Ti'ai ãma marĩ iwasété ãma da te 're i'ai'uté za'ra mono zé
5
Ni'wam norĩ hã, Zezusi, Cristua na te te 're isaze za'ra mono hã, ta norĩ hã te 'Re ihâimana u'âsi mono 'ra, 're nomro. Duré ni'wam norĩ hã Wamama te te 're sawi pese za'ra mono wamhã, i'ra norĩ zama te za te te 're azawi pese. 2 Ãne na, wa za wa te 're waihu'u za'ra, 'Re ihâimana u'âsi mono 'ra norĩ, wa te 're isawi pese za'ra mono na hã: 'Re ihâimana u'âsi mono hã wa te 're sawi pese za'ra mono wamhã, duré isimiroti, wa te 're 'madâ'â pese za'ra mono wamhã. 3 E marĩ wa. 'Re ihâimana u'âsi mono, wa te 're sawi pese za'ra mono wamhã, isimiroti zahi hã wa za tô wa te 're 'madâ'â pese za'ra. Isimiroti zahi hã wa te 're i'madâ'â pese za'ra mono da hã, ipire õ di. 4 'Re ihâimana u'âsi mono 'ra, 're inomro mono hã te za te te ãma 're ai'uté za'ra, ti'ai ãma marĩ iwasédé 're ihâimana za'ra mono ãma hã. 'Re ihâimana u'âsi mono si, wa te wasina 're i'umnhasi za'ra mono zéb zarina si wa za wa te ãma 're ai'uté za'ra. 5 E 'wam norĩ hã, ti'ai ãma marĩ iwasédé 're ihâimana za'ra mono ãma, te te 're ai'uté za'ra mono da bâ. Zezusi hã 'Re ihâimana u'âsi mono 'ra na, te te 're isaze za'ra mono norĩ si, te za te te ãma 're ai'uté za'ra.Zezusi hã, 'Re ihâimana u'âsi mono 'ra
6 Zezu Cristu hã, âb na duré tiwapruc na we imorĩ. Â na si wei morĩ õ di. Tiwapru na zama. Tawamhã 'Re ihâimana u'âsi mono Pẽ'ẽzani hã ãhã na tô sena iwasu'u'wa, 'Re ihâimana u'âsi mono Pẽ'ẽzani hã tô sena uptabi wa. 7 Si'ubdatõ iwasu'u'wa hâiba hã: 8 'Re ihâimana u'âsi mono Pẽ'ẽzani duré â duré iwapru. Ã hã si'ubdatõ ihâiba hã, aiwap si isimirowasu'u za'ra hã. 9 Marĩ na tô sena na ti'ai ãma danhimirowasu'u hã, wa za tô wa te ãma 're saze za'ra. Tane nherẽ, 'Re ihâimana u'âsi mono nhimirowasu'u hã danhipai u pire uptabi di, tô taha nhimirowasu'u wa, Ti'ra te te dama 're iwasu'u mono hã. 10 Ni'wa hã 'Re ihâimana u'âsi mono 'ra te te sazei wamhã, taha wasu'u hã te za ipẽ'ẽ 're tãma 're hâimana. Tanei õ di, ni'wa hã te te sazei õ wamhã. 'Re ihâimana u'âsi mono ãma te za isadawa nhipe hã tihi, te te sazei õ wa, 'Re ihâimana u'âsi mono Ti'ra te te 're iwasu'u mono zé hã. 11 Ã hã tô iwasu'u: 'Re ihâimana u'âsi mono hã ma tô dahâimanazé isi'utõrĩ'õ hã wama sõmri za'ra. Tawamhã ã hã dahâimanazé hã te wama 're hâimana za'ra, I'ra ãma 're ihâimana mono hã. 12 'Re ihâimana u'âsi mono 'ra, ni'wai ma hâimana wamhã, dahâimanazé isi'utõrĩ'õ hã te za tãma tihâiba. Tanei õ di, I'ra hã ni'wai ma hâimana õ wamhã, ã hã dahâimanazé hã tãma hâimana õ di za.
