2 Yu kote tenjikulie Paillatendo ningindu: “I yemone nimbendo: “Romo-gapomanomone olio Juda-yamboma naa nokopili!” nimbe, “Romo-Gapomano Ye Paa Aili Kumbine Sisamo kou-takisi naa tangi!” nimbe,^b “Yu-yuyu “Pulu Yemone olio nokopa konjimbe ye te lipu mundumbu.” nimbe mako torumu ye Kirasimu, ye-nomi-kingimu molio.” nimbe molemomo olio pilipu kanolemolo.” niringi.

3 Ene aku-siku niringi kinie pilipelie Paillatene ˻Yesusinge kotemo˼ yu walsipe pilipelie nimbendo: “Nu Juda-yambomanga ye-nomi-kingimu moleno molo móloye?” nirimu.

4 Yuni aku nirimu kinie pilipelie Paillatene Pulu Yemo popo tonjiringi ye-ailime kinie, we-yamboma akuna liku máku toringime kinie, enendo nimbendo: “I yemo ulu te naa tepa kenjimu.” nirimu.

5 Nakolo enene karaye teko tondolo-munduku ningindu: “Yuni ungu-mane sipelie “We-yamboma ulu teko kenjiku, mongo liku teangi!” nimbe mane sirimu. Yuni ou-pulu-pulu kolea Gallilli-Disiriki ungu akumu mane sipe, pe yandopa kolea Judia-Disiriki koleama pali silipe andopalie, pe kamu ya kolea-aili Jerusalleme omba ungu akumu mane sipe molemo.” niringi.

6 “Kolea Gallilli” niringi kinie pilipelie Paillatene enendo walsipe pilipelie nimbendo: “I yemo yu Gallilli ye teye?” nirimu kinie

7 enene “E.” niringi pilipelie yuni nimbendo: “˻Ye-nomi-kingi˼ Erote, Gallilli-Disiriki nokolemo yemo, Yesusinge kotemo yuni pilipili yu molemona mengo pai!” nirimu. Aku walemonga kanu ˻ye-nomi-kingi˼ Erote yu Jerusalleme omba molorumuna pilipelie, “Yu molemona mengo pai!” nirimu. ˻Paillate yu Jerusalleme lerimu kolea Judia-Disiriki nokorumu yemo.˼

8 Erote ˻molorumuna mengo puringi kinie˼ yu Yesusi kanopalie konopu sirimu. Yu Yesusini ulu terimu mele ungu aisili pilipelie, ‘Kanu yemo kanamboa!’ nimbe molopa, ‘Yuni ulu-tondolo te tepili kanamboa!’ konopu lepa molorumu-na^c yu orumu kinie kanopa konopu sirimu.

9 Akumunge, Erotene Yesusi ungu aisili walsipe pilirimu nakolo Yesusini ungu te pundu topa naa nimbe we molorumu.

10 Pulu Yemo popo tonjiringi ye ailime kinie, Pulu Yemonga ungu-manemanga puluma pilku mane siringi yema kinie,^d akuna angilkulie enene Erotendo ningindu: “Yesusini i-sipe ungu nimbe kenjipe, i-sipe ulu aisili tepa kenjipe molemo.” ningu tondolo-munduku niringi.

11 Kanu-kinie Erote kinie yunge ami-yema kinie enene ‘Yesusi yu ye-nomi mólo! Yu we-yere.’ ningu ye-nomimene pakolemele mulu-wambale peanga te liku pakonjiku, yu ungu-taka tonjiku tae tenjiringi. Kanu-kinie Paillate molorumuna Erotene Yesusi lipe yando mundurumu.

12 Paillatene Erote molorumuna Yesusi ou naa lipe mundupili Paillate kinie Erote elte opa-tou moloringili. Nakolo Yesusi-kinie aku teringili walemonga pe elte angenungulu mele moloringili.

