Yamboma pali ulkendo bulu-balu ningu puringi;

2 Kanu-kinie kolea tangorumu kinie ipulueli-ou yu kelepa ˻Pulu Yemo popo toko kaloringi˼ ulke-tembelena purumu kinie yamboma yu molorumuna ongo máku toko moloringi kinie ene ungu-mane simbendo yu manie molorumu.

3 Kanu-kinie Pulu Yemonga ungu-manemanga puluma pilku mane siringi yema kinie^a Parisi-yema kinie^b enene ambo ye puli te ye te-kinie wa-ulu-kerinele teringilimu liku mengo ongo yamboma moloringi kumbikerena ongo anjikulie, 4 Yesusindu ningindu: “Ungu-Mane Sílimu, i ambo ye púlimu ye te-kinie wa-ulu-kerinele teko molongili yambomane kanongi-ne membo okomolo. 5 Mosisini ungu-mane te sipe panjipelie nimbendo: “Ambo aku tembamo kouni toko konjei!” nirimu^c kene nuni nambolka niniye?” niringi. 6 Nakolo enene sike pilingindu naa niringi. ‘Yuni nambolka nimbénje? Nimbe kenjimbe kinie kote tenjimulú.’ ningu aku-siku walsiringi.^d

Nakolo Yesusi ma kanopa kimuni mana ˻we˼ imbi topa molorumu. 7 Kanu-kinie yu alieli walsi-pu-opu teringi-ne olando-sipe kanopalie enendo nimbendo: “Enenga ye te ulu-pulu-keri te naa pelemo ye tene i ambomo kumbi-lepa kouni topili!”^e nirimu. 8 Aku nimbelie yu kelepa ma kanopa mana we imbi topa molorumu.

9 Aku nirimu-na pilkulie ye-ailime ene te talo ningu pena-pena puku Yesusi munduku kelko ene puringi. Ye-ailimenga ye-nomime ou kumbi-lelko puringi kinie we-ye-ailime akiliku puringi kanu-kinie ye-aili te Yesusi-kinie naa molopa Yesusi-yuyu molopa, ambomo Yesusi molorumuna we angilirimu. 10 Kanu-kinie Yesusi olando-sipe kanopalie ambomo walsipelie nimbendo: “Ambomo, yema tena molemeleye? Ye tene nu ‘Teko kenjinumunge kote tenjembo!’ naa nimuye?” nirimu.

11 Ambomone nimbendo: “Ailimu, ye tene na kote naa tenjimbe tekemo.” nirimu.

Yesusini nimbendo: “Nane kepe ‘Nuni teko kenjinumunge mindili nani!’ naa nikiru kene nu pukulie ulu-pulu-keri teleno mele munduku kelko, altoko naa tei!” nirimu.

12 Yambo moloringimendo Yesusini kelepa nimbendo: “Na ma-koleamanga pali yambomanga pa tenjilimu.^f Na andopo molombona lombili andoko molonge yamboma sumbulu toline naa andoko molonge. Konde mololi ulu-pulumu silimo pa telimu kinie molonge.” nirimu.

13 Aku nirimu-na ye-aili Parisimene^g pilkulie yu karaye tekolie ningindu: “Nu moleno mele nunu ningu silino kene nuni ungu nikinuma pilipulie ‘Sike nikimu.’ nimbu pilimelkanje manda naa telka.” niringi.^h

14 Yesusini pundu topa nimbendo: “Na ou molopo orundu koleamo kinie kelepo pumbu tekero koleamo kinie pilipu moliomonga na molio mele sike nanu nilio nakolo nane i ungu nikirumu sike ungumu. Nakolo na molopo orundu koleamo kepe pe pumbu tekero koleamo kepe ene naa pilkimili. 15 Mana-yambomane pilku apuruku telemele mele ene Parisi-yemane aku-siku pilkulie apurulimele, nakolo nane yambo te naa apurulio. 16 Nakolo nane sike pilipu apurulkenje na-nanu manjipu naa apurulkemonga sumbi-sipu apurulke. Na lipe mundurumu ye Tara-kinie pea tapu topo molembolomonga sumbi-sipu pilipu apurulke. 17 Enenga ungu-mane te bokuna molemo kanumu i-sipe: ‘Yambo talone ungu te ningu síngili liemo ‘Aku ungumu sike.’ niengi!’ aku-sipe nimbe pelemo.ⁱ 18 Akumunge na molio mele nanu nimbu silio kepe; na lipe mundurumu ye Tarane na molio mele nimbe silimola.” nirimu.