Wasiwawãi ãna dahâimanazé isi'utõrĩ'õ hã wama 're ihâimana za'ra mono zé
13 Ãne hã wa aima rob'ui'éré za'ra wa'wa, 'Re ihâimana u'âsi mono 'ra isaze za'ra wa'aba norĩ ma hã, dahâimanazé isi'utõrĩ'õ hã aima ihâimana za'ra wa'aba na waihu'u za'ra wa'aba da. 14 'Re ihâimana u'âsi mono u wa te wasina 're rotété za'ra mono wamhã, wa te 're i'umnhasi za'ra mono zé, ãne: 'Re ihâimana u'âsi mono te te sima 're iwẽ mono zéb zarina, siwa'ru marĩ hã wa te tiwi 're waptẽrẽ za'ra mono wamhã, te za te te wama ãma 're a'uwaimrami. 15 Duré uburé marĩ na wa te tiwi 're irowaptẽrẽ za'ra mono zéb zarina, te te 're iwa'awapari mono na, wa sena na wa te wasina 're waihu'u za'ra. Taha zarina, wa duré wa te 're waihu'u za'ra, za te te wama ãma 're i'a'uwaimrami mono zém na, wa te tiwi 're iwaptẽrẽ za'ra mono zéb zarina, marĩ hã.
16 Ni'wa hã, tisisãnawã tiwasédé dadâ'â u te te 're idanhimroi mono õ, te te i'manharĩ na, te te 'madâ'â wamhã, 'Re ihâimana u'âsi mono ma, te te ãma rowaptẽrẽ. Tawamhã ta hã te za ni'wai ma tisõ dahâimanazé hã, tiwasédé te te i'manharĩ ma hã. Ã hã ni'wa tiwasédé te te 'manharĩ wapsi, za dahâiba te te iwĩrĩ õ na. Tazahã, oto ni'wa dapãrĩ na, tiwasédé te te 'manharĩ wamhã, te ãma nharĩ õ di, tiwasédé te te i'manharĩzém na ãma rowaptẽrẽ aba da hã. 17 Uburé marĩ iwasété 'manharĩ hã, ta hã dawasédé. Tane nherẽ, dawasédé iré hã, dadâ'â u te te 're idanhimroi mono õ hã.
18 Wama waihu'u pese za'ra di, 'Re ihâimana u'âsi mono hã, ãma 're i'ra za'ra mono norĩ, tiwasédé te te 're i'manharĩ u'âsi za'ra mono õ na hã. E marĩ wa. 'Re ihâimana u'âsi mono 'ra hã i'wawi 're simapa za'ra mono wa. Tahawa, Iwasété uptabi hãd te te 're upi waihu'u za'ra mono õ di.
19 Wama waihu'u pese za'ra di, wa norĩ hã 'Re ihâimana u'âsi mono te na hã duré ti'ai ãma siwa'ru 're idahâimana za'ra mono hã, Iwasété uptabi zadawa para 're idahâimana za'ra mono na hã.
20 Wa tô duré waihu'u za'ra ni, 'Re ihâimana u'âsi mono 'ra we imorĩ pari na hã. Ta hã ma tô duré rowaihu hã wama sõmri za'ra, tô sena 'Re ihâimana u'âsi mono 're ihâimana mono hã wa te waihu'u za'ra da. Tahawa, ãhã na hã tô sena 're ihâimana mono siré wa oto wahâimana za'ra ni. I'ra Zezu Cristuhu siré, wa duré 're wahâimana za'ra. Ã hã tô sena 'Re ihâimana u'âsi mono 're ihâimana mono. Duré ã hã, tô sena dahâimanazé isi'utõrĩ'õ zama.
21 Ĩ'ra norĩre, ma'ãpé 're asi'madâ'â pese za'ra wa'aba mono, ihâiba'õ norĩ wi.