—¿Plo ngwa te'd Xa' re'?

¿Plo ngwa xi' Xa' yalnchak nde re yalnaro jwan' ndli Xa'?

3 ¿Cho nanakta Xa' re' ta ntoxkwa' re ya ya'?

Xna' Xa' nak Mary nde wes Xa' nak Kob,

José,

Judas nde Simón nde nzolon' re btan' Xa',

men tre' nak Xa'.

Nde ya nandlid lazo' xa' Jesús.

4 Le' Jesús nchab lo re men:

—Tib xa' jwan' nda' xki's Dios,

^a plo ten' nak laz xa',

nanxobyekta men xa',

nek re ta xa' nde neka men liz xa'.

5 Nde ya nandlid Jesús gan ndli Xa' re yalnaro tya tak na'ndlid lazo' xa' Jesús,

ben'ta plata men nayiz mxob ya' Jesús yek na' nde mbyak xa'.

6 Nde mbli toz Jesús xgab tak re men laz Xa' nandlid lazo' men Xa'.

Zya mketelo' Xa' xki's Dios,

re yez bix jwan' nzi gax dib tya.

7 Ngolo jwan' na,

zyasa mbrez Jesús re tib sen xin' te'd Xa' nde mda' Jesús yalnyebe' lo xa' par kote xa' re mbi narax jwan' nzo lazo' men nde mbloned Jesús chop chopa xa'.

8 Nchab Jesús lo xa':

—Nek tib jwan' nawed go' par ned,

nawed go' yex,

nek jwan' wa go',

neka tmi,

ben'ta tib yaga jwan' nata bxen go',

9 be' go' yalyid go' nde ben'ta lar nokta go' we go'.

10 Nde one cho liz men sin go',

tyata byan' go' axta kebe' ryo' go' yez ya.

11 Nde tez nzo yez nakabta xa' lo go' nde natonzad xa' kwent ta' go',

bro'te go' tya nde bsib go' yothi' ni go',

tamod sa nye re men jwan' nzi tya ke nde tib wiz Dios toti xa'.

Nipa na lo go' sen' sin wiz jwan' nyab Dios kwent lo reta men,

mas bro pen nye re men yez ta nankabta lo go' ya,

ke re men yez Sodoma nde Gomorra.

12 Zyasa mbro' xa' nda xa',

tolo mdej xa' xki's Dios lo re men ke la' men re jwan' narax nak men.

13 Nde jwan' toz mblo'te xa' re mbi narax nzo lazo' men nde mda'b xa' aceit yek re men nayiz nde mtoyak Xa' men.

14 Dib nax mxyob xki's Jesús,

re jwan' wen ndli Xa',

axta rey Herodes xa' nyebe' lo xyon Galilea,

mbin xa'y nde nchab xa':

—Juan Bautist mbroxban xij re men nguj,

xa' ya ta nak Jesús,

jwan' nasa nchak ndli xa' reta yalnaro.

15 Pla men nchab:

—Le' Jesús nak Elías.^b

Nde tipla xa' nchab:

—Nak xa' tib xa' jwan' nde ta' xki's Dios xaja re xa' jwan' mbye'd ta' xki's Dios pola.^c

16 Sen' lo mbin Herodes ta mbez reta men,

Herodes nchab:

—Xa' ya nak Juan,

xa' jwan' mnabe'n mbyib yek na' nde naya mbroxban xa'.

17 Tak zya miska Herodes mtel' men mxen Juan nde mkedo' xa' Juan len' liz yib kon kaden,

xke chan' Herodías ngol Blib,

wes Herodes,

tak Herodes mdobno ngol.

18 Tak Juan mdejla lo Herodes:

—Nandabloda tyob noa ngol wes la.

19 Jwan' nasa mbyi'no toz Herodías Juan nde nchola's ngol kuj ngol xa',

per tera li ngol gan,

20 tak Herodes mzyeb xa' Juan,

mne xa' ke gal' mdo Juan lo Dios nde nambi mgete xa',

jwan' nasa tibla ndla Herodes Juan;

nde sen' lo nda' Juan kwent lo Herodes mtonza xa'y nde ya namned xa' kwan ndli xa' zya.

21 Per mzin tib wiz wen lo Herodías par zyal xa' mod gaj Juan,

wiz ya ngoxob lin' Herodes nde mkeno xa' tib yalwa liz xa'.

Mbrez xa' re ta nak sin' xa',

re xa' jwan' nyebe' lo re sondad nde re xa' jwan' nak xa' ro lo xyon Galilea,

22 tya mzin mza' xin' Herodías,

mdobte mkani mza' lo re xa' nzi tya nde mbro' toz lazo' Herodes kon re xa' nzi ro mes mod mkani mza'.

Zyasa nchab Herodes lo mza':

—Mnab jwan' nchola's la lon,

na tay kaa.

23 Nde Dios ndo wi',

reta jwan' nyab la lon taney kaa,

tez nchola's la rol jwan' ngenon taney.

24 Zyasa mbro'te mza' nde nchab mza' lo xna' mza':

—¿Cho kwan nyab na?

Le' xna' mza' nchab:

—Mnab ngud yek Juan Bautist.

25 Zyaga naban toz mbere mza' lo Herodes nde nchab mza':

—Ncholas na naya ta'a ngud yek Juan Bautist kan,

yedno lay tib lo yen.

26 Le' Rey Herodes nabil toz ngo lazo' xa';

per ma nzi wi' re men jwan' nzi ro mes sen' lo mke'yek rey ta' xa' jwan' lo mza',

jwan' nasa ya na'nkabrot xa'.

27 Nde zyaga mnabe' rey lo tib sondad,

sa ya kib xa' ngud yek Juan nde yedno xa'y.

