YESUSINI UNGU-IKU MARE TORUMU UNGUMA
Yesusini Ungu-Iku Mare Torumumanga Pulu-Pulu Ungumua
4
(Kolomongo-kanga wane. Pulu Yemonga ungumu.)
Walse Yesusi altopa Nomú-˻Gallilli˼ kélona pupe yamboma mane-sipe molorumu kinie yambo paa aisili yu molorumuna ongo máku toko moloringimunge nona andoli sipi te lerimumunge suku pupe manie molorumu, yamboma nomú-kélona angiliringi.
2 Yuni enendo ungu aisili nimbe simbendo ungu-iku pokore torumu.
Ye Tene Langi-Umbu Poniena Tanda Sirimu Ungu-Ikumub Kinie
Yesusindu “Ungu-Ikuma Nambemuna Tolenoye?” Ningu Walsiku Piliringi Temanemoc
“Ye tene rasi-witi umbu poniena andopa tanda sirimu.
4 Tanda silipe andorumu kinie umbu mare aulkena manie purumu, kanuma keramane ongo liku noringi.
5 Umbu mare kou perimuna manie pupelie ma wallo-kolte mindi lerimu-na nondopa mulie topa wendo orumu.
6 Nakolo pulkeno naa mundurumu-na ena terimu kinie kanuma kolorumu.
7 Umbu mare kombulu siri-ka mele molorumuna manie purumu, siri-ka melemo wendo omba witi-umbuma topa norumu-na omba peanga naa lepa mongo te naa torumu.
8 Umbu mare ma peangana manie purumuma wendo-wendo omba akopalie mongo peangama torumu. Mare mongo tokapu-telu mele topa, mare mongo tokapu-yepoko mele topa, mare tokapu-kise mele torumu.” ˻nirimu.˼
9 Aku nimbelie “Yambo komu-peo lemomane i ungumu piliei!” nirimu.
10 Pe we-yamboma pali puringi kinie yu lombili andoli ye engaki-rurepo kinie yambo mare pea yu-kinie moloringime kinie, enene yu walsikulie ningindu: “Nu yambomando ungu te ninindu nambemuna ungu-iku tolenoye?” d niringi.
11-12 Yuni enendo pundu topa nimbendo: “Pulu Yemo ye-nomi-kingimu molopa yamboma kinie mélema kinie nokolemomonga ulu-pulue ou yuyu pilirimu kanu ulu-puluma ‘Kinié ene ˻na lombili olemele yamboma˼ piliengi!’ nimbelie ene nimbe sikimu. Nakolo ulsu molemele yamboma ‘Unguma nimbu siembo!’ nimbulie ungu-ikuma mindi topo silio.
˻Pulu Yemone Aisayanga kerena nimbendo:˼
‘Ene mongone kanokolie, kanoko imbi naa silimele;
komuni pilkulie, pilku imbi naa silimele.
Konopuni pilkulie alowa telemelka kinie,
˻Pulu Yemone˼ enenga ulu-pulu-kerime
‘manie pupili!’ nimbe siye kolka.’f
nirimuAisaya 6:9-10
akumunge we yambomando ungu-ikuma mindi tolio.” nirimu.
13 Aku nimbelie Yesusini enendo kelepa nimbendo:
“Ungu-iku topo nindug akumunge ungu-pulumu naa pilimeleye? Akumu naa pilkulie we ungu-ikumanga pali ungu-puluma nambe teko pilingíye? ˻Ungu-ikumunge pulumu i-sipe:˼
14 Langi-umbu tanda sirimu yemone tanda sirimu umbuma ˻Pulu Yemonga˼ ungumu.
15 Umbu mare tanda sirimu aulkena manie purumuma yambo mare aku-siku mele molemele. Enene ungumu pilimele kinie pe ˻kurumanga nomi˼ Seteneneh sumbi-sipe omba ungu tanda sili konopuna pupe pelemoma wendo limo.