19 Kanu-kinie enene walsikulie ningindu: “Lanie tena molemoye?”^j niringi.

Yesusini pundu topa nimbendo: “Enene na kepe nanga Lapamo kepe naa kanoko imbi silimele. Enene na kanoko imbi silimelkanje Tara kepe kanoko imbi silimelka-la.” nirimu. 20 Yesusi ulke-tembelena sukundu, Pulu Yemonga ningu yambomane kou-mone siringi unju-ketema lerimu koleana molopa yamboma ungu-mane sipe molopalie i unguma nirimu. Nakolo yunge walemo^k wendo naa orumu-na yambo tene yu ambolko liku ka naa siringi.

21 Yesusini altopa Juda-ye-ailimendo nimbendo: “Na kinié pumbu tekero, kanu-kinie enene na koroko kelkolie enenga ulu-pulu-kerime konopuna pepili kolonge. Na pumbu koleana ene manda naa onge.” nirimu.

22 Aku nirimu-na pilkulie Juda-ye-ailimene eneno kere-pali ningu walsikulie ningindu: “Aku nambemu-na ‘Na pumbu koleana ene manda naa onge.’ nikimuye? Aku liemo yu-yuyu topa konjimbenje?” niringi.

23 Yesusini kelepa nimbendo: “Ene manie-yamboma, na ola-yemo. Ene ma-kolea pulu-yamboma, na ma-kolea pulu-ye te mólo! 24 Nane enendo ou nimbundu: “Ulu-pulu-kerime konopuna we pepili kolonge.” nindu kanumu. Akumu “Na kinié molio, ou-pulu-pulu molorundu, pe molopo mindi pumbu yemo.” nimbu silio mele enene ‘Sike akumu molemo.’^l ningu tondolo-munduku naa pilíngi liemo pe ene kolonge kinie sike enenga ulu-pulu-kerime konopuna we pepili kolonge.” nirimu.

25 Parisi-yemane yu walsikulie ningindu: “Nu naeye?” niringi.

Yesusini pundu topa nimbendo: “Na molio mele ene alieli nimbu silio kanumu na mindi. 26 Nane ene molko ulu telemele mele pilipu apurupulie enene teko kenjilimele mele ungu aisili nimbu silke nakolo nanu konopumuni pilipulie unguma naa nilio. Na lipe mundurumu yemo, yu ulu-sikema mindi tepa ungu-sikema mindi nilimo ye, kanumuni nilimo mele mindi pilipulie mana-yamboma nimbu silio.” nirimu.

27 Yuni Lapando nirimu nakolo ene yuni nirimu mele pulumu naa piliringi-ne 28 Yesusini enendo nimbendo: “Pe enene Manie Omba Mana-Ye Au Lerimu Yemo ola uku toko panjikulie^m ningímuni, enene pilkulie “Na kinié molio, ou-pulu-pulu molorundu, pe molopo mindi pumbu yemo.” nimbu silio mele enene ‘Sike akumu molemo.’ⁿ ningu pilkulie kepe, “Na-nanu konopumuni pilipulie naa telio.^o Tarane na mane silimo mele mindi pilipulie nilio.” alieli nimbu silio ‘Akumu sike lemo.’ ningu pilingí. 29 Na lipe mundurumuna orundu yemo na-kinie pea tapu topo molembolo; alieli yu kanopa peanga kanolemo uluma mindi teliomonga yuni walsikale kepe na mundupe naa kelemo.” nirimu. 30 Yuni aku-sipe nimbe molopili kepe yambo aisili ‘Yesusi yu Pulu Yemone sike lipe mundurumu.’ ningu tondolo-munduku piliringi.^p

31 ‘Yu sike.’ ningu piliringi Juda-yambomando Yesusini nimbendo: “Nane ungu-mane silioma sike pilku liku tenge panjiku molongi liemo ene sike nanga lombili andolime molonge.^q 32 Aku tekolie, enene sike ungumu pilingí kinie ene ka silimo mélema sike ungumuni wendo linjipe ‘ene we molko konjengi!’ nimbé.” nirimu.

