— E wa za mo, te a'wapé da, filisteu norĩ hã.

— Tô aimorĩ, a'wapé da filisteu norĩ hã, duré anho'reptu da, 'ri'ahâ Queira ãma, 're idahâimana za'ra mono norĩ hã. — Ãne ma ãma tãma wa'rã, 'Re ihâimana u'âsi mono hã.

3 Tane nherẽ, Davihi te dasi'wapéi 'manharĩ'wa norĩ hã te nharĩ za'ra ãne:

— Ãme Zuda ãma wapahi za'ra di. E niha wa za taha nherẽ, ai'aba'ré ni 'ri'ahâ Queira u hã, dasi'wapéi 'manharĩ'wa filisteu norĩ wa te 'wapé za'ra da hã.

4 Tawamhã Davi, Uburé Danhib'apito hã ma duré isadanharĩ na ãma sahu. Tahawa, ma ãne ãma tãma wa'rã:

— Mo oto aimorĩ Queira u, a'wapé da, za te aima sõmri wa, filisteu norĩ ãma i'ai'uté za'ra zé hã.

5 Tahawa, ma tô Davi hã tite dasi'wapéi 'manharĩ'wa norĩ me ai'aba'ré Queira u hã. Tahawa, ma tô oto 'wapé za'ra, filisteu norĩ hã. Tawamhã ahâ uptabi na ma tô siwi uprosi. Ma tô duré isimizama norĩ sipu'u pese na te te siwi duri. Ãne ma tô Davi hã anho'reptu a'uwẽ, 'ri'ahâ Queira ãma 're ihâimana za'ra mono norĩ hã.

6 Abiata, Aimeretihi 'ra hã simani wamhã, Davi hã te te hâiba waptob da, Queira u itẽme morĩ wamhã, ma tô sasedoti norĩ si'uzazé hã siré ti'â.

7 Tawamhã Sau, Davi hã Queira u imorĩzém na da te dasiwi po're pu'u wamhã, ma tô ãne tinha:

— 'Re ihâimana u'âsi mono hã ma tô oto Davi hã ĩnhib'rata ĩma tisõ. 'Ri'ahâ 'wawi wa'ra 'rãihâ ãma 'ridawa za'ẽne isitoptete u ma tô mo. Tahawa da te 're idawaibui waihu'u pese mono zéb u ma tô sisẽ.

8 Tawamhã Sau hã ma tô dasi'wapéi 'manharĩ'wa norĩ zô uburé tihârâ za'ra, si'wapé zô, te te ropãrĩ za'ra mono sina, sisõré pese na si'aba'ré da, Queira u, tame duré tiwi sitob da, Davihi wi, duré ite dasi'wapéi 'manharĩ'wa norĩ wib zama.

9 Tawamhã Sau za te te i'wapézém na te te sima irosa'ratazé hã Davi hã te te waihu'u wamhã, ma tô tãma tinha ãne, sasedoti Abiataha ma:

— We ãwa âri sasedoti norĩ si'uzazé hã, 'Re ihâimana u'âsi mono hã wa te iré sadanharĩ da.

10 Tawamhã Davi te oto ãne sadanha iré:

— Wanhib'apito, Izaraéu nhihudu norĩ te 'Re ihâimana u'âsi mono, wa hã asib'a'uwẽ Davi, wa tô waihu'u Sau te te sima irosa'ratazé hã, ĩhâimana ré Queira u we morĩ da, taha ré te te ĩzô da'uprosi da. 11 E tawamhã te za 'ri'ahâ Queira ãma 're idahâimana za'ra mono norĩ hã tãma ĩhâiba nhomri za'ra za, Sauhu ma hã isib'rata. Duré e tawamhã te za tô Sau hã we mo, wa hã te iwaparizéb zarina, za we imorĩ na. Tahawa, Wanhib'apito Izaraéu nhihudu norĩ te 'Re ihâimana u'âsi mono, ma'ãpé we ãma ĩzada'âbâ.

Tawamhã ma ãma sada'â ãne:

— Te za tô we mo, Sau hã.

12 Tawamhã te duré Davi sadanha ãne:

— E tawamhã te za Queira ãma 're idahâimana za'ra mono norĩ hã Sauhu ma ĩhâiba nhomri za'ra za, duré ĩte dasi'wapéi 'manharĩ'wa norĩ zama.

— Ĩhe! Wa za tô tãma aihâiba nhomri za'ra. — Ãne ma tô Uburé Danhib'apito hã ãma tãma wa'rã.

13 Tawamhã Davi tite dasi'wapéi 'manharĩ'wa norĩ me 600 na ihâiba za'ra norĩ me ma tô awa'awi wairé, Queira hawimhã. Siwa'ru te ai'aba'ré. Tawamhã Sau, Davi hã Queira hawi isimanizé te te waihu'u wamhã, ma tô rosa'rata ma hã oto marẽ.

