e huriki ri pesi tabukoi i ta maea,
‘Mu bole mule vona a moni a habi vona rira,
mu habia na viri i vakabele tabu a moni i ravulu.’
25 “Ri takia ri ta maea,
‘Bakovi dagi,
a vora iea i tahoka pali a moni i ravulu.’
26 *“Pali a hariki i ta maea,
‘E huriki ri tahoka pali a maki bara ni habi tabu ranga.
Pali e huriki ri uka a maki bara ni bole mule lobo a maki popote ri tahoka.
27 Pali ngane i vai e huriki a gimagu ri koi nau ge iau a hariki ne ria?
Mu bole valai ria mu rabalaki ria na matagu.’ ”
E Isu i Dili o Ierusalem
28 E Isu i taki loboa a nita vakakika iea,
muri i laho lokovonga o Ierusalem.
Lukas 19:28-48
29 Na tahuna i valai tabukoi na tanga e Betpage e Betani,
na dahana lolo e Oliva,
i rudu muga a murimuri vona ala rua,
30 i ta maea,
“Muru muga lakea na tanga kiroko lake.
Na tahuna muru dili vona,
bara muru masia a tuna donki ni kolotata vonga.
A tuna donki iea,
i uka tara viri ge rike vona ma.
Muru pugea,
muru bole vilia.
31 A viri tara ge nana marua,
ge ta maea,
‘I navai muru pugea a donki iea?’
Muru takia muru ta maea,
‘E Bakovi Dagi i tahoka a leho vona.’ ”
32 A murimuri nga ru vano ru dili na tanga,
ru masia a tuna donki i manga a hini i takia ne rua e Isu.
33 Na tahuna ru pugea,
i pagitala a tahona,
i nana rua i ta maea,
“I navai muru pugea a tuna donki iea?”
34 Lakea a murimuri nga ru koli,
ru ta maea,
“E Bakovi Dagi i tahoka a leho vona.”
35 Muri ru lalua a tuna donki lakea ne Isu,
ru vulala na bitona a varakia ne rua,
ru vakarikea vona e Isu.
36 Lakea e huriki ri vulala puru na dala muga na donki a varakia ne ria,
i laho langa vona a donki.
37 I valai tabukoi ngane o Ierusalem,
na tabeke na dala i raga valai na lolo e Oliva.
Ngane e huriki a murimuri lobo ri gale dagi,
ri kavurikea a Vure vona a maka nivakasiri ri matai,
ri ta maea,
38 *“A Vure ge rata kamumu a hariki i valai na rane Bakovi Dagi!
Ngane e huriki a bakovi a ngatavine ri gi made na nivalemu turana Vure.
Si gi kavurikea a rana Vure Meli Liu!”
39 Lakea e huriki a Pariseo ranga,
ra ri laho turane huriki,
ri takia e Isu ri ta maea,
“Mari ni tovo,
o taki e huriki a murimuri vomu nahea ri gi taki a ngava nga.”
40 Lakea e Isu i koli,
i ta maea,
“A taki mua,
ria bara ri ngavarubu,
a maka kedo bara ri gale tala.”
E Isu i Taringia e Ierusalem
41 Na tahuna e Isu i bele tabukoi o Ierusalem,
i masia a tanga,
i taringia,
42 i ta maea,
“Mua o huriki a bakovi o Ierusalem,
bara mu lohoka nau,
bara mu made na nivalemu.
Pali i uka ma mu matakilala iau.
43 Lakea a parava bara i valai,
e huriki a pile ne mua bara ri pesi halui mua,
ri gi keli kadolu rike a malala na nure,
lakea e huriki a pile bara ri page poloa a nure,
ri dili na tanga,
ri bolea.
44 *Bara ri ratapile a tanga turana e huriki ri made pololilo vona.
I uka tara kedo ge tabuli langa vona tara kedo tara.
Bara i bele a maki nga,
a vuhuna i uka ma mu matakilaka vona a parava i valai vona a Vure ge korimule mua.”
E Isu i Lili e Huriki na Roho na Vure
45 Muri e Isu i dili na roho na Vure,
i vakatubu ni lili tala e huriki ri vakona ri vahabi a maki pololilo.
46 *I taki ria,
i ta maea,
“A ngava ni here puru na Hinere i ta maea,
‘A roho nau,
a roho na ni vasileki.’
Pali mua mu ratea i manga a hini ri haniu vona e huriki a panaho.”