33 Enene pundu toko yundu ningindu: “Olio Eporayamone kalopa lirimu yamboma molopo, yambo tenga ka-kongono te naa tenjipu molorumulu.^r Aku liemo nuni ‘Ka silimo mélema wendo pumbe olio molko konjingí.’ nikinu kanumu nambe-teko pilkulie nikinuye?” niringi.

34 Yesusini pundu topalie nimbendo: “Nane ene paa sike nimbu sikirumu: “Yambo ulu-pulu-keri telemelema ulu-pulu-kerimene ka silimo kinie aku ulu-pulu-kerimenga ka-kongono telemele. 35 Ka-kongono telemo kendemandemo ulke pulu yamboma kinie pea kamu naa molemo, nakolo ambolango te yunge ulke pulu yamboma-kinie alieli teluna tapú-toko molemele. 36 Akumunge ˻Ulke Pulu Yemonga˼ Malone ‘Ene ka silimo mélema mundupe kelepili, ene we molko konjengi!’ nimu liemo méltene sike ka naa simbe, we paa sike molko konjingí.” nikiru. 37 ‘Ene Eporayamone kalopa lirimu yamboma molemele.’ na pilipu molio nakolo enenga konopuna nanga ungumu naa pelemomonga na toko konjingí tekemele. 38 Nane Tara-kinie molopolie kanorundu mele ene nimbu silio. Enene enenga laniene nilimo mele pilkulie telemele.” nirimu.

39 Yesusini yambomando “Ene lanienga ungumu pilkulie telemele.” nirimu kinie pilkulie Juda-yambomane pundu toko ningindu: “Olionga lapa kalopa lirimumu Eporayamo.”^s niringi.

Yesusini nimbendo: “Mólo! Ene sike Eporayamone kalopa lirimu yamboma molemelkanje Eporayamone terimu mele ene aku-siku telemelka. 40 Nakolo aku naa telemele. Pulu Yemone na nimbe sirimu unguma na pilirindu ungu-sikema ene nimbu silio-yemo toko konjingí tekemele. Eporayamone aku-sipe naa terimu. 41 Ene enenga laniene telemo mele manda lelko telemele.” nirimu.

Enene tondolo karaye tekolie ningindu: “Olionga anumu ye te-lupe-kinie wapora topalie olio naa merimu. Olionga lapa kanumu Pulu Yemo telu mindi.” niringi.

42 Yesusini enendo nimbendo: “Na Pulu Yemo-kinie molopolie orundu ya moliomonga Pulu Yemo yu sike enenga Lapa lelkanje enene na konopu monjilimelka. Na-nanu konopumuni pilipulie naa orundu. Yuni na lipe mundurumu-na orundu. 43 Nane ungu niliomanga pulumu nambemu-na sumbi-siku naa pilimeleye? ‘Ungu-pulumu naa pilimolo.’ ningu naa pilku limele akumunge nanga ungumu ene naa pilimele. 44 Ene ˻kurumanga nomi˼ Depelemonga^t ambolangoma, Setene enenga lapamo. Laniene kanopa peanga kanolemo mele ‘teamili!’ ningulie yuni “Ene teai!” nilimo mele ‘Paa teamili!’ nilimele. Ou-pulu-pulu mulú-matolo kokele wendo orumu kinie yu yambo topa konjili yemo molorumu mele aku sílimu yandopa kinié we molemo. Yu sike ungu-pulu te naa perimu-na sike ungu te walsikale kepe paa naa nirimu. Yu kolo tolemo yemo; yu sike kolo toli ungumunge pulu-yemo molemomonga ou yu kolo torumu mele yandopa kinié-kepe pe-kepe kolo mindi tolemo tomba. 45 Nakolo nane ungu-sikema nimbu siliomonga ene naa pilku ‘Kolo tolemo.’ ningu pilimele.

