7
Xranaꞌ Dios, dxuxrén lazraꞌ Lueꞌ.Gúcale̱ nedaꞌ ne bselá nedaꞌ lu naꞌ benneꞌ caꞌ dxulusaca ziꞌe̱
nedaꞌ,
2 chee̱ quebe xele̱l-le̱ꞌ nedaꞌ ca dxun be̱zre xixreꞌ,
naꞌ xuluzúzruje̱ꞌ nedaꞌ naga quebe nu chiláꞌ nu guselá nedaꞌ.
3 Xranaꞌ Dios, che be̱naꞌ nedaꞌ caní:
Che bi da zrinnaj be̱n niꞌa naꞌa.
4 Che bi da cale̱la be̱naꞌ chee̱ benneꞌ zue̱ꞌ chaweꞌ nen nedaꞌ.
(Bseláꞌ bénneaꞌ dxedábague̱ꞌ nedaꞌ lácala quebe bi nunaꞌ chee̱ꞌ.)
5 Che caní be̱naꞌ,
be̱ lataj benneꞌ dxedábague̱ꞌ nedaꞌ gau ziꞌ ne xezrúnene̱ꞌ nedaꞌ.
Be̱ lataj bénneaꞌ guchuchu guléaje̱ꞌ nedaꞌ lu xu,
ne xusunitie̱ꞌ xel-laꞌ ba láꞌana chiaꞌ.
6 Xran, dute̱ xel-laꞌ dxezráꞌa chiuꞌ, guzé̱.
Bexechaj benneꞌ caꞌ dxulusaca ziꞌe̱ nedaꞌ lu xel-laꞌ dxelezráꞌa chee̱ꞌ.
Gusel-la da gácale̱ na nedaꞌ gate guchiꞌu da dxaca chiaꞌ
ca da gunná beꞌu.
7 Xúgute̱ benneꞌ zaj zre̱ꞌe̱ xe̱zr la xu xelezrague̱ꞌ lauꞌ.
Gunná beꞌe benneꞌ caꞌ dute̱ xel-laꞌ szren chiuꞌ.
8 Lueꞌ, Xran, guchiꞌu chee̱ benneꞌ xúgute̱ xe̱zre.
Bchiꞌa ca da nunaꞌ lu da naca xrlátaje,
ne lu da naca du lazreꞌ chiaꞌ.
9 Be̱n cheajsé̱ naze da zrinnaj da dxelún benneꞌ we̱n da cale̱la caꞌ,
san bzua chaweꞌ benneꞌ xrlátaje,
laweꞌ da nacuꞌ xrlátaje, Dios, ne dxennáꞌu da xuꞌu
xichaj lázrdau bénneache.
10 Diósqueze dxucuꞌuje̱ꞌ nedaꞌ.
Dxuselé̱ꞌ benneꞌ zaj naque̱ꞌ du lazreꞌ.
11 Xlátaje̱ dxuchiꞌa Dios chee̱ da dxelún bénneache.
Tu dxezráꞌazqueze Dios da dxelún benneꞌ we̱n da zrinnaj caꞌ.
12 Che quebe xelexíaje lazre̱ꞌ Dios gulé̱ꞌ xia chee̱ꞌ.
Ba nuzúa cuásate̱ꞌ xaga nalá xécheꞌze chee̱ꞌ.
13 Ba naxrúa cuásate̱ꞌ xia chee̱ꞌ caꞌ chee̱ wedil-la.
Ba nuzúa cuásate̱ꞌ xaga nalá xécheꞌze da dxelala.
14 Benneꞌ we̱n da zrinnaj dxugúꞌu lazre̱ꞌ ca da cale̱la gune̱ꞌ.
Xuꞌu lázrdawe̱ꞌ da zrinnaj da gune̱ꞌ, naꞌ dxebéajé̱ꞌ da we̱n lazreꞌ.
15 Ba gude̱ne̱ꞌ tu xe̱dxu situj naga cheajlechaze bénneache,
naꞌ lé̱zqueze̱ꞌ xeajcházie̱ꞌ lu xe̱dxu naꞌ.
16 Da zrinnaj da be̱ne̱ꞌ dxebague na lé̱queze̱ꞌ,
naꞌ da bsaque̱ꞌ bénneache xezrizre na xíchaje̱ꞌ.
17 Güe láꞌanaquezaꞌ Xranaꞌ Dios ca da xrlátaje da dxune̱ꞌ,
ne gúl-laquezaꞌ chee̱ La Xranaꞌ Dios, Bénneaꞌ naque̱ꞌ szrente̱.