28 Le' sondad ngwa xa' len' liz yib,

mkib xa' ngud yek Juan,

mdob xa'y tib lo yen nde mdaya' xa'y lo mza',

le' mza' mda'y lo xna' mza'.

29 Sen' lo mbin re xin' te'd Juan ke nguj Juan,

zyasa ngwa xi' xa' thabol nde mka's xa' xa'.

30 Lo mbere re tib sen xin' te'd xa',

reta xa' mdyop lo Jesús nde mda' xa' reta kwent jwan' ngwa li xa' nde re jwan' ngwa lo' xa'.

31 Le' xaja ndosin men lo Jesús taja ndoyo xa' ned,

ya natad men di's wa xa'.

Zyasa nchab Jesús lo re xin' te'd xa':

—Ya' go' ndan' tib plo ten' na'ngenta men,

sa toyal ryoxkwen na' lud.

32 Zya mxen xa' tib bark nde ben'ta le' xa' nda tib plo ten' na'ngenta men.

33 Bro toz men mne nda Jesús nde mblibe' men plo nda xa';

zyasa bro toz men jwan' nzo re yez gax nzi tya,

nda ni xa' nde nerla xa' mzin.

Sen' lo ngotu Jesús kon re xin' te'd xa',

34 mbla xa' lo bark nde mbwi' xa' men toz nzila tya.

Zyasa mblat lazo' Jesús,

mbwi' Xa' lo re men ya,

tak xaja nak re mbakxil' jwan' na'ngenta cho men kenapa nak xa' nde tolo mdote'd Jesús re xa',

mblo' Jesús nar toz jwan'.

35 Sen' nda wiz,

re xin' te'd Jesús mbike xa' gax nde nchab xa' lo Jesús:

—Ya bzyela nde nek tib liz men na'ngenta nche'.

36 Bcha's reta men,

sa ya ka xa' jwan' wa xa' re yez jwan' nzi gax nche' nde re ranch,

tak nche' ngenta jwan' wa xa'.

37 Jesús mkab lo xa':

—Go' bta' jwan' wa men.

Le' xa' nchab:

—¿Plo ya xi' ná' tmi tyu' jwan' wa reta men re'?

Tenye chop ayo' wiz ke tib men sin' nagalta tmi ya.^d

38 Jesús nchab lo xa':

—Wa twi' go' nyen' pla pan ngeno go'.

Zyasa ngwa twi' xa' nde nchab xa':

—Ben'ta gay' pan nde chop mbel ngosal ná'.

39 Zyasa mnabe' Jesús lo xa' kweksa' xa' re men lo yix naye nzi tya.

40 Nde mbreza' xa',

ayo' por ayo' xa' nde cho'psi' por cho'psi' xa'.

41 Zya mxen Jesús re gay' pan kon rop mbel nde mbwi' Xa' lo be',

mda' Xa' dyux lo Dios.

Nde mda' Xa' pan lo re xin' te'd Xa' sa ya thid xa'y lo reta men nde taga mdid Xa' mbel.

42 Nde reta men mda axta mze len' xa'.

43 Zyasa mthop xa' tib sen chokwid pan nde mbel jwan' mbroxob.

44 Lo reta xa' jwan' mda mer mdyopbe tib gay' mil mbi'.

45 Sen' ngolo mda reta men,

Jesús nchab lo re xin' te'd xa':

—Wap go' lo bark nde ya'te go',

par sin go' yez Betsaida tib lad ro nit.

Le' Jesús,

xa ndo yo men ned taja ndotodi'sno Jesús xa'.

46 Sen' lo mbre reta men ndya,

Jesús mxen ned ngwa todi'sno Xa' Dios tib yek yi'.

47 Lo ndakowla izyo,

le' bark jwan' nzo re xin' te'd Xa' ya ndale rol nitto' nde le' Jesús ben' ndo ro nit.

48 Tya ndo Jesús mbwi' Xa' axta ten' nda re xin' te'd Xa' taja ne ndano xa' bark tak mbi toz nzob lo nit nde natade di's tye bark,

sen' lo tera tuxni,

Jesús nde ni lo nitto' nde ndorid Xa' gax ten' nda bark.

49 Per re xa' nzo lo bark mbwi' xa' nde ni Jesús lo nitto' zyasa mzyeb toz xa' nde taja mbrez xa',

tak mbli xa' xgab naka jwan' bet.

50 Tak reta xa' mbwi' ndarid Jesús nde mzyeb toz xa'.

Le' Jesús zyaga mni Xa' nde nchab Xa':

—Blo ne lazo' go',

nay,

na'zyepta go'.

51 Zyasa ngwap Jesús lo bark nde zyaga ngotab mbi,

anta nzoyen reta xa' axta nate' lazo' xa'.

52 Tak tera yen xa' yalnaro jwan' mbli Jesús kon re pan,

ne yek xa' jwan' nasa na'ngyenta xa'.

53 Sen' lo mne mbrid xa' lo nitto',

mzin xa' ten' nak lo xyon Genesaret,

tya mkedo' xa' bark ro nit.

54 Laj ndola xa' lo bark,

zyaga reta men nzi tya mbyolo xa' Jesús.

55 Nde mcha's xa' di's lo ta xa' dib nax tya nde reta lad mdobte mbro' men,

ndeno xa' re men nayiz lo Jesús,

nge xa' lo ya lon',

nzin xa' axta ten' nchon xa' ndo Jesús.

56 Nde one ploja nda Jesús,

re yez ro,

re yez bix nde re ranch,

reta men taja ngote xa' re men nayiz,

mbek xa' re mena ro ned nde mnab xa' ta' Jesús di's ta'a ben' gal re men yiza lad xab Jesús sa dyan' xa'.

Nde reta men yiz jwan' mbwal lad xab Jesús mbyak xa'.