Konopu Talo Peli Kolo Toli Yemanea Ulu Peangama Telemele Mele Temolo Kinie Pulu Yemone Olio Méle Naa Kalomba Ungu Mare Akumunge
Ulu Kake Telimenga Ungu Pokore Akumunge
Yembo Koropa Pulime Lipu Tapondomolomonga Ungu Te
6
(Kolomongo-kanga wane. Pulu Yemonga Ungumu.)
˻Yesusini ungu mare nimbe molopalie nirimumuni, ungu mare pea nimbendo:˼b
“ ‘Yembomane ‘Olio yembo paa peangama. Ulume paa tepo kondolemolo.’ ningu kanangi!’ ningu yemboma kanoko molangi enonga ulu peangama paa naa teangi! Aku-siku tenge kinie yembomane eno kapi ninge. Kanu kapi ninge ungume enonga méle kalolimu lingemonga enonga mulú-koleana molemo Lapamone eno méle naa kalomba.c
2 “˻Enonga mulú-koleana molemo Lapamone aku-siku tenge yemboma méle naa kalomba˼ kene enone yembo koropa-púlime kondo kolko ‘Lipu tapondamili!’ ningu kou-mone te singendo ‘Temolo mele yembomane kanangi!’ ningu, ru ningu mélte naa siengi! Topele-mapele toli yemaned ‘Na yembomane kapi niengi!’ ningu yemboma máku toko Pulu Yemonga ungumu pilieli ulkemanga kinie aulkemanga kinie we-yembo awisilini mongone kanangi yembo-koropama liku tapondolemele. Aku yemane telemele mele enone aku-siku naa teangi! Nane enondo paa sike nimbu sikiru: “Aku telemelemonga eno yembomane kapi nilimele ungume enonga méle kalolimu koronga limele.”e nikiru.
3 “Nalo enone yembo-koropama kondo kolko melte singendo ‘Yembomane paa naa kanangi! Yembo te pea tapu topo andolembolomone kepe naa kanopili, lopi tepo kiyengo nimbu lipu tapondambo!’ niengi!
4 Kanu-kinie yembomane naa kanangi, tenge mele yembo te naa ningu sikulie koropa puli yembo te liku tapondonge kinie enonga ˻mulú-koleana molemo˼ Lapamone lopi teko telemele ulume kanolemomone eno méle kalomba.” ˻nirimu.˼
Pulu Yemo-Kinie Popo Topo Ungu Nimbu Mawa Temolomonga Ungu Tef Kinie
Langi Naa Nongo We Moloringi Ulu-Pulumunge Ungu Te
5 “Eno Pulu Yemo-kinie ungu ningendo topele-mapele toli yemaneg Pulu Yemo-kinie ungu nilimele mele aku-siku naa teayo! Kanu topele-mapele toli yemane ‘Na ye paa peangamo molio mele yembo awisilini mongone kanoko na kapi niengi!’ ningu yemboma máku toko Pulu Yemonga ungu pilieli ulkemanga kinie aulkemanga kinie yemboma kanoko molangi konopu siku angilku Pulu Yemo-kinie popo toko ungu nilimele. Nane enondo paa sike nimbu sikiru: “Aku-siku telemelemonga eno enonga mele kalolimu koronga limele kanumu.”h nikiru.
6 Nalo eno Pulu Yemo-kinie ungu ningendo enonga suluminiana sukundu puku nambune sikulie kanu lopi teli koleana enonga ˻mulú-koleana molemo˼ Lapa naa kanolemele yemo-kinie ungu nieyo! ˻Yu akune molemo.˼ Aku tenge kinie enonga ˻mulú-koleana molemo˼ Lapa lopi teko telemele ulume kanolemomone eno pe méle kalomba.
7 “ ‘Na Pulu Yemo-kinie ungu niembo!’ ningulie Isirele-talapemonga ulsu molemele yembomanei enonga kurume molo pulu ye kolo tolime kinie ungu ningendo we-ungu awisili nilimele mele aku-siku naa teangi! Kanu yembomane ‘Na ungu awisili nimbo kinie pilimbe.’ ningu aku-siku nilimele kanumu.j
8 Enonga ˻mulú-koleana molemo˼ Lapamo ou mawa naa teangi eno mólo tolemo mélema yuni pilipe kanolemo kene kanu yembomane telemele mele aku-siku naa teangi!