16 Aku-sipela, umbu mare tanda sirimu kou perimuna manie purumuma yambo mare aku-siku mele molemele. Enene ungumu pilkulie walsikale sumbi-siku konopu siku pilku limele.
17 Nakolo ene pulkeno naa mundukulie ungumu laye-kolte mindi pilku molemele. Pe ene konopuna umbuni telemo kinie molo ene ˻Pulu Yemonga˼ ungumu pilku liku molemele mele yambo-lupemane kanoko keri kanokolie ungu-taka tonjiku teko kenjiku mindili silimele kinie enenga pilimele unguma siye kolemele.
18-19 Umbu mare tanda sirimu siri-ka mele molorumuna manie purumuma yambo mare kepe aku-siku mele molemele. Enene ungumu pilimele nakolo konopuna umbuni telemo umbunime kinie, méle aisili nosikulie ‘Aku mélemane olio lipe taponjilimo taponjimbe.’ ningu pilku molemele uluma kinie,i méle naa nosilimelema waka kolko ‘liemili!’ konopu lemele ulu mare kinie, kanu-sili ulu mare wendo omba ungu kanumu topa nolemo kinie ungumuni uluri naa tepa langi-mongo naa tolemo.
20 Umbu mare tanda sirimu ma peangana manie purumuma, yambo mare aku-siku mele molemele. Enene ungumu pilkulie ungu-pulumu pilku konjiku ungumu kamu pilku limele. Pe ene langi-mongo mele tolemo. Kanu yambo marenga langi mongo tokapu-telu mele topa, yambo marenga mongo tokapu-yepoko mele topa, marenga mongo tokapu-kise mele topa, aku-sipe tolemo.j
˻Ungu-ikumunge ungu-pulumu aku-sipe.˼” nirimu.
Tepe-LLamemonga Ungu-Ikumuk
21 ˻Aku nimbelie ungu-iku te pea topa nimbendo:˼
“Yambomane tepe-llame kandokolie mingine suku panjilimeleye? Molo polo maniekondo nosilimeleye? ˻Mólo! ‘Kolea pa tepili, kolea kepe mélema kepe kanamili!’ ningu˼ polo tenga ola nosilimele kanumu.
22 Aku-sipe mele, kinié lopi telemo mélema pe walse mona lemba yamboma kanonge; kinié aki topa lemo mélema pe walse pa temba kinie yambomane kanu mélema kanonge.
23 Yambo komu-peo lemomane ˻ungu nikirumu˼ piliei!” ˻nirimu.˼
24 “Enene ungu pilimele akumu mimi-siku piliengi! Enene mélema yamboma silimele mele ˻Pulu Yemone˼ ene aku-sipe méle kalomba. Mare olandopa simbela.
25 Mélema nosilimo yambomo nane mare pea simbu, yu paa aisili nosimbe. Nakolo mélema naa nosilimo yambomo yu nosilimoma kepe wendo limbu.”l nirimu.
Pulu Yemo Ye-Nomi-Kingimu Molemomonga Ungu-Iku Talo
Te: Langi-Umbuma Mulie Topa Omba Ai Lemomonga Ungu-Ikumu Kinie
Te: Unju-Masetete Umbumunge Ungu-Ikumum
26 Yesusini ungu te pea nimbendo:
“Pulu Yemo ye-nomi-kingimu molopa yamboma nokolemo akumun i-sipe mele:
“Ye tene langi-umbu mana tanda silimo.
27 Aku yemo ipulueli uru pepa, tangoli ola molopa ˻andopa kongono tepa˼, telemo kinie langi-umbu tanda silimoma mulie topa omba ai lemo nakolo aku-sipe telemomonga pulumu yemone nimbe naa kanopa naa pilimo.
28 Langi-umbu tolemoma mamone yu-yuyu ‘wendo opili!’ nilimo. Ou kumbi-lepa mulie tolemo. Pe gomo tolemo. Pe langi-mongo tolemo.