46 “Naene nanga konopuna ulu-pulu-keri telu kepe pelemo manda lipe ora simbeye? Te naa pelemo nakolo nane ungu-sikemo nindu liemo ‘Sike nikimu.’ ningu ene nambemu-na naa pilimeleye? 47 Pulu Yemonga ambolangomane Pulu Yemone nilimo ungumu pilku limele. Ene Pulu Yemonga ambolangoma naa molkolie^u yunge ungumu nane nimbu silioma “Naa pilimulú.” ningu naa pilku limele.” nirimu.

48 Juda-ye-ailimene^v yundu pundu toko ningindu: “ “Nu Sameria-ye te moleno, nunge konopuna kuru te molemo.” nilimolo kanumu sike nilimolo.” niringi. ˻Juda-yambomane Sameria-yamboma kinie konopu keri panjiringi kanumunge^w yu iri toko ungu-taka tonjiku “Yu ye keri te.” ningindu “Nu Sameria ye te.” niringi.˼

49 Niringi mele pilipelie Yesusini pundu topa enendo nimbendo: “Nanga konopuna kuru te naa molemo. Nane Taranga imbi ola linjilio, nakolo enene nanga imbi teko kenjinjilimele. 50 Nanu ‘Imbi ola molopili!’ naa nilio, nakolo ye te molemo akumuni ‘Na imbi ola molopili!’ nimbe nanga imbi ambolopa ola linjilimo. Kanu yemone nane nilio mele kepe enene nilimele mele kepe mimi-sipe pilipe apurupe tene ‘Sike nikimu.’ nimbe pilipe molemo. 51 Nane enendo paa sike nimbu sikirumu: “Yambo te nanga ungumu pilipe lipe tepa molomba yambomo paa kamu naa kolopa molopa mindi pumbe.” nikiru.” nirimu.

52 Juda-ye-ailimene yundu ningindu: “Kinié olio pilkimulu, kuru te paa sike nunge konopuna molemo lemo. Anda-kolepa Eporayamo kolorumu;^x Pulu Yemone ungu-umbu tonjirimuma pilku yamboma ningu siringi yema^y koloringila. Nakolo nuni ninindu: “Nanga ungumu pilipe lipe molomba yambomo kamu naa kolomba.” nikinu. 53 Eporayamonga imbi manie-mele molopa nunge imbi ola molemoye? Yunge imbi paa ola, nakolo yu kepe kolorumula. Pulu Yemone ungu-umbu tonjirimuma pilku yamboma ningu siringi yamboma kepe imbi ola molorumu nakolo koloringila. Nunge imbimu ola enenga imbime manieye? Paa molo! Nu koropamo.” niringi.

54 Yesusini pundu topa nimbendo: “Nane nanga imbi nanu ambolopo ola lilkenje na imbi paa sike ola naa molka, na we mindi nilke. Nakolo akumu mólo! Tara, yundu enene “Olionga Pulu Yemo.” nilimele kanumuni nanga imbi ambolopa ola linjilimo. 55 Enene yu naa kanoko naa pilimele nakolo nane yu kanopo pilio. Nane “Yu naa kanopo naa pilio.” nilkenje ene kolo tolime molemele mele na aku-sipu molka. Nakolo nane yu paa sike kanopo pilipu, yunge ungumu pilipu lipu tepo molio. 56 Enenga anda-kolepa Eporayamone ‘Na mana-manie ombá walemo kanombo.’ nimbe pilipelie konopu sipe molorumu. Kanu walemo kamu kanopalie konopu sirimu.” nirimu.

57 Kanu-kinie Juda-ye-ailimene yundu ningindu: “Nunge ponie tokapu talo ou naa pora nili. Nu kango-yemo mindi. Pe nu “Eporayamo kanorundu.” nikinuye? Nuni yu manda naa kanorunu. Kolo tokono.” niringi.

58 Yesusini enendo nimbendo: “Nane enendo paa sike nimbu sikirumu: Eporayamo sike paa koronga-ou molopa kolorumu nakolo yu ou naa molopili na molorundu.”^z nikiru.” nirimu.

59 Aku nirimu-na pilkulie “Yu Pulu Yemo marake tepa ‘Pulu Yemo molio.’ nimbe nirimu kinie pilkulie, enene “Yu topo konjemili!” ningu kou liku yu tonge teringi. Nakolo Yesusi lopi tepalie, ulke-tembelena kiyongo nimbe omba ulsu purumu.