13 Yesusi Paillate molorumuna yando mengo oringi kinie Paillatene Pulu Yemo popo tonjiringi ye-ailime kinie, Juda-yambomanga tapu yema kinie, we-yamboma kinie, “Ene wai!” nimbelie

14 enendo nimbendo: “I yemo na moliona mengo ongolie “Yuni yambomando ‘Romo-gapomanomone olio naa nokopili!’ nimbe ‘Ene mongo liku teangi!’ nimbe molemo.” ningu^f na moliona mengo ongi. Kanu-kinie ene kanoko molangi nane kote pilipulie enene ‘Yu tepa kenjirimu.’ níngi mele na ulu te naa pilkiru.

15 ˻Gallilli-Disiriki ye-nomi-kingi˼ Erote, yu pea i yemo ulu te tepa kenjirimu te naa-la pilipelie yu altopa yando mundumu. Pilkimiliye? Yu ulu te tepa naa kenjimu. Yu we nambemu-na topo konjimulúye?

16 Ulu te tepa naa kenjimumunge nane yu we kopene topolie “Kelko pui!” niembo!” nirimu.

17-19 (Kolea-aili Jerusalleme sukundu ye te, yunge imbi Barapasi, ˻yu kinie ye mare kinie˼ ‘Romo-gapomanomone olio Juda-yamboma naa nokopili!’ ningu ou Romo-gapomanomo-kinie opa tekolie yambo mare toko konjiringimunge yu ka siringi. ˻Romo-gapomanomonga ka-ulkena kanu ye Barapasi we pepili Juda ye-ailimene Yesusi kote tenjiringi˼. Juda-yambomane ponie tenga-tenga kolea-aili Jerusalleme ongo akuna suku Pulu Yemone enenga anda-kolepalime Naa Topa We Omba Purumu mele piliringi walemo^g wendo orumu kinie Romo-gapomano ye-ailimuni ka-ye te ka-ulkena wendo lipe mundupe “Pui!” nirimu.)^h ˻Aku-sipe terimu mele piliringimunge Paillatene “Yesusindu “Pui!” niembo!” nirimu kinie pilkulie˼ enene pali yundu tondolo-mundukulie ningindu: “I yemo mólo! Yu ˻kolopili˼ mengo pukulie, Barapasi ˻ka-ulkena˼ wendo liku si!” niringi.

20 Paillatene ‘Yesusi we pupili!’ nimbelie enendo ungu te pea nirimu

21 nakolo enene yundu wale aisili tondolo-munduku ningindu: “Yu kolopili unju-perana uku toko panji!” ningu moloringi.

22 Aku niringi kinie yuni enendo altopa wale yepoko-sipe walsipelie nimbendo: “Aku nambemu-naye? Yu mongo nambolka mongore limuye? Yu ulu te tepa naa kenjimu. Yu we nambemu-na topo konjimulúye? Nane yu we kopene topolie “Kelko pui!” niembo!” nirimu.

23 Nakolo enene karaye teko ungu tondolo-mundukulie ningindu: “Yu kolopili unju-perana uku toko panji!” niringi kinie enene tondolo-munduku niringi mele pilipelie Paillatene ene niringi mele temba terimu.

24 Kanu-kinie Paillatene kote pilipelie enene yu-kinie “Paa tei!” ningu karaye teko mawa teringi mele ‘Aku-sipe tepili!’ nirimu kinie

25 ˻ye Barapasi,˼ ‘Romo-gapomanomone olio Juda-yamboma naa nokopili!’ nimbe ou Romo-gapomanomo-kinie opa tepalie yambo mare topa konjirimumunge ka-ulkena perimu kanu yemo, wendo lipe ene sipelie nirimumuni, pe enene ‘Yesusi kolopili!’ niringi mele pilipelie “Yu-kinie aku-sipe wendo opili!” nimbe ami-yema sirimu.

26 ˻Romo ami-yemane˼ Yesusi mengo pungí pukulie niringimuni, kolea Sairini ye te,^j yunge imbi Saimono, yu Jerusalleme pumbe orumu kinie kanoko yu ambolko liku ka-mele siku Yesusi kolomba unju-peramo liku pendekona ola nosinjikulie “Imu menjiku yu lombili aki-liku pui!” niringi.

