25
Xran, dxenníaꞌ Lueꞌ dute̱ lázrdawaꞌ.2 Dxuxrén lazraꞌ Lueꞌ, Dios chiaꞌ.
Quebe guꞌu lataj xeduéꞌedaꞌ.
Quebe guꞌu lataj benneꞌ dxeledábague̱ꞌ nedaꞌ xuluzétaje̱ꞌ nedaꞌ.
3 Da líqueze, benneꞌ caꞌ dxelebeza lazre̱ꞌ Lueꞌ
quebe xeleque zréajene̱ꞌ.
Xeleduéꞌe benneꞌ caꞌ dxeledábague̱ꞌ xrtizruꞌ.
4 Xran, bleꞌe nedaꞌ da dxaca lazruꞌ gunaꞌ.
Bleꞌe nedaꞌ da dxezaca ba lazruꞌ gunaꞌ.
5 Bse̱de nedaꞌ gunaꞌ ca naca da li chiuꞌ
laweꞌ da nacuꞌ Dios dxuseláuꞌ nedaꞌ.
Tu dxebeza lázrezquezaꞌ Lueꞌ.
6 Bsa lazreꞌ, Xran, gacuꞌ zriꞌi lazreꞌ,
ne xexache lazruꞌ chiaꞌ cáte̱ze da dxúntequezuꞌ.
7 Quebe chajsá lazruꞌ dul-la da be̱naꞌ gate ne nacaꞌ
benneꞌ cuideꞌ, ne ca gudábagaꞌ xrtizruꞌ.
Nen dute̱ xel-laꞌ dxexache lazreꞌ chiuꞌ, bsa lazreꞌ nedaꞌ,
ne nen dute̱ xel-laꞌ zriꞌi lazreꞌ chiuꞌ, Xran.
8 Xrlátaje, ne li lazreꞌ naca Xránadxu Dios.
Chee̱ le̱ naꞌ gusé̱dene̱ꞌ benneꞌ dul-la caꞌ da dxal-laꞌ xelune̱ꞌ.
9 Guléꞌene̱ꞌ benneꞌ dxexruj lazreꞌ caꞌ da xrlátaje da xelune̱ꞌ,
ne gusé̱dene̱ꞌ benneꞌ zren lazreꞌ caꞌ da xelune̱ꞌ.
10 Lu xel-laꞌ dxexache lazreꞌ,
ne lu da li dxeché̱ Xránadxu benneꞌ caꞌ dxelune̱ꞌ
ca naca xel-laꞌ wezría chee̱ꞌ, ne ca da dxuse̱de Le̱ꞌ.
11 Laweꞌ da dxunuꞌ ca da ba gunníuꞌ, Xran,
gunite lauꞌ ca naca dul-la nunaꞌ, da naca na zren.
12 ¿Nu benneꞌ dxezrebe̱ꞌ Xránadxu Dios?
Le̱ꞌ gusé̱dene̱ꞌ benneꞌ nigá da dxal-laꞌ gune̱ꞌ.
13 Gaca chee̱ꞌ tu da ba neza zrente̱,
naꞌ zriꞌine zre sue̱ꞌ gaca chee̱beꞌ xe̱zr la xu.
14 Xránadxu Dios naque̱ꞌ tuze nen benneꞌ caꞌ dxelezrebe̱ꞌ Le̱ꞌ,
naꞌ gune̱ꞌ xelúnbeꞌe̱ xel-laꞌ wezría chee̱ꞌ.
15 Tu dxennázquezaꞌ Xránadxu Dios
laweꞌ da guselé̱ꞌ nedaꞌ lu naꞌ benneꞌ caꞌ dxelaca lazre̱ꞌ xele̱l-le̱ꞌ nedaꞌ.
16 Gunnáꞌ nedaꞌ, ne bexache lazreꞌ nedaꞌ
laweꞌ da zuaꞌ tuzaꞌ, ne dxezaca ziꞌa.
17 Naxánle̱ꞌe̱ da ste̱be da zaj zua lázrdawaꞌ.
Bselá nedaꞌ lu da ste̱be zuaꞌ.
18 Gunnáꞌ ca dxezaca ziꞌa, ne ca dxunle̱ꞌa zrin,
naꞌ bnite lau xúgute̱ dul-la da nabagaꞌ.
19 Gunnáꞌ benneꞌ caꞌ dxeledábague̱ꞌ nedaꞌ ca naxánle̱ꞌe̱ne̱ꞌ,
ne ca dxelecuídele̱ꞌe̱ne̱ꞌ nedaꞌ.
20 Bxue bénneꞌdu xuꞌa, ne bselá nedaꞌ.
Quebe guꞌu lataj xeduéꞌedaꞌ laweꞌ da dxuxrén lazraꞌ Lueꞌ.
21 Zaj nuxru da xrlátaje, ne xel-laꞌ li lazreꞌ nedaꞌ
laweꞌ da dxebeza lazraꞌ Lueꞌ.
22 Dios, bselá benneꞌ Israel caꞌ
lu xúgute̱ da dxelezaca ziꞌe̱.