Pas Cha Jut kareꞌe
1
Nena Cha Jut,
raꞌai mentan ya Cha Jems,
nena wokboi kanapo ya Jisas Krais.
Pas vemona kaneꞌe nopu aro bombiam God-a veku kairipu ke nokepi veka aro bombiam ya veku.
Cha Kan Pako karere ropu revo tah kaoreraripu vora nokepi revo nonoi nuiniari revo taim Jisas Krais-a nakai varu.
2 Kanasave beten-a kanao noa God va naokoku ropu tah riꞌi mariri naropu yah raꞌa vo minia va nopu save vo revo pasin ya karere ropu ero.
Yah ao vemona va nerekupuana revo laip mopu.
Aro ine keputrotropu awirai neman kekape sios are
3 Aro raꞌai Kristen tah rou neman nena,
ovakoranako va pas-a naneꞌe nanairai nopu revo vatiron no boꞌo vemona God-a karao vora nako memi varu aro koka.
Toh mare,
kanayara veka va pas-a raꞌa naneꞌe nopu veka,
kopusave bo kopao kupuana tah bilip vemona God-a karomi eno memi aro Kristen emo koporepari revo.
Yah beya awirai yei aro kesave ine keputrotropu awirai neman nopurivo vai.
God-a rara moikera vo bilip pon karanao tah bio raꞌa beya kuiniari bilip memi narovoru vai.
4 Aro ovu kekape kakana yah kekape sios are.
Titja aka God-a kasave veꞌen tah karao beyo ovakokokore naiy tah awirai-a kepeꞌe veka,
va neropi kot ya God tah rara yei kot vemona newinim va nobaun.
Emo aro yei oreva kepoa God tah awirai vo marimari ya God-a kerovoru yah kepao korao veka ao vo to orait-a koromi va pasin taipere keremaramara ri ine ya God nemao.
Aro vemona,
kesave oreva kepoa bia ya kanoi romi cha,
Biapako memi Jisas Krais.
5 Israel-a kenopi kekepi meꞌri kora vo kantri Isip tah Biapako karainyai reu varu bo vemona.
Yah kope kabagarapim yei revo aro voro beya kebilip pova ero.a
Ao vemona kopusave veꞌen.
Toh kanao awirai vemona tare nanairai nopu va nopurivo vova.
6 Kopusave veꞌen veka ensel voro beya kekepi revo bo yeib tah boꞌo ve God-a karoiy kepao vai.
Biapako sen vo kwinia toratora karonai yah karereiroki revo bo roroke aka.
Yah kekepikeke kot pako ya God-a va nokamap.
7 Veka titja,
aro bombiam vo mataimon Sodom re Gomora tah mataimon ovu kerinia kakuke ri mataimon riyempin vemona,
pasin taipere aka keparepare.
Pasin pamuk-a kepao tah pasin maramara ovu keretaipo poaka minia kepao.
Yah God-a aikera kasalim koraro kokirariy aro bombiam yah kobagarapim yei tah mataimon koka vemona minia.
Yah ao taipo ve aro bombiam vo mataimon vemona kepao emo,
korao ri revo veka pasin yei ensel-a kepao.
Korao veka tah ao vemona koriritao veka,
God-a va ao veka vemo narao roiy aro bombiam voro beya kot ya kewinim ero,
va nekepi aikera vo kwinia toratora.
8 Toh aro ve kepao ruru mopu nerovoru,
em aro yei pa kepeke pasin vemona.
Kesave pa kepekere ao voro yei veku keyoyonare ero,
ao emo keresave kererao riꞌi kokokore naiy revo tah pasin taipere voro kererao yei veku keroroke revo ri ine ya God ero kepao.
Aro emo awirai ya God-a beya kesave kerivo tah beya kesave pa kepekeya Biapako yah kesave ketereiy minia namba wan ensel vo heven.
9 Toh ensel namba wan,
ensel Maikel awirai-a kairai vararoa Satan va nape reka ya Cha Moses nako,
Cha Maikel beya kabikhet tah poko taipo kairai roa Satan vai.
Baun poaka.
Kairai veka,
“Biapako veku va natovema tah nairai roma va rova namapikim.”
10 Aro vemona kesave ketere ao voro yei veku beya ku rere kesave vai.
Kepao veka ame uka ruru awaka kobaun rei tah ketowa charara po pa kepeke laik vo reka yei.
Pasin yei emo,
kobagarapim yei veku.
11 Aro veka ve God-a va nabagarapim yei poaka.
Pasin veka ve kepao emo,
korao ri veka pasin Cha Kein karao titja.c
Tah kesave pa kepeke bereren pasin taipo veka Cha Balamd karao titja ero,
karitoro veka ao koka va nebaim pon mani.
Yah kesave kebikhet tah awirai ya God-a beya kerivo veka pasin ya Cha Kora karao titja ero,
kabikhet tah awirai ya God-a beya karivo vai.
Yah rara vemona pon,
aro vemona rara yei nenopi kobaun yah va nerepiroki poaka.
12 Taim kopopokeu lotu tah akorom-a kopa minia vora noriritao veka mopu aro bombiam ya God yah kokepi rimoꞌo moike tah koperepo mopu veku.
