17
˻Pulu Yemonga mumindili kololi ulume perimu˼ mingi yepoko pakera ou ambolko moloringi angellomanga tene na molorundune ombalie nimbendo: “Ambo wapora toli awilimu, no awisili omba pulimomangaa ola molemomo, aku-sipe telemomonga mindili singe limbe mele lipu ora siembo ou!” nirimu. 2 “Mana moloringi ye-nomi-kingime kinie yu-kinie wa ulu kerinele teringi; we yembo mana moloringime kinie yu wa ulu kerinele terimumunge no-waene nongo kekelepa tolemele mele aku-siku kekelepa toringi.” nirimu.b3 Kanu-kinie pe na molorundune Minimu omba ambolorumu kiniec angellomone na kolea ku lieline memba purumu kinie akune ambo te méle-takera kondoli tenga bulu mingine molorumu kanorundu. Aku méle-takeramonga kangine imbi awisili molorumu, aku imbime Pulu Yemo marake teko ungu-taka tondoringi imbime molorumu. Aku mélemonga penge yepoko-pakera kinie ˻kongi-kao ungú mele˼ ungú rureponga talo kinie angilierimu.d 4 Aku ambomo ambo-kamako nomime pakolemele mele wale-pakoli kondoli talo-pakera, kou-gollo kinie kou kangi lupe-lupe kololi kou-mone awili-tepa pulimoma kinie siripelu kake tepa kou-mone awili-tepa pulimoma kinie akumene yu animbe molorumu.e Yu no-mingi kou-gollone teli te ambolorumu, aku mingimunge sukundu yu wa-ulu-kerinele terimumunge mele paa keri kalaro mololi awisili pepa peke lierimu. 5 Yunge mambelena yunge imbi molorumu, aku imbimu ungu-iko te molorumu, akumu i-sipe:
BEPILLONOf PAA AWILIMU, WAPORA TOLEMELEMA-KINIE
MANA-YEMBOMANE ULU-PULU PAA KALARO MOLOLI KERIME
TELEMELEMA KINIE ENONGA ANUMU
nimbe molorumu. 6 Pulu Yemonga yemboma kinie, Yesusi ‘Yu sike.’ ningu pilku yunge ungume andoko yemboma ningu siringi yemboma kinie, aku-siku teko moloringimunge kanu ambomone eno topa kondorumu. Yembo te no tondolo nombalie kekelepa tolemo mele yuni eno torumumenga memema omba purumumunge yu paa konopu sipe kekelepa mele torumu.
Akumu kanopolie paa mini-wale mundupu konopu awisili lipu mundorundu. 7 Aku terindu kinie angellomone nimbendo: “Nu nambemu-ne konopu awisili liku mundukunuye? I ambomo kinie méle-takera penge yepoko-pakera kinie ungú rureponga talo kinie angilimomone ambomo memba pulimomo akuselonga ungu-pulumu nu nimbu siembo! 8 Méle-takera kanonumu ou molorumu, kinié naa molemo, pe kowa-muru te paa lepa mindi pupe naa pora nilimomonga wendo omba yu kolomba aulkena pumbe.g Mana-yembo mare, mamo ou wendo naa opili Pulu Yemone molopa mindi puli bokuneh imbi naa torumu naa molemo yembomane kanu méle-takeramo kanokolie, ou molorumu kinié naa molemo nalo kelepa wendo ombá kinie kanokolie konopu awisili liku mundunge.
9 “Mimi siku konopu kimbu siku pilinge yembomane imunge ungu-pulumu pilingenje.i Penge yepoko pakera akume ambomo manie molemo ma pangi yepoko pakera.j 10 Penge yepoko pakera akumenga pulu talo sipemo ye-nomi-kingi yepoko pakera. Aku kingimenga kise pakera koloringi; te kinié we molemo; te ou wendo naa oli. Nalo yu wendo ombá kinie wale laye-kolte mindi kolea nokopa molomba. 11 Méle-takera ou molorumu kinié naa molemo akumu ye-nomi-kingi engaki sipemo. Yu kinie kingi yepoko pakera kinie eno talape telumu, yu kolomba aulkena pulimo.k
12 “Ungú rureponga talo kanonu akumu ye rureponga talo ou ye-nomi-kingi naa molko koleama naa nokolemelema. Nalo pe méle-takeramo kinie pea eno ye-nomi-kingi nambama likulie ena mongo telu mindi koleama nokonge. 13 Kingime enonga konopu telu sipe pepili molkolie, enonga tondoloma kinie kolea nokonge nambama kinie méle-takeramo singe. 14 Eno Sipisipi Walomol kinie opa tenge, nalo Sipisipi Walomone eno topa manie mundumbe. Yu ye awilimenga ye awili olandopamo, yu ye-nomi-kingimenga kingi olandopamo molopa, yuni ou mako topa ‘Nanga yemboma molangi waa!’ nirimu-ne yuni nilimo ungume tondolo-munduku pilku lombili pulimele yemboma yu-kinie tapu toko puringi-ne eno topa manie mundumbe.” nirimu.
15 Aku nimbelie angellomone nando nimbendo: “Nu no omba pumu, akumenga ola ambo wapora tolemomo ola molomu, aku noma yemboma kinie yembo talapema kinie yembo kangi lupe lupe angilimoma kinie yembo ungu lupe lupe lemele yemboma kinie.m 16 Méle-takeramo kinie ungú rureponga talo kinie kanonu akumenen ambo wapora tolemomo-kinie konopu keri panjikulie, yu paa teko kenjiku ‘Yu we-we andopa molopili!’ ningu mulumbalema pali kulunduku, yunge kangine míndi mare toko nongo, ‘yu kamu tepene nopili!’ ningu kalonge. 17 Pulu Yemone ‘Kingime yunge kongonomo tendangi!’ nimbe ‘konopuni pilku teangi!’ nimbe pilierimu mele enone aku-siku pilku ‘eno kinie méle-takeramo kinie konopu telune pupili molamili!’ ningu enonga koleama nokonge nambama méle-takeramo singe. Eno aku-siku teko molangi Pulu Yemone ‘Wendo opili!’ ou nimbe panjerimu ungume wendo ombá. Kanu-kinie enonga kongonomo pora nimbé.
18 “Ambo kanonumu mana molemele ye-nomi-kingime pali nokolemo kolea paa awilimu.”o nirimu.