Pollone I Pepá Topa Sirimumunge Ungu Pulu Mare

Pollo kinie yuni pepá topa sirimumenga ungu-pulu mare inie yakondo gomo 714 molemo.

Pollo ka-ulkena pepalie ipepámo topa sirimu (1:13-14). ‘Ka-ulkena pepalie Epesasi, Pillipai, Kollosi yembomanga pepáma topa, ye Pillimononga pepámo topa sirimu.’ ningu pilimele. Ka-ulke temunje, naa pilimolo nalo yembo marene pilkulie ‘Romo molopalie pepáma torumu.’ ningu pilimele (Lipe Mundorumu Yema 28:14-31).

Pollo ou-pulu-pulu kolea-awili Pillipai orumu temanemo Lipe Mundorumu Yema 16:8-15 molemo. Pepámo paa pe mele torumu. Pillipai akumu Masedonia poropinji lierimu kolea-awili te. Kambani bisinete kongono akune paa teringi. Romo yembo awisili akune molko, Juda-yembo paa koltalo moloringi.

Pillipai yemboma-kinie umbune te pepili Pollone ipepámo naa torumu. Ungu mare nirimu akume i-sipe:

Ungu Te: Kirasi pilieli Pillipai yembomane kou-mone mare ‘Pollone kongono telemomo lipu tapondamili!’ ningu, siku mundoringimunge eno-kinie “Ange.” nirimu (1:5, 4:10-19).

Ungu Te: ‘Kirasinge yemboma molemelemonga mindili nolemele akumu konopu tondolo pupili molko, kele toko mini-wale naa munduku konopu siku molangi!’ nirimu (1:27-30, 4:4-7).

Ungu Te: ‘Imbi naa mololi yemboma mele molko, anjo-yando taka liku yembomanga ungume pilku konopu telune pupili molangi!’ nirimu (2:1-11, 4:2-5). (Pulu Yemone mako topa “Pu.” nimbe mana lipe mundorumu ye nomi Kirasi Yesusi akumunge ungu awili paa tondolo te 2:5-11 molemo, akumu paa kanou!)

Ungu Te: ‘Timoti kinie Epapodaitasiselo ongele kinie konopu siku “Pea tapu topo molamili!” niengi!’ nirimu (2:19-30).

Ungu Te: ‘Ye mare eno-kinie molko ungu-mane mare kolo toko siringimenga ungume pilku naa liee.’ nirimu (kolomongo awili 3).

Ya ungu-pulumu pora nikimu.