9 “Eno Pulu Yemo-kinie ungu ningendo i-siku niengi:
“Olionga mulú-koleana moleno Tata,
yembomane ‘Nu imbi ola molopa
ye kake teli peangamo moleno.’
ningu molangi!
10 Nu ye-nomi-kingimu molko
yemboma nokoni walemok wendo opili!
Nunge ungumu mulú-koleana pilku liku telemele mele
aku-siku ya ma-koleana pilku liku teangi!
11 Olio kinié langi nomolo mele kinié siyo!
12 Yembomane olio teko kenjengi kinie
siye kolopo ulu te naa temulu mele
aku-sikula olione nu tepo kenjemulu ulume
siye kolko olio ulu te naa teyo!l
13 Olio ‘Ulu tene kondi topili!’ naa ningu
ulu-kerimenga pali ulu-pulumu pelemo ˻kuru˼munim
‘olio naa ambolopili!’ ningu yunge kíne wendo liyo!
(Nu koleama kinie mélemanga pali
ye-nomi-kingimu molko,
tondolo olandopamo nu-kinie pepa,
nu imbi paa olandopa molopa
nu-kinie pa tondolo-tepa tepili
alieli molko mindi pulino kene
aku-sipe tepili!)”n
ningu aku-siku Pulu Yemo-kinie ungu niengi!
14 “Yembomane eno teko kenjinge ulume ‘We manie pupili!’ ningu siye kolongi liemo enonga mulú-koleana molemo Lapamone enonga ulu-pulu-kerime ‘Manie pupili!’ nimbe siye kolombala.
15 Nalo yembomane eno teko kenjinge ulume ‘We manie naa pupili!’ ningu siye naa kolongi liemo enonga ˻mulú-koleana molemo˼ Lapamone enonga ulu-pulu-kerime ‘Manie naa pupili!’ nimbe siye naa kolombala.” ˻nirimu.˼o
16 “Eno langi naa nongo mi toko we molonge ulu-pulumu tengendo topele-mapele toli yemanep ‘Na nono nimbu molambo.’ nilimele mele aku-siku naa niengi! Kanu yemane ‘Na langi naa nombondo mi topo molio mele yembomane kanangi!’ ningu eno kumbi-kere teko enonga kumbi-kerema teko kenjiku molemele. Nane enondo paa sike nimbu sikiru: “Kanu yemane aku telemelemonga yembomane eno kapi nilimele ungume enonga méle kalolimu koronga limele.”q nikiru.
17-18 “Nalo eno langi naa nongo mi toko we molongendo ‘We-yembomane na aku tekero mele naa kanangi! Tatane manjipe kanopili!’ ningu we-yembomane kanonge ulume naa teangi! Aku tenge kinie enonga ˻mulú-koleana molemo˼ Lapa lopi teko telemele ulume kanolemomone eno méle kalomba.” ˻nirimu.˼
Pulu Yemonga Mélema Konopu Kimbu Sipu Molopo Mana-Mélema Konopu Kimbu-Sipu Naa Molamilimunge Ungu Te, Akumunge
Mulú-Koleana Mélema Nosipu Mana-Mélema Konopu Naa Mondopo Molamilimunge Ungu Te, Akumunge
Méle Kande-Kandema Mulú-Koleana Nosilimolomonga Ungu Ter
19 “Ya ma-koleana méle nosilimelema urelo tepa koka molo lkurinia mélemane ongo teko kenjiku, wa lili yema ongo mélema wa limele kene ‘˻ya mana˼ kamako molopo méle kande-kandema lipu nosiemili!’ ni naa niengi!
20 Aku naa tekolie mulú-koleana mélema urelo naa tepa koka molo lkurinia méltene omba tepa naa kenjipe, wa lili yema ongo wa naa limele kene eno mulú-koleana ˻pe pungemonga˼ ‘méle kande-kande pe limoloma ou liepili!’ ningu ya ma-koleana ulu-peangama teko molangi!
21 Enonga nosilimele mélema lemo kolea akune eno konopuni pilku konopu mondoko molemele kene ˻‘mulú-koleana mindi mélema liepili!’ ningu molangi!” nirimu˼.
