Yesu Ikarata Tool Atu Kene Le Bene Ikap Rama Le Dook Mata Mulu
9
Motong la Yesu iyiri lo ookoo pono,
a isaut mulu pang ran koonoo san.
Ngan le la pombe ye malala ki ye taunu.a
2 Ila pombe,
motong di tooltool pattu titokotoko tool atu yo ikap rama le ipas le iken leu moi pono i,
in a timan pang ye.
Yesu ikamata di tooltool tina,
ngan titara lodi medana panga moolmool nga,
le tina iwete pang tool yo ikap rama in nen.
Iyei ne,
“Natuk,
ken lom mede leu.
Sennene kiong,
ngan agir oo.”
3 Ye kene tani in di pannoongoo pattu ke wer ke Maro tilongo yo Yesu iwete nen nga,
le nga di tapdi tiwetewete pang di nen,
“Ona,
tiap!
Tool i nga gelei a iwete betanga nen nga?
Nga o bet ikaua Maro nene,
too?”
4 Tiyei nen ngan Yesu lon galanga ye lodi mukot,
le nga itor di.
Iyei ne,
“Nga gelei bet lomu kap gogo dada dook tiap nen nga?
5 Soo betanga imarra bet aweta i?
Bet awete panga nen,
‘Sennene kiong ngan agir oo,’
too bet awete panga nen,
‘Kumadit a kupa’?
6 Bong au i lok bet ayei nen,
a bet nen ngan ole lomu galanga nen,
Tool Moolmool ke Maro,
in gurana ki mai ye tana i ke bet igiri sennene kidi tooltool.”
Yesu iwete nen a imot,
motong la iwete pang tool yo ikap rama in nen,
“Kumadit,
a kouo moi kiong a kula pang rumu kiong.”
7 Motong la tool tani,
in imadit a ila pang malala ki.
8 Yeiso bet di tooltool malala mai tina ngan tikamata so yo Yesu iyeii i,
ngan le titakrai,
inbe tiyitmaka Maro ene ye yo ikaua gurana ki mai pang di tooltool nga.
Yesu Koonoo Pang Matiu
9 Yesu igege ni tani,
inbe ipa a ila,
ngan ikamata tool atu ke sodaningi patb yo ene Matiuc i,
in iwurur rumu ke sodaningi pat in lono.
Motong la Yesu iwete panga nen,
“Ai,
kuman kutoo au.”
Yo ngan tina le imadit a itoo Yesu.
10 Motong la tinepe a kene san in Matiu ikaua Yesu iye di galiunu pang rumu ki bet lo tikan so.
Ngan le di tooltool alunu ke sodaningi pat,
inbe alunu ke geingi sennene,
ngan di lapau la tilo a tiye Yesu tiwur,
inbe tikan so nga.
11 Yeiso bet di Paresi tikamata di yo tiyei nen nga,
yo ngan le taun titor di galiunu nen,
“Ai!
Nga gelei bet pannoongoo kiang ni iye di tooltool ke sodaningi pat inbe di tooltool ke geingi sennene tigaua a tikan so nga?”
12 Di Paresi tiwete nen,
ngan Yesu ilongo di oo.
Le nga ikatte betanga pang di nen,
“Di tooltool yo tinidi dook mata nga,
ngan tool ke bar ke bet ipa pang ye di tiap,
bong di tooltool la matamatenge ikap di nga.
13 Au i lok bet kala ngan lomu kaua urata dook ye betanga yo Maro iweta a iken ye rau ki i,
in lono ki balai?
Ngan betanga tani in nen,
‘Dada yo lok panga mata i,
in nen,
bet lomu mulumulu ye di tooltool a kayei dada dook mata pang di,
bong ye dada yo ke paroranga so pau,
in tiap.’d
Ngan nanga,
asi nga bet si akiu di tooltool yo noonoodi,
nga tiap,
bong asi bet si akiu di tooltool yo ke sennene nga.”
Tooltool Kapala Titoro Yesu Ye Sapanga Ye Kaningi
14 Motong la Yowan yo irriu di tooltool in di galiunu timan pang ye Yesu a man titoru.
Tiyei ne,
“Ai,
nga gelei bet amye di Paresi nga amsapa ye kaningi so,
e di galium nga tisapa ye kaningi so tiap nga?”
15 Ngan Yesu iraua torungu kidi nen,
“Kumata tamoto atu yo bet ikere i,
in ikiu di sogana le di tooltool ki bet man tiye tinepe ye kerenge ki nga,
ngan gelei,
ole lodi madoko a tisapa ye kaningi,
too tiap?
Tiap yege!
Bong pang dama ni ngan ole di tooltool tikaua tool tani yo bet ikere in le igege di tooltool ki nga,
ngan la bet ole lodi madoko a tisapa ye kaningi nga.”
16 Motong la Yesu iwete pang di mulu nen,
“Tool sa ke bet ikaua mala timunu yo paunu i a idede sousoungu ki yo gurunu in gimono ye tiap.
Kumata bet iyei nen le bet ingasi nga,
ngan mala timunu tani yo paunu i,
in ole irauwat le isarraka sousoungu gurunu tani le dook tiap.
17 Inbe gaongo leu,
di tooltool ke bet tipaling ooroo wain surunu yo paunu,
ngan ilo ye dap gurunu yo tikarata ye asara kulini,
in tiap.
Kumata le bet tiyei nen,
inbe ran medana isung nga,
ngan ole dap gurunu tani putumbe le dap in dook tiap,
inbe ran medana tina ngan imati du tana.
