132
Bsa lazreꞌ, Xranaꞌ Dios, ca guca chee̱ David,ne ca guzaca ziꞌe̱,
2 ne ca da guche̱be lazre̱ꞌ gune̱ꞌ chiuꞌ,
da guche̱be lazre̱ꞌ lauꞌ, Dios wal-la chee̱ Jacob.
3 Guné̱ꞌ: “Québequeze chuꞌa xuꞌu lizraꞌ,
ne québequeze gátaꞌa ga dxasiaꞌ
4 ne québequeze guchúdiaꞌ xiaj lawaꞌ
ne québequeze gasiaꞌ
5 ca zrindxa zra ba be̱naꞌ tu xuꞌu lizre Xranaꞌ Dios
naga súaqueze Dios wal-la chee̱ Jacob.”
6 Bénedxu zua xíꞌina láꞌazxa naga xuꞌu xel-laꞌ wezría
lu xe̱zr la xu Efrata,
naꞌ bezréledxu na lu xe̱zr la xu chee̱ bénneaꞌ le̱ꞌ Jaar.
7 Gunnantuꞌ: Chéajntuꞌ naga zua Dios chee̱ntuꞌ.
Guzú zríbentuꞌ zran niꞌa Le̱ꞌ.
8 Guxasa, Xránantuꞌ Dios, nen xíꞌina naga xuꞌu
xel-laꞌ wezría chiuꞌ,
ne gudá lu xiꞌa naga súaquezuꞌ Lueꞌ.
9 Be̱n xelún bxruze chiuꞌ caꞌ da naca xrlátaje,
ne xelebezre xaꞌa xúgute̱ bénneache chiuꞌ, lu dute̱
xel-laꞌ dxelebé chee̱ꞌ.
10 Laweꞌ da nazríꞌinuꞌ David, we̱n zrin chiuꞌ,
quebe guzúꞌ chaláꞌala wenná bea naꞌ ba gucaꞌu Lueꞌ.
11 Da líqueze bzetaj cuina Xránadxu Dios,
guche̱be lazre̱ꞌ chee̱ David quebe gucuase̱ꞌ ca da gunné̱ꞌ.
Gunné̱ꞌ: “Gunaꞌ xelenná bea zriꞌine zre suꞌ naga
dxenná béaquezuꞌ Lueꞌ.
12 Che zriꞌinuꞌ caꞌ tu xelúnzqueze̱ꞌ ca naca xel-laꞌ wezría chiaꞌ,
ne ca naca xrtizraꞌ da gusé̱dedaꞌ le̱ꞌ,
zriꞌinuꞌ caꞌ tu xelenná béazqueze̱ꞌ naga dxenná beꞌu lueꞌ.”
13 Laweꞌ da gucáꞌa Xránadxu Dios xe̱zre Sión,
guca lazre̱ꞌ sua xuꞌu lízrequeze̱ꞌ ga naꞌ.
14 Gunné̱ꞌ: “Tu gácazqueze lataj nigá naga súaquezaꞌ nedaꞌ.
Tu súazquezaꞌ nigá laweꞌ da caní dxezaca ba lazraꞌ gunaꞌ.
15 Gunaꞌ gátaꞌle̱ꞌe̱ lina chee̱ benneꞌ caꞌ,
ne gunaꞌ xelelaj benneꞌ xacheꞌ caꞌ xeta.
16 Gunaꞌ xelún bxruze chiaꞌ caꞌ da naca chaweꞌ,
naꞌ xelebezre xaꞌa xúgute̱ bénneache chiaꞌ lu dute̱
xel-laꞌ dxelebé chee̱ꞌ.
17 Lataj naꞌ gunaꞌ xexaca xel-laꞌ dxenná bea chee̱ David.
Gunaꞌ xelezúa naꞌ zriꞌine zre sua wenná bea naꞌ
ba gucáꞌa nedaꞌ.
18 Gunaꞌ xeleque zréaje benneꞌ guledábague̱ꞌ Le̱ꞌ,
naꞌ gunaꞌ chepe ban xel-laꞌ dxenná bea chee̱ David naꞌ.”