Jwan' ndli yalke lo men
7
Ti gob,
pla xa' fariseo kon pla xa' nak maestr ndlo' ley xki's Dios,
mbro' xa' yez Jerusalén nde mzin xa' ten' ndo Jesús.
2 Zya mbwi' xa' ke pla xin' te'd Jesús nanxobyekta xa' ley chan' men Israel,
tata na'ntachta xa' ya xa' ncha xa',
jwan' na nak yalke mke' xa' yek xin' te'd Jesús.
3 Tak re xa' fariseo nde reta men Israel,
nxobyek toz xa' mod jwan' mtan' re xa' gox jwan' mbre pola,
ke ndablo yach ya' xa' sa yan' nambi xa' lo Dios tak tez na'yachta ya' xa',
natoyalta wa xa'.
4 Noga sen' mbere xa' ngwa xa' lo xbi',
nerla yach ya' xa' sa toyal wa xa'.
Nde nar toz xa'ga re jwan' nkenap xa' lo mod gox,
xa nak yach re xi nchu' xa' nit,
yach ré nde re yet yib jwan' ndli sin' xa' axta re ya ndyob xa' ncha xa',
yacha.
5 Jwan' nasa re xa' fariseo nde re xa' jwan' nak maestr ndlo' ley xki's Dios,
mnabdi's xa' lo Jesús nde nchab xa':
—¿Cho kwan ndliy re xin' te'd la nanad xa' sen' lo wa xa',
nanxobyekta xa' re mod jwan' mtan' re xa' gox mbre pola?
6 Jesús nchab lo xa':
—Go' nak tib ned men kwin',
gal'ka nchab xki's Dios di's mke' Isaías xa' jwan' mbye'd ta' xki's Dios pola,a
nchab ba:
Yez re' ben'ta di's
ro xa' nxobyek xa' na,
per lazo' xa' tij ndoy lon.
7 Nde ben'ta nale nxobyek
xa' na,
tak re jwan' ndlo' xa',
naka
chan' men lo izyo re'.b
8 Nde go',
mbla' go' reta yalnyebe' chan' Dios,
naya le' go' ndyonke xis re mod gox jwan' mtan' re men gox pola,
xa nak yach yet ré nde yach re xi jwan' nchu' go' nit nde masra' re jwan' ndli go'.
9 Noga nchab Jesús:
Go',
tiptane mblotal go' re yalnyebe' chan' Dios nde mdonke go' xis re mod gox.
10 Tak Moisés nchab:
“Bxobyek xud la nde xna'a;”c
nde le' “Men jwan' ni di's xin xis xud na' o xis xnan',
ndablo gaj xa'.”d
11 Nde le' go' mbez,
toyal gab men lo xud men o lo xna' men:
“Nalit na gan tan jwan' nchola's la tak re jwan' ngenon naka,
korbán.”
(Di's re' nak,
“ya mbroxa'la nay par Dios”.)
12 Nde kon di's yata gab xa',
ya natoyalta ta xa' jwan' nakin' xud xa' o xna' xa'.
13 Tamod ngotal go' re yalnyebe' chan' Dios,
ndyonke go' xis re mod gox jwan' nden go'.
Nde nar toz jwan' tamod ndli go'.
14 Zyasa mbrez Jesús reta men nzi tya nde nchab Jesús lo xa':
—Reta go' pke'nza jwan' re' nde byen go'y.
15 Reta jwan' ncha men nanakte yalke;
per re xgab narax nde di's narax jwan' ndryo' len' lazo' men,
jwan' na nak yalke lo men.
16 ¡Tez nzo go' ndob nzan' par gona,
bin go'y!
17 Sen' mbro' Jesús xij reta mena zya ngote Xa' len' yo.
Nde le' re xin' te'd Xa' mnabdi's lo Xa' nyen' xamod nak kwent nabix jwan' mdej Xa' ya.
18 Zya nchab Jesús lo xa':
—¿Cho noga go' nangyentay?
¿Cho nanyed go' ke reta jwan' ncha men nday len' men,
jwan' nasa nanakte yalke lo men,
19 tak nandlyade len' lazo' men,
le'y nda len' men nde tya ndryo'tey ti gob?