Ngan nanga,
ooroo wain surunu yo paunu nga,
ngan ole tipaling lo ye dap yo paunu nga,
ngan la bet yeru le ru tiken dook nga.”
Yesu Ikarata Garup Yo Iyolo Rara I, Inbe Ipamaditi Garup Kase Yo Imata I
18 Yesu nga iwetewete pang di tooltool tina ngan go,
inbe tool kuto mai ke rumu kidi Yuda ke gaongo in idu le du igun turunu du Yesu kene punu ke dama,
inbe iwete panga nen,
“Atoo,
natuk garup ni dookoot yege imata nga.
Bong lok bet ayong tadi rumu kiau,
a bet nen ngan di kupaloko bem lo pono,
ngan imagur mulu.”
19 Motong la Yesu imadit a iye di galiunu titoo tool kuto mai tani a tiye tidi.
20 Ye kene yo tidi ye in nga,
ngan garup atu yo iyolo rara ye rai sangaul be ru i,
in ipa ke Yesu murini le isulmaia bene la itoko sousoungu matolene ki,
in matana.
21 Ngan garup tani,
in ye taunu lon wetewete nen,
“Kumata le bet atoko sousoungu ki leu nga,
ngan ole tinik dook mata mulu.”
22 Bong Yesu iyetaii le nga iportak ngan ikamata garup tani.
Le iwete panga nen,
“Natuk,
ken lom mede leu.
Lo medana kiong yo kutaru pau i,
in la ikaratong le tinim dook mata mulu i.”
Tina Yesu iwete panga nen nga,
ngan le ye kene tani in tinini dook mata mulu.
23 Motong la Yesu ipa le di pombe ye rumu ke tool kuto mai tani in a ilo lono,
ngan ikamata di tooltool yo timai kure,
inbe di tooltool budanga mai yo titangtang a tipadingi ni nga.
24 Le nga Yesu ipasak pang di.
Iyei ne,
“Ai,
kakoo a kadu tana!
Garup kase in imata tiap,
bong iken mata leu.”
Ngan nen le di tooltool tina tingeleraii ye yo iwete nen nga.
25 Motong la iwete a di tooltool tina ngan di le imot tidu tana,
inbe ilo rumu lono ye ni yo garup kase in iken ye i,
a lo itoko bene,
ngan le imadit a imagur mulu.
26 Ngan nen le bingi ke garup kase tani,
in ipa le ingaua tana mai i le imot.
Yesu Ikarata Di Tooltool Mata Kis Ru Inbe Tool San Yo Men Modo I
27 Motong la Yesu igege malala tani,
inbe ipa mulu nga.
Ngan di tooltool mata kis ru titoo a koodi panga nen,
“Atoo,
Dawiti natunu!
Lom pam a kulonam.”
28 Yesu ipa a ilo rumu lono,
ngan di tooltool mata kis ru tina ngan timan pang ye.
Motong la itor di yeru nen,
“Angru katara lomu medana yau bet ole ayeie urata nen yang angru?”
Ngan yeru tiraua betanga ki nen,
“E,
Tool Mai.”
29 Motong la Yesu itar bene lo yeru matadi,
inbe iyei ne,
“Ye lo medana kiang yo angru kataru pau i,
in la ole so tani in pombe pang yang.”
30 Ngan le di tooltool ru tina ngan matadi rere.
Motong la iwete betanga medana pang di nen,
“Ken angru kapapos pang di tooltool kapala ye so yo pombe pang yang i,
in be.”
31 Bong ngan yeru tipa bet tikaua bingi ye urata yo Yesu iyeii pang di yeru i,
in pang di tooltool ke malala nga le imot ye tana mai tani a tilonga.
32 Ye kene tani,
in di tooltool ru tina ngan tipa a tila,
inbe di tooltool kapala tikaua tool san yo so sidi idiwidiwoo a men modo le iwetewete tiap i,
in a timan pang ye Yesu.
33 Motong la Yesu inganga so sidi ye tool tani in a iwetewete nga.
Ngan tina iyei nen,
le nga di tooltool tina yo tigaua nga,
ngan tikamata le titakrai,
inbe tiyei ne,
“Ona!
Mugu ngan amkamata so sa nen pombe Isrel tiap sa.”
34 Bong ngan di Paresi tiyei ne,
“Tiap!
Tool in inganga di so sidi ye gurana yo tool kuto mai kidi so sidi ikauu panga i.”
Yesu Lono Pang Di Tooltool Malala Mai
35 Motong la Yesu ipa mulu a ila ye malala atu atu nga le imot,
inbe ilo ye rumu kidi Yuda ke gaongo a ipatomonai di,
inbe iwetewete pang di ye bingi dook mata ke dada yo Maro bet matan kala di tooltool ki ye i.
Inbe ikarata di tooltool yo matamatenge matana matana ikap di nga,
ngan le tinidi dook mata mulu.
36 Ngan Yesu ikamata di tooltool malala mai yo man tigaua nga,
ngan lono pang di mai san.
Yesoo,
di ngan moonoo alunu pompombe pang ye di,
inbe di tapdi ke bet tilon di tiap,
le di ngan dawa ben di sipsip yo taukadi taudi yo bet matan kala di nga.
37 Ikamata di nen,
le nga iwete pang di galiunu.
Iyei ne,
“Kaningi alunu kaiye la isullungu a iken kumu ngo,
bong di tooltool ke urata yo bet tikap a tiwinnoko nga,
ngan alunu tiap.
38 Ngan nanga,
ole kapatarau pang Tool Mai yo kumu taunu i,
a bet nen ngan iwanga di tooltool ke urata sa mulu la tikap kaningi kanono a tiwinnoko.”