Yesu Ikarata Tool Atu Yo Kene Ikap Rama I
2
Yesu inepe a ke kapala iman a ila,
motong la imulu pang malala Kapenam.
Ngan nen le di tooltool tilongo bingi ki yo imulu a man inepe rumu nga.
2 Le nga di tooltool alunu kaiye tilo tigaua ye rumu tani yo inepe ye i,
in le ipon le man itaua dada le manga sa mulu yo bet di tooltool tipa ke diki a tilo,
ngan siap.
Inbe iwetewete betanga ke Maro pang di.
3 Inbe di tooltool kapala yo timan pang ye nga,
ngan pai kidi ngan titokotoko tool atu yo ikap rama in a timan pang ye Yesu.
4 Bong ngan ni manga pa yo bet tikaua tool tani a tilo pang ye,
ngan siap,
yesoo di tooltool alunu kaiye san.
Ngan nen le tikauu a tilo rumu pono ke ete,
motong la tisaua ni gimono atu le itarye ni yo Yesu inepe ye i,
inbe tipadua le ipa ye moi ki a idu pang ye.
5 Ye kene tani in Yesu ikamata ben di tooltool tina ngan titara lodi medana panga moolmool nga,
le tina iwete pang tool tani yo ikap rama in nen.
Iyei ne,
“Natuk,
sennene kiong ngan agir oo.”
6 Ngan di pannoongoo ke wer ke Maro ngan pattu tiwurur a tilongo betanga yo Yesu iwete nen nga,
le nga di tapdi lodi kaua urata nen,
7 “Ona tiap,
nga gelei a tool i iwete nen nga?
Nga o bet ikaua Maro nene,
too?
Tool sa yo bet igiri sennene kidi tooltool ngan tiap,
bong Maro yetaleu.”
8 Le tina pattu leu be Yesu lon galanga ye di ye yo lodi kaua urata nen nga,
le nga itor di nen,
“Nga gelei bet lomu kaua urata nen nga?
9 Soo betanga imarra bet aweta pang tool kap rama tani i?
Bet awete panga nen,
‘Sennene kiong ngan agir oo,’
too bet awete panga nen,
‘Kumadit,
a kouo moi kiong a kupa’?
10 Bong au i lok bet ayei nen,
a bet nen ngan ole lomu galanga bet Tool Moolmool ke Maro in gurana ki mai ye tana i,
ke bet igiri sennene kidi tooltool.”
Motong la Yesu iwete pang tool yo ikap rama in nen,
11 “Ai,
awete pong,
kumadit a kouo moi kiong a kula pang rumu kiong.”
12 Motong la di tooltool le imot matadi ikenen ye,
inbe imadit tina le ikaua moi ki a ipa a ila.
Ngan nen le di tooltool tina yo tikamata nga,
ngan titakrai a tiyitmaka Maro ene.
Tiyei ne,
“Mugu ngan amkamata so sa yo nen,
ngan tiap!”
Yesu Koonoo Pang Liwi
13 Motong la igege malala tani,
inbe ipa mulu a idu pang ye ran ke Galili.
Idu,
ngan di tooltool alunu kaiye la timan pang ye man tiye tipa,
inbe ipatomonai di nga.
14 Le nga ipa a ila ngan ikamata Alpias natunu yo Liwi i,
in iwurur rumu ke sodaningi pat in lono.
Motong la Yesu iwete panga nen,
“Ai,
kuman kutoo au.”
Le nga Liwi imadit tina le itoo a yeru tila.
15 Motong la tinepe a kene san in Yesu iye di galiunu tinepe rumu ke Liwi a tiye tikan so.
Ngan di tooltool alunu ke sodaningi pat,
inbe alunu ke geingi sennene nga,
ngan di lapau tilo a tiye Yesu tikan so,
yesoo di tooltool yo ben di nga,
ngan titoo Yesu a tiye tipa.
16 Le nga ye kene tani in di pannoongoo ke wer ke Maro pattu yo di Paresi nga,
ngan tikamata Yesu iye di tooltool ke geingi sennene,
inbe di tooltool ke sodaningi pat tigaua a tikan so nga.
