147
¡Le güe láꞌana Xránadxu Dios laweꞌ da naca chaweꞌgúl-ladxu da güe láꞌanadxu Dios chee̱dxu,
laweꞌ da xrtante̱ naca güe láꞌanadxu Le̱ꞌ!
2 Xránadxu Dios xexune̱ꞌ xe̱zre Jerusalén.
Xequé̱ꞌe̱ benneꞌ Israel caꞌ zaj zue̱ꞌ xe̱zr la xu zituꞌ caꞌ.
3 Dxexune̱ꞌ benneꞌ caꞌ dxelexewíꞌine lázrele̱ꞌe̱,
ne dxudé̱ꞌe̱ ladxeꞌ naga zaj naca we̱ꞌ chee̱ benneꞌ caꞌ.
4 ¡Nézquezne̱ꞌ ca zaj naxán belaj caꞌ!
¡Tu tu belaj caꞌ dxuꞌe̱ la na!
5 ¡Szrente̱ naca Xránadxu Dios, ne nape̱ꞌ dute̱ xel-laꞌ waca!
¡Quebe bi de̱ da quebe dxéajniꞌine̱ꞌ!
6 Xránadxu Dios dxácale̱ne̱ꞌ benneꞌ dxexruj lazreꞌ caꞌ,
naꞌ dxuzéxruje̱ꞌ benneꞌ caꞌ dxelune̱ꞌ da cale̱la.
7 ¡Le gul-la da güe láꞌanale Xránadxu Dios!
¡Le gul-la, ne le quinne da cun zríadiꞌi na du lau Dios chee̱dxu!
8 ¡Le̱ꞌ dxudé̱ꞌe̱ beuj caꞌ zran xabáa!
¡Le̱ꞌ dxesel-le̱ꞌ nisa xiuj lu xe̱zr la xu!
¡Le̱ꞌ dxune̱ꞌ dxelezría xíxreꞌdu caꞌ lu xiꞌa caꞌ!
9 ¡Le̱ꞌ dxunézruje̱ꞌ da dxelagu be̱ xixreꞌ caꞌ!
¡Dxunézruje̱ꞌ da dxelagu béchajdu caꞌ, be̱ dxelebezre xaꞌabaꞌ!
10 Da dxezaca ba lázrele̱ne̱ꞌ quebe naca na xel-laꞌ wal-la
chee̱ bzrinaꞌ caꞌ,
ne quegá xel-laꞌ wal-la chee̱ bénneache.
11 Dxezaca ba lázrele̱ne̱ꞌ benneꞌ caꞌ dxelezrebe̱ꞌ Le̱ꞌ,
ne benneꞌ caꞌ dxelebeza lazre̱ꞌ Le̱ꞌ chee̱ xexache lazre̱ꞌ le̱ꞌ.
12 ¡Le güe láꞌana Xránadxu Dios, leꞌe zrale xe̱zre Jerusalén!
¡Le güe láꞌana Dios chee̱le, leꞌe zrale xe̱zre Sión!
13 ¡Le̱ꞌ dxuzúa chúchue̱ꞌ dxa xuꞌu chee̱ xe̱zre chee̱le!
¡Dxune̱ꞌ dxaca chaweꞌ chee̱ benneꞌ caꞌ zaj zre̱ꞌe̱ xe̱zre chee̱le!
14 ¡Dxebeque̱ꞌ xel-laꞌ dxebeza zri lazreꞌ lu xe̱zr la xu chee̱le!
¡Gúnnale̱ꞌe̱ chee̱le zruaꞌ chaweꞌ!
15 ¡Dxusel-le̱ꞌ xrtizre̱ꞌ chee̱ benneꞌ caꞌ zaj zre̱ꞌe̱ dute̱ xe̱zr la xu,
naꞌ chadí dxaca ca da dxenné̱ꞌ!
16 ¡Dxugacue̱ꞌ xe̱zr la xu bezxeꞌ da naca na ca zrilaꞌ!
¡Dxuzéxruje̱ꞌ xrle̱ꞌe̱la dxe̱la ca de!
17 ¡Dxune̱ꞌ dxelexruj xiaj bezxeꞌ ca weaj xíajdu caꞌ!
¿Nu benneꞌ gaca guchaga lawe̱ꞌ da zaga chee̱ na?
18 ¡Dxenná beꞌe̱, naꞌ dxexuna na!
¡Dxune̱ꞌ dxaca beꞌ, naꞌ dxexaca bezxeꞌ naꞌ nisa gubaꞌu!
19 ¡Bzéajniꞌine̱ꞌ Jacob ca naca xrtizre̱ꞌ, ne bdee̱ꞌ xrba chee̱ꞌ,
ne da caꞌ gunná beꞌe̱ lu naꞌ benneꞌ Israel caꞌ!
20 Quebe ne gune̱ꞌ caní chee̱ xe̱zr la xu xezícadxa caꞌ,
naꞌ benneꞌ xe̱zr la xu caꞌ quebe dxelexúnbeꞌe̱ xrba chee̱ꞌ.
¡Gaca ba láꞌazxa Xránadxu Dios!