29 Pe langi nou lemo kinie ‘Langi inie topo sukundu-sukundu limbu walemo wendo okomo.’ nimbelieo langi-umbu tolemo yemone langi inie tolemo. ˻Pulu Yemo ye-nomi-kingi molopa yamboma nokolemo aku-sipe molemo.˼” nirimu.
30 Pe Yesusini enendo kelepa nimbendo:
“Pulu Yemo ye-nomi-kingimu molopa yamboma nokolemo akumu nambolka mélte mele niemboye? ‘Yu kingimu molopa yamboma nokolemo mele piliengi nimbu siembo!’ nimbulie nambolka ungu-ikumu topo niemboye?” ˻nimbelie nirimumuni, altopa ungu-iku te pea topalie nimbendo:˼
31 “Pulu Yemo ye-nomi-kingi molopa yamboma nokolemo akumu unju-masetete umbu mele. Yamboma langi-umbu poniena mundulimelemanga pali unju-masetete umbumu yu paa kangamo.
32 Nakolo poniena mundulimele kinie wendo omba ai lemo kinie poniena molemo mélemanga pali yu paa ailimu. Kamu ai-lepa unju-mele angilimo kinie kerama kanu unju-kolamanga ongo pelemele. Pulu Yemo ye-nomi-kingimu molopa yamboma nokolemo mele aku-sipe.” nirimu.
Yesusini Ungu-Ikuma Mindi Torumumunge Ungu-Pulu Tep
33 Yesusini unguma yamboma nimbe simbendo ungu-iku aisili aku-sipema topa sirimu. Ene manda pilingí mele topa sirimu.
34 Ene ungu te nimbe simbendo ungu-iku te mindi torumu. ˻Ungu te sumbi-sipe naa nimbe sirimu.˼ Nakolo yu kinie yu lombili andolime kinieq ene-eneno moloringi kinie yuni yunge ungumanga puluma pali ene sumbi-sipe nimbe para sirimu.
Poporome Aili Te Torumumuni Yesusinge Ungumu Pilipe Lirimu Temanemor
35 Kanu walemonga kolea kala torumu kinie Yesusini yu lombili andoli yemando nimbendo: “Nomú nekendo pamolo!” nirimu kinie
Jesus Calms the Storm (Mark 4:35-41)
36 nona andoli sipi tenga Yesusi ou suku molopalie unguma nirimus akuna suku yu we molopili nomú-kélona máku toko moloringi yamboma munduku kelko yu mengo puringi. Sipine puringi kinie sipi mare pea puringila.
37 Kanu-kinie, nomúna pungí puringi kinie poporome paa aili te nomúna torumu. Aku terimu-na nomúmu apisipe ola ombalie no sipine sukundu-sukundu omba peke lepalie sípimu memba nona manie pumbe terimu,
38 nakolo Yesusi sipimunge bulkundu penge-kanda wale tenga we uru mindi perimu. Yu lombili andoli yemane yu toko makinjikulie ningindu: “Ungu-Mane Sílimu, olio no wangopo kolomolomonga nu mini wale naa pukumuye?” niringi.
39 Yu makilipelie poporomemo iri topa nomúmundu nimbendo: “Taka lelko moloi!” nirimu kinie poporomemo topa kelepa nomúmu lope naa tepa paa we lerimu.
40 Kanu-kinie yuni lombili andolimendo nimbendo: “Ene nambemuna mini-wale mundukumiliye? ˻Telio mele wale aisili kanolemele nakolo˼ yandopa kinié kepe ‘Olio naa nokombanje.’ ningu na tondolo-munduku naa pilimeleye?” nirimu.
41 ˻Yuni terimu mele kanokolie˼ yemane mini-wale munduku pipili aili-teko kolkolie anju-yando eneno walsikulie ningindu: “Apa! I yemo naenje? Poporomemone kepe nomúmuni kepe yunge ungumu pilku liku kelkembele.” niringi.