Motong la titor di galiunu nen,
“Ai,
nga gelei bet iye di tooltool ke sodaningi pat,
inbe di tooltool ke geingi sennene tigaua a tikan so nga?”
17 Ngan Yesu talngana katbe tina yo tiwete nen nga,
le nga iwete pang di nen,
“Di tooltool yo tinidi dook mata nga,
ngan tool ke bar ke bet ipa pang ye di tiap,
bong di tooltool la matamatenge ikap di nga.
Ngan nanga,
au i asi nga bet si akiu di tooltool yo noonoodi nga tiap,
bong di tooltool yo ke sennene nga.”
Titoro Yesu Ye Dada Ke Sapanga Ye Kaningi
18 Ye kene kapala ngan Yowan yo irriu di tooltool i,
in di galiunu,
inbe di Paresi ngan tisapa ye kaningi so.
Le nga di tooltool pattu timan ye Yesu man titoru.
Tiyei ne,
“Yowan di galiunu,
inbe di Paresi galiudi nga tisapa ye kaningi so,
e nga gelei bet di galium nga tisapa ye kaningi so tiap nga?”
19 Motong la Yesu iraua torungu kidi nen,
“Kumata tamoto atu yo bet ikere i,
in ikiu di tooltool ki bet man tiye tinepe ye kerenge ki nga,
ngan gelei,
ole tisapa ye kaningi,
too tiap?
Tiap yege!
Ye kene yo tiye tinepe ye in nga,
ngan o ke bet tiyeie so sa yo nen,
ngan tiap.
20 Bong pang dama ni ngan ole di tooltool tikaua tool tani yo bet ikere in le igege di tooltool ki nga,
ngan la bet ye kene tani ngan ole tisapa ye kaningi nga.”
Dada Gurunu Inbe Dada Paunu Ngan Gaongo Tiap
21 Motong la Yesu iseke betanga ki mulu nen.
Iyei ne,
“Tool sa ke bet ikaua mala timunu yo paunu i a idede sousoungu ki yo gurunu in gimono ye tiap.
Kumata bet iyei nen le bet ingasi nga,
ngan mala timunu tani yo paunu i,
in ole irauwat le isarraka sousoungu ki le dook tiap.
22 Inbe tool sa ke bet ipaling ooroo wain surunu yo paunu ngan ilo ye dap gurunu yo tikarata ye asara kulini,
in tiap.
Kumata le bet iyei nen,
inbe ooroo surunu tina ngan isung nga,
ngan ole ipirpala dap tani a imatiti du tana,
le dap pa ye wain tina ngan ole dook tiap.
Bong tiap,
ole ipaling ooroo wain surunu yo paunu ngan ilo ye dap paunu yo tikarata ye asara kulini i.”
Yesu In Iyei Tool Mai Pang Lal Kidi Yuda Ke Sungunu Lapau
23 Ye lal kidi Yuda ke sungunu atu in ngan Yesu iye di galiunu tipa ye dada yo ipa kumu lono ke dingding i.
Le nga ye kene yo titoo dada tani a tila nga,
ngan di galiunu tikap dingding tina ngan puana pattu a bet tikan.
24 Bong ngan di Paresi pattu tikamata di,
le nga tiwete pang Yesu nen,
“Ai,
kumata!
Nga gelei a di galium ngo tiyei dada yo wer kiam Yuda igunkalam bet amyei ye lal ke sungunu tiap nga?”
25-26 Motong la Yesu iraua betanga kidi nen,
“Ang nga kakinkata rau yo igasa so yo Dawiti iyeii ye kene yo Abiata iyei tool kuto mai ke paroranga so pang Maro ye,
in pitiap,
too?
Ye kene tani ngan iye di tooltool ki pitolo di le tisere so yo bet tikani i.
Motong la idewe a ilo rumu ke Maro lono,
lo ikap porong yo tiyei paroranga ye nga.
Ngan porong tina,
ngan di tooltool ke paroranga so leu la bet tikan nga,
bong di tooltool sorok,
ngan tiap.
Bong Dawiti ikap porong tina a ikan,
inbe ikap pang di tooltool ki a tikan lapau.”