99
Naca Xránadxu Dios Benneꞌ Wenná Bea,naꞌ dxelezrize xúgute̱ bénneache lau Le̱ꞌ.
Dxeꞌe̱ lataj blau chee̱ꞌ da zua na láwela querubín caꞌ,
naꞌ dxezrúꞌ lu xe̱zr la xu.
2 Szrente̱ naca Xránadxu lu xiꞌa Sión.
Naque̱ꞌ szren laweꞌ xúgute̱ cueꞌ xe̱zr la xu caꞌ.
3 Le güe láꞌana La Xránadxu da naca na szren,
ne da dxal-laꞌ zrébedxu.
¡Láꞌazxa naca Le̱ꞌ!
4 Lueꞌ, Wenná Bea szrente̱, nazríꞌinuꞌ da naca xrlátaje.
Nuzúa chachuꞌ da naca li lazreꞌ.
Ba nunuꞌ da naca xrlátaje, ne da naca li lazreꞌ
ládujla zriꞌine zre sua Jacob.
5 Le gucáꞌana szren Xránadxu Dios.
Le guzú zríbele lau Le̱ꞌ naga dxeꞌe̱.
¡Láꞌazxa naca Le̱ꞌ!
6 Moisés, ne Aarón gulaque̱ꞌ bxruze chee̱ꞌ caꞌ.
Samuel guque̱ꞌ tu benneꞌ bchálajle̱ne̱ꞌ Le̱ꞌ.
Gulenné̱ꞌ Xránadxu Dios, naꞌ Le̱ꞌ beche̱be̱ꞌ.
7 Tu lu beuj bza bchálajle̱ne̱ꞌ benneꞌ caꞌ.
Buluzúe̱ꞌ dizraꞌ da gunná béꞌene̱ꞌ,
ne da caꞌ bdxixruj beꞌene̱ꞌ le̱ꞌ.
8 Xránantuꞌ Dios, beche̱buꞌ lau benneꞌ caꞌ.
Bléꞌenuꞌ le̱ꞌ nacuꞌ Dios, dxunite lauꞌ chee̱ bénneache,
lácala dxudéuꞌ le̱ꞌ xel-laꞌ ziꞌ ne̱ chee̱ dul-la da zaj nabague̱ꞌ.
9 Le gucáꞌana szren Xránadxu Dios.
Le guzú zríbele lau Le̱ꞌ lu xiꞌa láꞌazxa chee̱ꞌ,
laweꞌ da láꞌazxa naca Xránadxu Dios.