14 Tawamhã Davi ma tô a'ubuni wi aima'u ẽtẽ'rãirã niwĩ, Zipe na romnhisi 'rata. Sau hã te bâtâ sidâpâsi sô 're rĩtĩ. Tane nherẽ, 'Re ihâimana u'âsi mono Davi hã te te tãma hâiba nhomri õ di, Sauhu ma hã. 15 Davi hã ma tô pahi na tihâiba, Sau hã sô watobro wa, te te wĩrĩ da. Tahawa te oto Horeza na romnhisi ãma 're sãmra, rop si 're irosa'wari mono ãma, Zipe 'ratamhã. 16 Tawamhã Zonata hã ma tô itẽme mo, te te sõpẽtẽ da tame. Tahawa, ma tô apâ ipẽ'ẽ nhiptede hã sina tãma tisõ, za te te sina i'umnhasizé hã isitob'ru norĩ wi 'Re ihâimana u'âsi mono nhimipawaptobzé hã. 17 Tawamhã Zonata te ãne tãma tinha:

— Aipahi tõ. Ĩmama Sau hã te te aima rob'manharĩ waihu'u õ di za. Tahawa, te za a hã asi'apito, Izaraéu nhihudu norĩ ma. Tawamhã wa hã wa za asahâpâ 're ĩhâimana. Ãne hã ĩmama te te waihu'u pese di.

18 Tawamhã tame ma tô Uburé Danhib'apito nho'a apâ ropisudu hã sima 'manharĩ na sitéb zahuré, tisisawi zahuré zéb u'âbâ hã. Tawamhã Davi hã ma tô Horeza ãma nhamra u'â. Tawamhã Zonataha si ma tô apâ mo, tinhorõwa u hã.

19 Tawamhã ni'wam norĩ hã Zipe na romnhisi ãma 're ihâimana za'ra mono norĩ hã ma tô 'mane Gibea u hã. Tawamhã ta norĩ hã ma tô Sauhu ma hã 'mairowasu'u ãne:

— Davi hã ma tô aima'u, wanhipti'a za'ra Horeza ãma, Haquira na ẽtẽ nhisi ãma, Zézimo na romnhisi ãma, hâiwa nhimi'e niwĩ. 20 Wa norĩ hã wama waihu'u pese za'ra di, Davi hã âri da, asima iwẽ na hã. Tahawa, ma'ãpé we wasiré aimorĩ za'ra na, wa te aima sõmri za'ra da, asib'rata.

21 Tawamhã Sau ma tô asa ãma tãma wa'rãmi za'ra ãne:

— Wa ĩsima wẽ, Wanhib'apito si iwẽ na te te aipawaptob za'ra wa'aba da, ĩma i'manharĩ wẽ za'ra wa'aba wa'rãmimhã. 22 Tô apâ ai'aba'réi aba na sahu wa'aba ihâimanazé hã asiwi waihu'u wẽ wa'aba hâ. Duré tô sena asiwi upsibi mei wa'aba da, tame ni'wam norĩ Davi te te siwi i'madâ hã. E marĩ wa. Te nasi ĩma dasiwi wasu'u ni, ihâimana nhimiza'rese na hã. 23 Tô sena ro isima'urizé hã asiwi upsibi mei wa'aba. Taha parimhã te za we apâ ĩtẽme ai'aba'réi wa'wa, õne haré. Tawapsi wa za wa hã oto aime ãma ĩmorĩ 'wa. Duré tô sena õme hâimana wapsi, wa za tô ti'â, uburé Zuda ãma ropâ te sô rowaimrami mono nherẽ.

24 Tawamhã Sauhu wana ma tô apâ ai'aba'ré, Zipe u. Tahawa, Davi hã duré tite dasi'wapéi 'manharĩ'wa norĩ me, te Ma'õ na rop si 're irosa'wari mono nhisi ãma tihâimana za'ra, ẽtẽ siwa'aba ãma pa're 'ré wa Zézimo na romnhisi ãma, hâiwa nhimi'e niwĩ. 25 Tawamhã Sau hã tite dasi'wapéi 'manharĩ'wa norĩ me te oto ai'aba'ré, sô rĩtĩ za'ra mono da, Davihi zô. Tane nherẽ, Davi hã ma tô waihu'u. Tahawa, ma tô mo, ẽtẽ tõmo wawẽ nhi'riti baba, Ma'õ na rop si 're irosa'wari mono nhisi u, tame hâimana da. Tawamhã Sau ãne hã te te waihu'u wamhã, ma tô duré Davihi zarina mo. 26 Tawamhã Sau, tite dasi'wapéi 'manharĩ'wa norĩ me, te ẽtẽ uiwada zara niwĩmhã tihâimana za'ra. Duré Davi hã tite dasi'wapéi 'manharĩ'wa norĩ me hã te i'uiwada amo niwĩ tihâimana za'ra. Tahawa, Davi norĩ hã ma tô waptu na aimani za'ra. E marĩ wa. Sau norĩ hã te te siwi uirĩ za'ra wa, te te waibu za'ra da. 27 Tane nherẽ, ma tô rowasu'u'wa hã itẽme wi. Ta hã ma tô ãne tawamhã tãma rowasu'u, Sauhu ma hã:

— Apâ waptu na aimorĩ õne haré! Filisteu norĩ, ti'ai wa'õtõ nho'õmo u ma asisi pi'uriwi, te te siwi âri da.

28 Tawamhã Sau, Davihi zarina timorĩ hã ma tô sazâ. Tahawa, ma tô mo, filisteu norĩ si te te a'wapé da. Taha wab zama taha romnhisi hã ãne: “Ẽtẽ tõmo wawẽ ãma dasina dasiwãnhizari na”.

29 Tawamhã Davi hã ma tô oto watobro ta hawimhã. Ma tô mo, ro hã itẽme 're idanhisisi waihu'u mono õ u, Gedi na romnhisi u.