Jwan' re' mdej Jesús,
nchab Xa' ke reta jwan' ncha men nanakte yalke lo men.
20 Noga nchab Jesús:
—Per reta xgab narax nde di's narax jwan' ndryo' len' lazo' men,
jwan' na nak yalke lo men.
21 Tak len' lazo' men nchal reta xgab narax,
xa nak,
re xa' ndob sal' na',
nchakno xa' tedib men,
o re xa' tib nchakno xaxa'la men nde re xa' nguj men,
22 o,
yalwan',
yaltabla's,
yalxinla's,
yalkwin',
yalndyonke men xis re jwan' lo izyo re',
nayi' xa' nye xa' tib chan' ta xa',
yaltodi'syix,
yalbxal' nde yalneyek.
23 Reta yalnarax re' ndryo'y len' lazo' men nde reta jwan' re' naka yalke lo men.
Tib ngol nanakta men Israel, mblipa lazo' xa' Jesús
24 Zya mbro' Jesús lo xyon Galilea nde nda xa' lo xyon yez Tiro nde Sidón.
Sen' lo mzin xa' tya,
mbyan' xa' ten' ndob tib yo,
tak nancholasta xa' ke nek tib men nye ke mzin xa',
per ya nandlid xa' gan.
25 Tak zyaga tib ngol mbin xa' ke mzin Jesús nde mbye'd xa' lo Jesús tak ngeno xa' tib mza' xin' xa',
nzo mbi narax lazon' nde mdoxub ngol lo ni Jesús.
26 Ngol re' nanakta xa' men Israel,
le' xa' nak men xyon Sirofenicia.
Nde mnab ngol lo Jesús kote Xa' mbi narax nzo lazo' xin' ngol.
27 Le' Jesús nchab lo ngol:
—Bta' di's nerla wa re mdyen',
tak nawenta kib men jwan' ndob yar nde ta' mena lo mbak.
28 Le' ngol mkab:
—Taga naka Xa' Nyebe';
mnea noga re mbaka nchote ma' xan' mes nde ncha ma' re kos jwan' nchab lo ya' mdyen'.
29 Le' Jesús nchab:
—Gal' toz mkab la,
bya liz la,
le' mbi narax seba mbro'tele lazo' xin' la.
30 Nde sen' lo mzin ngol yo,
mbwi' ngol xe nax mza' lo lon',
le' mbi narax seba mbro'lay lazo' mza'.
Jesús mtodan' tib xa' nkaron' nde nkwe'
31 Jesús ngo xa' ned,
mbro' Xa' lo xyon xa' yez Tiro,
mbrid xa' yez Sidón nde nda xa' ro nitto' ndole Galilea,
tya mbrid xa' lo xyon Decápolis.
32 Zyasa pla men nzo tya mzin no xa' tib mbi' nkaron' nde nkwe',
lo Jesús.
Nde mnab xa' sa xob Jesús ya' Jesús yek mbi' ta nayiza,
sa dyan' xa'.
33 Zyasa xa'ta mbe' Jesús mbi' ya tib lad nde tya mblo Jesús kwenya' Xa' rop len' nza mbi' nde kon lud xit suk Xa' mdob Xa'y lo loz mbi'.
34 Zya mbwi' Jesús lo be' nde mdi' lazo' Xa',
nchab Xa':
—¡Efata!
(Di's re' nak:
¡Bxyal'!)
35 Zyaga mxyal' nza men yiza nde mxyal' ro xa' nde mdobte nawe mdodi's xa'.
36 Zyasa mnabe' Jesús lo re men,
nchab Jesús:
—Ngenta kwan gab go' lo masra' men jwan' mblin.
Per sen' lo mnab toz Jesús lo re men,
masra' mda' xa' kwent.
37 Nde reta men jwan' mbina,
nzoyen toz xa' nde nchab xa':
—¡Wen toz ndli Xa' reta jwan'!
Ndli Xa' nxyal' nza men nkwe' nde ndli Xa' ndyodi's re men jwan' na'akta todi's.e