136
¡Le güe láꞌana Xránadxu Dios, Benneꞌ xrlátaje!¡Chadía chacanna dxexache lazre̱ꞌ dxiꞌu!
2 ¡Le güe láꞌana Dios, naque̱ꞌ szrénte̱dxa ca zaj naca dios
chee̱ xe̱zr la xu caꞌ!
¡Chadía chacanna dxexache lazre̱ꞌ dxiꞌu!
3 ¡Le güe láꞌana Xránadxu, naque̱ꞌ szrénte̱dxa ca zaj naca
xrana xe̱zr la xu caꞌ!
¡Chadía chacanna dxexache lazre̱ꞌ dxiꞌu!
4 ¡Le güe láꞌana Dios naꞌ, dxune̱ꞌ xel-laꞌ waca zriꞌa caꞌ!
¡Chadía chacanna dxexache lazre̱ꞌ dxiꞌu!
5 ¡Le güe láꞌana Dios naꞌ, be̱ne̱ꞌ xabáa dute̱ xel-laꞌ sina chee̱ꞌ!
¡Chadía chacanna dxexache lazre̱ꞌ dxiꞌu!
6 ¡Le güe láꞌana Dios naꞌ, bzue̱ꞌ xe̱zr la xu laweꞌ nísadauꞌ!
¡Chadía chacanna dxexache lazre̱ꞌ dxiꞌu!
7 ¡Le güe láꞌana Dios naꞌ, be̱ne̱ꞌ gubizra ne beuꞌ!
¡Chadía chacanna dxexache lazre̱ꞌ dxiꞌu!
8 ¡Be̱ne̱ꞌ gubizra chee̱ gusení na te zra!
¡Chadía chacanna dxexache lazre̱ꞌ dxiꞌu!
9 ¡Be̱ne̱ꞌ beuꞌ ne belaj caꞌ chee̱ xulusení na chizrela!
¡Chadía chacanna dxexache lazre̱ꞌ dxiꞌu!
10 ¡Le güe láꞌana Dios naꞌ, be̱tie̱ꞌ bi biu nedxu chee̱
benneꞌ Egipto caꞌ!
¡Chadía chacanna dxexache lazre̱ꞌ dxiꞌu!
11 ¡Le güe láꞌana Dios naꞌ, bebéaje̱ꞌ benneꞌ Israel caꞌ
lu xe̱zr la xu Egipto naꞌ!
¡Chadía chacanna dxexache lazre̱ꞌ dxiꞌu!
12 ¡Beche̱ꞌe̱ le̱ꞌ dute̱ xel-laꞌ waca zren chee̱ꞌ!
¡Chadía chacanna dxexache lazre̱ꞌ dxiꞌu!
13 ¡Le güe láꞌana Dios naꞌ, be̱ne̱ꞌ chupa laꞌa nísadauꞌ
da nazí le̱ na Xrna!
¡Chadía chacanna dxexache lazre̱ꞌ dxiꞌu!
14 ¡Bdee̱ꞌ benneꞌ Israel caꞌ laduj nísadauꞌ naꞌ!
¡Chadía chacanna dxexache lazre̱ꞌ dxiꞌu!
15 ¡Bgacue̱ꞌ nísadauꞌ naꞌ Faraón, benneꞌ wenná bea chee̱ Egipto,
ne benneꞌ zeje̱ꞌ wedil-la chee̱ꞌ caꞌ!
¡Chadía chacanna dxexache lazre̱ꞌ dxiꞌu!
16 ¡Le güe láꞌana Dios naꞌ, beche̱ꞌe̱ benneꞌ chee̱ꞌ caꞌ
le̱ꞌe̱ xixreꞌ laweꞌ lataj!
¡Chadía chacanna dxexache lazre̱ꞌ dxiꞌu!
17 ¡Le güe láꞌana Dios naꞌ, be̱tie̱ꞌ wenná bea blau caꞌ!
¡Chadía chacanna dxexache lazre̱ꞌ dxiꞌu!
18 ¡Be̱tie̱ꞌ wenná bea wal-la caꞌ!
¡Chadía chacanna dxexache lazre̱ꞌ dxiꞌu!
19 ¡Be̱tie̱ꞌ Sehón, wenná bea chee̱ benneꞌ amorreo caꞌ!
¡Chadía chacanna dxexache lazre̱ꞌ dxiꞌu!
20 ¡Be̱tie̱ꞌ Og, wenná bea chee̱ xe̱zr la xu Basán!
¡Chadía chacanna dxexache lazre̱ꞌ dxiꞌu!
21 ¡Bnézruje̱ꞌ xe̱zr la xu chee̱ benneꞌ caꞌ chee̱ gaca na
chee̱ benneꞌ chee̱ꞌ caꞌ!
¡Chadía chacanna dxexache lazre̱ꞌ dxiꞌu!
22 ¡Be̱nne̱ꞌ na chee̱ benneꞌ Israel caꞌ, benneꞌ we̱n zrin chee̱ꞌ caꞌ!
¡Chadía chacanna dxexache lazre̱ꞌ dxiꞌu!
23 ¡Naque̱ꞌ Dios naꞌ, quebe gul-la lazre̱ꞌ dxiꞌu
gate buluzetja benneꞌ caꞌ dxiꞌu!
¡Chadía chacanna dxexache lazre̱ꞌ dxiꞌu!
24 ¡Le̱ꞌ bselé̱ꞌ dxiꞌu lu naꞌ benneꞌ caꞌ guledíl-lale̱ne̱ꞌ dxiꞌu!
¡Chadía chacanna dxexache lazre̱ꞌ dxiꞌu!
25 ¡Naque̱ꞌ Dios naꞌ, dxugawe̱ꞌ xúgute̱ da zaj naca ban!
¡Chadía chacanna dxexache lazre̱ꞌ dxiꞌu!
26 ¡Le güe láꞌana Dios chee̱ xabáa!
¡Chadía chacanna dxexache lazre̱ꞌ dxiꞌu!