Yesusini Kongi-Sipisipime Kinie Sipisipimenga Tapu Yemo Kinie Akumando Nirimu Temanemo
Akumunge, Kongi-Sipisipi Palamonga Ungu-Ikomo
10
(Pulu Yemonga ungumu. Kolomongo-kanga wane.)˻Yesusini yambo moloringimendo nimbendo: “Nane enendo paa sike nimbu sikirumu: “Ye te kongi-sipisipi pala-kerepuluna suku naa pupe, we tenga topa tangonjipe pulimo yemo yu wa noli yemo.a 2 Nakolo ye te kerepuluna suku pulimo yemo yu sipisipi nokoli yemo.b” nikiru. 3 Kerepulu nokoli yemone yunge kune linjilimo. Sipisipimene nokoli yemonga ungumu pilimele, yunge sipisipimenga imbime lepa pala-kerepuluna ulsu memba pulimo. 4 Yunge sipisipime wendo lipelie, yu kumbi-lepa pulimo kinie yunge ungumu pilkulie ene lombili pulimele. 5 Ye-lupe tenga ungu nilimomo naa pilkulie yu lombili naa puku talopa lelko pulimele.” nirimu.
6 Yesusini aku ungu-ikumu topa sirimu nakolo ungu-pulumu naa piliringi.
Yesusi Yu “Kongi-Sipisipimenga Tápu-Ye Peangamo Molio.” Nirimu Temanemo
7 Yesusini ˻kongi-sipisipimenga ungu-ikumu topalie nirimumuni, ungu-pulumu naa piliringi-ne˼ kelepa ungu te pea nimbendo: “Nane enendo paa sike nimbu sikirumu: “Na sipisipimenga pala-kerepulumu.c 8 Na naa wambo ye-lupe ou oringi yema wa noli yema mindi, nakolo enenga unguma sipisipimene naa piliringi. 9 Na pala-kerepulumu. Yamboma ‘Sukundu pamili!’ ningulie na molombona ongema mindili nolemelka aulkena wendo ongo na-kinie kapola molko sukundu pukud pena ongo era nongo tengemo. 10 Wa noli yemone wa nomba topa konjipe tepa kenjimbendo mindi olemo. Nakolo nane ‘Ene konde molko paa molko konjengi!’ nimbu orundu.” nikiru.
11 “Na-nanu kongi-sipisipi tápu-tepo konjilio yemo. Sipisipi tápu-tepa konjili yemone yunge sipisipime ‘Mindili naa nongo, kolou naa kolangi!’ nimbelie ene lipe taponjipe enenga nimbe kolo wangopa kolonjimbe telemo.e 12 Ye te yu sipisipi pulu yemo mólo, yu we kou-kongono mindi tepa sipisipime we nokonjilimo, kanu we tápu tenjili yemo owa-takara tef ‘Sipisipi te topo nambo!’ nimbe olemo kinie kanopalie, yu sipisipime mundupe kelepa talopa lepa pulimo. Kanu-kinie owa-takaramone sipisipime topa bulu-balu silimo. 13 Yemo yu kou-kongono teli yemo mindi molopalie, sipisipime kondo naa kolopa yu talopa mindi lemo.
14-15 “Na-nanu sipisipi pulu yemo molopolie ene tápu-tepo konjilio. Tarane na kanopa pilimo nane yu kanopo pilio mele aku-sipe melela, nane nanga sipisipime kanopo pilio enene na kanoko pilimelela. Nane sipisipime ene ‘Naa kolangi!’ nimbu enenga kolo wangopo kolonjimbu. 16 Nanga sipisipi mare lupe molemelela, i ˻Juda-˼koleana sipisipime mindi mólo!g Na kanu sipisipi-wema kepe membo ombóla. Membo ombó kinie kanuma nanga unguma pilku lingí kinie pe sipisipime pali talape telumu mindi molonge, sipisipi pulu ye telu mindi molopa ene tápu-tepa konjimbe. Akumu na.
17 “ ‘Na toko konjengi kolambo!’ nikirumunge Tarane na konopu monjilimo. Nakolo ‘Kolopolie ónomo óno-koleana kamu leambo!’ ni naa nimbu, ‘Lomboropo ola molambo!’ nimbú.’ nimbu pilipulie ‘Na kolambo toko konjengi!’ nikiru. 18 Yambo tene na ‘Kolopili topo konjembo!’ ni naa nikimu; nanu konopuni pilipulie ‘Kolambo toko konjengi!’ nikiru. ‘Na kolambo toko konjengi!’ nikirumu nanu ‘Kolambo toko konjengi!’ manda nimbú. Kolopolie nimbumuni, ‘Na altopo konde molambo!’ nimbumu nanu manda nimbú. I tembomo Tarane “Aku-siku tei!” nirimu mele tembo.” nikiru.” nirimu.
19 Yesusini aku nirimu-na Juda-yambomane pilkulie ene altoko konopu teluna naa pupili yu-mele-mele konopu liku munduringi.
20 Yambo aisilini ningindu: “Yunge konopuna kuru te molemomongah yu kekelepa topa aku-sipe ungumu nimbe kenjilimo. Nambemuna yunge ungumu pilkimiliye?” niringi.