27 Yambo aisili yu lombili puringi. Ambo mare yu toko konjingímunge kola teliku puringi.

28 Kanu-kinie Yesusini topele topa kanu ambomando nimbendo: “Jerusalleme-amboma, ene na kolombomonga pilkulie kola naa teangi! Ene-eneno kinie enenga ambolangoma kinie ulu pe wendo ombámonga pilkulie kola teangi!^k

29 Aku-sipu nikirumu, nambemuna nikiruye? Niembo! Walse ene Jerusalleme yamboma ˻teko kenjiku mongo limelemonga umbuni singí˼ walemo wendo ombá kinie ene kinie enenga ambolangoma kinie mindili nonge kinie yambomane ningindu: “Ambo ambolango te naa mengo, ambolango ame naa siku, wayongono molemele amboma, enenga ambolango te mindili nombá ene naa kanongemonga ene maloya.” ningí.^l

30 Pe

31 ˻Nimbelie pe kamu ungu-iku te topa enendo nimbendo:˼ “Unju konde angilimomo peko tokomele. Aku lemu pe unju kololimu nambe-tengeye?ⁿ Akumunge ˻enene ene aku-siku umbuni singí, mindili nonge˼.”

32 Ye talo pea ‘Yesusi kinie kolangi!’ ningu unjuna ola uku toko panjingindu mengo puringi. Aku yetolo mongo liringili yetolo.

33 Kolea ‘Penge-Ombele’ níline oringi kinie yu kinie mongo liringili yetolo kinie unju-pera yepokonga ola uku toko panjiringi. Mongo liringili yetolonga te Yesusi yunge ki-umbukundu uku toko, te Yesusi yunge ki-tarokondo uku toko panjiringi.

34 Aku teringi kinie Yesusini nimbendo: “Tara, na-kinie tekemele mele akumu yambomane naa pilkimili kene nuni tekemelemonga “Mindili nangi!” naa ningu siye koloi!” nirimu.

35 We-yamboma enene yu-kinie teringi mele kanoko we angiliringi nakolo enenga ye-ailimene yundu ungu-taka tonjiku ningindu: “Yu yambo-wema ‘Naa kolko konde pangi!’ nimbe lipe taponjirimu mele kinié yuni ‘Naa kolopo unju-perana wendo pambo!’ nimbe yu-yuyu lipe taponjipe unju-perana wendo opili! Yu sike Pulu Yemone mako topa olio ‘Nokopa konjipili!’ nimbe lipe mundurumu ye-nomi Kirasimu omba molomu liemo kinié yu-yuyu aku-sipe lipe taponjipili!” niringi.

36 Ami-yema pea yu ungu-taka tonjiku molkolie no-waene kombili teli te ‘Nopili siemili!’ ningu singí tekolie

37 yundu ningindu: “Nu Juda-yambomanga ye-nomi-kingi molonu liemo ‘Naa kolopo unju-perana wendo wambo!’ ningu nu-nunu liku taponji!” niringi.

38 ‘Yu mongo lirimu mele yamboma kanangi!’ ningu

39 Mongo liringili yetolo unju-perana ola uku toko panjiringi yetolonga tene Yesusindu ungu-taka tonjipelie nimbendo: “Nuni “Pulu Yemone mako topa olio ‘Nokopa konjipili!’ nimbe lipe mundurumu ye-nomi Kirasimu ˻molio.” nilino mele sike molo móloye? Sike aku-siku˼ moleno liemo nu kinie olto kinie pea ‘Naa kolamili!’ ningu liku taponjiku unju-perana wendo li!” nirimu.

40 Nakolo mongo liringili yetolonga tene yuni nirimu mele pilipelie yu iri topalie nimbendo: “Nu kinie yu kinie telu-siku mele mindili nongo kolongele mele tengimunge Pulu Yemo pipili naa kolkonoye?

41 Nu kinie olto tepo kenjirimbulumunge mindili papu síngi. Nakolo i yemo yu mongo te naa lirimu.” nirimu.

42 Aku nimbelie yuni ˻Yesusindu˼ nimbendo: “Yesusi, nu ye-nomi-kingimu molko mélema nokokolie ninimuni, na pilí!” nirimu kinie

43 Yesusini pundu topa yundu nimbendo: “Nane nundu paa sike nimbu sikirumu: Kinié nu na-kinie pea Yamboma Molko Konjilimele Kolea Peangana^o pupu molombolo lemo.” nikiru.” nirimu.