Tah beyo veka ve kesave kekape tah akorom vemona kebagarapim veka rip-a kwiniaroki nao vora nobagarapim rere bot tah sip taim nerekare ri kakuke.
e Beya rekakoyoi taim akorom-a kepa romoiy aro koka yah kesave ao koka keraipa kokai roiy yei pon.
Aro vemona kepao veka akoron beya koriri revo va a nuai tah puꞌu inia kwawowore kerenori tintin.
Yah raꞌa vo minia kepao veka aꞌai-a kerekore yah kerinia kanapo tah taim rere beya aka keyawe vai.
Kepao veka aꞌai-a keyurura veꞌen tah beyo ka rere keparata.
Aꞌai veka ve tah beyo veka ve keviri nao veꞌen.
13 Aro vemona kesave nai-a keparepare.
Kepao veka nao ipipo kereraoko.
Tah beya rekakoyoi va pasin taipo nepao vai.
Kekamap vatiron veka nao wuowuo kosave kwiniata nao.
Raꞌa vo minia kesave kepao veka kamoꞌo beya pa kerereke revo rara rere uteno nake.
Korao veka tah God-a bo yei karedi kwinia bo roroke pako va nekepi toratora bo vemona.
14 Cha Enok ya namba 7 apo tiꞌi ya Cha Adam.
Taim kakei,
awirai profet-a kairai veka,
“Kanapirikeya Biapako kararo nai holi ensel maomao ya tah beya kuiniari nemi kauntim yei vai.
15 Karao kot-a narimirao aro koka.
Va narao aro voro beya pa kepekeya ero,
va neyara revo nai vo pasin taipo yei kepao ero.
Beyo ovu sin-a kepao tah beya keperepova revo God tah oreva kepoa.
Korao veka tah,
karake narao aro voro poko taipo aka chirai poa ero va taipo yei neyara.f”
16 Aro vemona,
riꞌi taipo kosave kokokore nai bereren,
tah amumukepuiy pore ao voro keresave kerekamap riy ero.
Kesave pa kepekere ao taipere voro riꞌi yei kokokore nai va nepao ero.
Piakorerei kwarara.
Yei ku aka vo awoꞌo pako nepoiy beyo tah awirai-a nirai negrisim yei vora pa nepeke laik yei.
Va nopao bilip-a norao noropi kupuana
17 Toh mopu aro raꞌai Kristen tah rou neman nena,
va ova nopukinaki po awirai yei aposel ya Biapako memi Jisas Krais chiriraiꞌvo pore ao voro va nerekamap pa ero.
18 Kesave chirai popu veka,
“taim vo las de,
aro yei awirai-a kepana tah kebikhet tah piakorerei ero,
va nekamap.
Aro vemona va beya neperepova God tah pa va nepeke laik yei veku voro kepitoro veka koneman riy ero.”
19 Beyo vemona,
kesave pa kepeke pon ruru vo meꞌri vemona tah kuiniari beyo neraipaiy yah ruru nepei rovoru vora neraipapu va nopavetari.
Ero korao veka,
Holi Spirit-a beya kokei riy vai.
20 Mopu aro raꞌai Kristen tah rou neman nena,
bilip mopu va nopao nuinia kupuana ro laip neman vemona God-a veku karopu emo.
Yah taim beten-a nopao,
va nopin Holi Spirit-a kupuana re ruru noropu.
21 God bia ya karereropu revo.
Korao veka tah mopu va nokepi piya revo kakuke,
vora kuiniari narao ropu revo yah nokepikeya Biapako memi Jisas Krais va naokoku ropu revo tah nako mopu nonopi nokepiroki laip vo kwinia toratora.
22 Va nopu okoku poiy revo aro voro bilip yei korei kope kovariko tah beya kokupuana revo vai.
23 Yah ovu yei aro veka vemona,
korao veka kekepiroki veꞌen aikera.
Korao veka tah boꞌo mopu va nopuko yei varu yah nopu raipaiyka peu aikera.
Yah taim kopao nopu okoku poiy ovu yei,
va nopuriri po revo pasin yei yah noporepari mopu veku yah nokepi pere revo rarapa ao koka voro beya kereniniu ri ine ya God ero.
Ero korao veka,
kenopi revo kuro tah pa kepekeu pasin vo riꞌi tora yah ao roroke aka kepao yah kuiniari noreka yei minia nereroroke revo ri ine ya God.
Awoꞌo pako konoi roa God
24 God-a kuiniari naoreraripu revo yah beya kuiniari norepi vai.
Yah kuiniari nako mopu nonopi bo ine nenam ya tah noropi revo ine ya yah oꞌto va notepu tah nai-a raꞌa va beya nuiniatapu vai.
25 God moikera pon kakei tah bia emo ya kako memi varu ro boꞌo ya Biapako memi Jisas Krais-a karao ero.
Awoꞌo ya nemawoko nake yah vora kuiniari nakei king memi tah ao koka va neriniaroko pon kupuana ya.
Kakei ato titja tah mare yah pa minia va nakei pon veka.
Awaka revo.