21 Nakolo marene ningindu: “I ungu nikimuma kuru te konopuna molomba ye tene aku-sipe mele manda naa nilke. Kuru tene nambe-tepa yambo tenga mongo keri lelimu manda tepa peanga tenjilkeye?” niringi.i
Juda-Ye Ailimene “Yesusi Pulu Yemonga Malo Mólo!” Niringi Temanemo
22 Kanu-kinie Juda-yambomanga ulu te wendo orumu wale te wendo orumu. Koronga-ou yambo marene Pulu Yemo popo toko kaloringi ulke-tembelena teko kake tenjiringi walemoj ponie tenga-tenga pilingindu Jerusalleme máku toringi aku walemo wendo orumu. Aku walemo kolea ali tepa kalopera torumu walemanga wendo orumu. 23 Kanu walemo wendo orumu kinie Yesusi ulke-tembele kere-puluna ‘Sollomononga’ ningu takoko anju liringinek andopa molorumu 24 kanu kinie yu molorumuna Juda-ye ailimel ongo máku toko angilkulie yundu ningindu: “Olio konopu talo-tepo naa lipu mundupu molamili kene Pulu Yemone “Olio nokopa konjimbe ye te lipu mundumbu.” nimbe mako torumu ye-nomi Kirasimu nu liemo olio mongo-toko ningu si!” niringi.
25 Yesusini pundu topa nimbendo: “Nane aku yemo molio ou nimbu sirindu nakolo ‘Sike nikimu.’ ningu naa pilimele. Nanga Tarane na namba sipe yunge kongonomo “tenji-pui!” nirimu-nam ulu-tondolo teliomane na molio mele lipe ora silimo, 26 nakolo ene nanga kongi-sipisipime naa molemelemonga molio mele nilio akumu ‘Kolo tokomo.’ ningu pilimele. 27 Nanga sipisipime nanga unguma pilimele. Nane ene kanopo imbi silio, ene na lombili olemele.n 28 Nane ene ‘konde molko mindi pangi!’ nilio. Ene mindili nongo molko kenjingí koleana naa pungí.o Ene nane nokopo molambo yambo tene manda wendo naa limbe. 29 Tara yuni kanu sipisipime na sirimu yemo yu mélemanga pali olandopamo, yuni kanuma nokopa molopili yambo tene manda wendo naa limbe. 30 Na kinie Tara kinie olto telumu.” nirimu.p
31 Juda-ye ailimene altoko kou-mulú liku Yesusi toko konjingí teringi, 32 nakolo yuni enendo nimbendo: “Nane Taranga ulu-tondolo aisili peangama ene lipu ora sipu terindu, akumanga témo kanoko keri kanokolie na kouni toko konjingí tekemeleye?” nirimu.
33 Juda ye-ailimene pundu toko ningindu: “Ulu-tondolo terinumanga nu kouni topo konjimulú naa tekemolo. Nu we-mana-yemone Pulu Yemo liku ungu-taka tonjiku nuni ninindu: “Na Pulu Yemo.” nilino, akumunge nu kouni topo konjimulú tekemolo.” niringi.
34 Yesusini pundu topa nimbendo: “Pulu Yemonga boku nosilimelemongaq Pulu Yemone ungu te nimbendo:
“Nane ene ou nimbundu:
‘Ene pulu yema.’ nirindu kanumu.”r Konana 82:6
nirimu, nimbe bokuna molemo. 35 Pulu Yemonga bokuna ungu molemomane kolo naa tolemo, ungu nilimoma pepa mindi pulimo kanumu. Pe Pulu Yemone yunge ungu piliringi yambomando “pulu yema.” nirimu liemo 36 Tarane mako topa ‘nanga yemo molopili!’ nimbe ma-koleana lipe mundurumuna orumu yemone “yu Pulu Yemonga Malo.” manda naa nimbéye? Pe nane “Na Pulu Yemonga Malo.” niliomonga nando “Pulu Yemo liku ungu-taka tonjikinu.” nambemu-na nikimiliye?s 37 Tarane uluma telemo mele nane aku-sipu uluma naa tendu liemo na ‘sike yunge malo nikimu’ ningu naa piliengi! 38 Nakolo Tarane uluma telemo mele nane sike aku-sipu uluma tembo kinie ‘Yu Pulu Yemonga Malo mólo! Kolo tokomo.’ ningu pilíngi liemo aku kapola ulu-tondolo telioma kanokolie ‘Sike Pulu Yemonga ulu-tondoloma.’ ningu kanangi! ‘Tara na-kinie tapú-topa molemo, na Tara-kinie tapú-topo molio.’t ningu pilingindu aku-siku nane telio uluma kanokolie ‘Sike Pulu Yemonga ulu-tondoloma.’ ningu kanai!” nirimu.
39 Yuni aku nirimumunge enene altoko yu ka singí teringi nakolo yu ene mundupe kelepa yu purumu.u
40 Aku tepalie nirimumuni, Yesusi kelepa No-Jodane lumbilipe nekendo pupe, Jono ou yamboma no linjirimu koleana pupe molorumu. 41 Kanu-kinie yambo aisili yu molorumuna oringi. Ongolie ningindu: “˻No-Linjili˼ Jonone sike ˻Pulu Yemonga kongono tenjirimu mele˼ lipe ora sirimu ulu-tondolo telu kepev naa terimu, nakolo i yemone pe omba molopa temba mele Jonone ou nimbe sirimu aku unguma paa sike nirimu.” niringi. 42 Kanu-kinie aku koleana yambo aisilini ‘Yesusi yu sike.’ ningu tondolo-munduku piliringi.w