44-45 Yesusi unju-perana ola we pepili ai-tangoli ena tuwellepo killoko terimu kinie kolea pali sumbulu topalie pe ipupini ena tere-killoko terimu kinie ena kelepa topa kolea tangorumu. ˻Ulu aili te walsikale wendo orumula. Pulu Yemo popo toko kaloringi˼ ulke-tembele ˻Jerusalleme suku angilirimu akuna sukundu Pulu Yemo molorumu˼ suluminia paa kake telimunge kerepuluna ˻‘Yamboma sukundu naa pangi!’ ningu ou alieli˼ mulu-wambale aili tene pipi siku panjiringi angilirimu. Kanu mulu-wambalemo ai-suku-singine maniendo-sipe olá-topa ulsu purumu.^q

46 Yesusini ungu te tondolo-mundupe nimbendo: “Tara, nanga minimu ‘Nu molenona opili!’ nimbu nu sikiru.” nirimu. Aku nimbelie yu kolorumu.

47 ˻Romo˼ ami-ye wane-anderete nokorumu ye te Yesusi toringi ami-yema nokopa molorumu kanu yemone Yesusi ungu te nimbe kolorumu mele pilipe kanopalie yuni Pulu Yemo kapi nimbelie nimbendo: “I yemo yu paa sike ye konopu sumbi nili te lepamo.” nirimu.

48 Kanu-kinie ‘Yu unju-perana uku toko panjingí kanomolo.’ ningu ou liku máku toringi yamboma yu terimu mele kanoko bulu-balu ningu ungu aisili konopu liku munduku kondo kololiku ulkendo puringi.

49 Yu kinie ou tapu toko andoringi yema kinie, kolea Gallilli-Disiriki munduku kelko yu lombili andoko ˻Jerusalleme˼ pea oringi amboma kinie^r enene ˻yu-kinie teringi kolorumu mele˼ sulu-teko kanoko angiliringi.

50-51 Yesusi kolorumu kinie ye te, yunge imbi Josepo, yu Juda-yambomanga kanjollo ye-aili te molopa, ulu-peangama manjipe tepa molorumu. Yu konopu sumbi-nili ye te, kolea Judia-Disiriki Arimatia-taono yemo. Yu ‘Pulu Yemo ye-nomi-kingimu molopa olio nokomba walemo^t wendo opili!’ nimbe nokopa molorumu yemo. Yu Juda-yambomanga kanjollomo sike molorumu, nakolo kanjollo-yemane ˻ou ene-eneno kote pilkulie˼ “Yesusi kolopili!” niringi kinie^u yuni “E.” naa nimbe we molorumu.

52 Kanu yemone ˻Romo-gapomano ye-nomi˼ Paillate molorumuna pupelie “Yesusinge ónomo na si!” nimbe mawa terimu.

53 Paillatene “Kapola.” nirimu kinie Josepo pupe ónomo manie lipe, mulu konde tene lipe ondopalie, kou-kande tenga memba pupe suku nosirimu. Aku kou-kandena yambo-óno te ou naa nosiringi, yu mindi pulu-pulu nosirimu.

54 Yesusi óno terimu wale akumu kinié mele, opali mele ˻ koro moloringi˼ Wale-Sambatemo^v nondopa wendo ombá terimu. Sambate-Walemo wendo ombá kinie koro molongendo kinié mele mélema liku undu-undu siringi walemo wendo orumu, aku walemonga Yesusi ono teringi.

55 Ou Yesusi-kinie kolea Gallilli-Disiriki munduku kelko yu pea ˻Jerusalleme˼ oringi amboma Josepone Yesusi óno terimu kou-kandemo kanoko akuna suku ónomo nosirimu mele nemo-nemo ningu kanokolie niringimuni,

56 pe kanoko pora sikulie yando ongo, ‘Yunge ónona kopongo-welema kinie méle lupe mune tolime kinie kanjinjemili!’ ningu teko mimi teringi. Nakolo Sambate-Walemo wendo orumu kinie Pulu Yemonga ungu-manemone