Yembomanga Mongomo Tepe-LLame Melemonga Ungu Tes Kinie
Yembo Tene Ye-Awili Talonga Kongono Walsikele Manda Naa Tembamonga Ungu Te
22 “Nunge mongomo nunge kangimunge tepe-llame mélemo. Aku-kene nunge mongo peanga angilimo kinie nu kangi pali pa tepili moleno kinie nu molko kondoleno.
23 Nalo nunge mongomo keri lemba kinie nunge kangi pali sumbulu topili andoni. Kanu-kinie nunge kangine pa teli pembamo alowa tepa sumbulu tomba kinie akumu paa kamu sumbulu tomba.” ˻nirimu.˼
24 “Yembo tene ye awili talonga kongono lipe tere lepa manda naa tendemba. Ye awili te konopu keri panjipe, te konopu mondomba. Molo aku naa temu liemo ye awili tenga ungu nimbéma paa konopu sipe pilipe lipe kongono nimbéma tondolo-mundupe tendepa, te konopu keri panjipe yunge ungu nimbéma ta nimbé. Yembomane Pulu Yemonga kongonomo kinie Kou-Monemonga kongonomo kinie liku tere leko manda naa tendenge.t
Yesusini “Na Lombili Andolemelema, Mini-Wale Munduku Konopu Awisili Naa Leaa!” Nirimu Ungumuu
25 “Akumunge nane eno ˻tenge mele˼ nimbu siembo: ‘Kangikundu molopo kondamili!’ ningu konopu awisili liku naa mundengi! Langi nongemonga kepe no nongemonga kepe mulumbale pakongemonga kepe akumenga konopu awisili liku munduku naa molangi! Eno kapola molonge mele ulu-pulumu langi kinie mulumbale kinie mindiye?
26 Kerama kaname! Langi te panjikulie nou lemo kinie liku mengo ulkendo puku nosiku naa nolemele nalo eno yembomanga mulú-koleana molemo Lapamone kerama langi silimo. Kerama we-mele eno yemboma olandopamonga yuni eno naa nokombaye?
27 Enonga yembo tene konopu awisili lipe mundumbemone yu kolomba ena te manda ‘We liepili!’ nimbéye? Manda naa nimbé.
28-29 “Eno pakonge mélemanga konopu awisili nambemune liku mundulimeleye? Pillawa-sindime mana olemo mele eno naa kanolemeleye? Pillawa-sindimene kongono mindili siku naa teko, mulumbale te teko mimi naa telemele nalo pillawa-sindime molemele mele olandopa, ˻ye-nomi-kingi˼ Sollomonov kongono awisili tepalie wale paa peangama pakopa a nirimu mele maniendopa.
30 Era-sindi tolemoma kinié mele molemo, opali mele poroko tepena kalemelema Pulu Yemone aku-sipe nokopa kondolemo liemo eno ‘Pulu Yemone olio manda nokombanje.’ ningu laye-kolte mindi pilimele yemboma pakonge mélemanga yuni manda lipe naa tapondombaye? Eno paa sike lipe tapondomba.
31 “˻Pulu Yemone kerama kinie era-sindime kinie aku we-mélema aku-sipe nokolemo˼ kene eno konopu awisili liku mundukulie ‘Esi, langi te tena lipu nomolonje?’; molo ‘No tena kolopo nomolonje?’; molo ‘Wale-pakoli te tena lipu pakomolonje?’ ningu pilku naa molangi!
32 Pulu Yemonga yemboma naa molko ulsukundu molemele yembomane aku-siku telemele nalo enonga mulú-koleana molemo Lapamone eno yunge yembomanga méle mólo tolemoma kanopa molemo.
33 ˻Eno langi nongemanga kinie mulumbale-pakongemanga kinie konopu naa liku munduku,˼ Pulu Yemo ye-nomi-kingi molopa yemboma nokolemow ulume kinie yu kanopa kake telemo kanolemo ulume kinie mélema kinie ‘Kumbi lepo teambo!’ konopu leko molangi! Aku tenge kinie yuni we-mélema kepe eno simbe.
34 Yuni aku temba kene ‘Opali nambe-embonje?’ ningu kinié konopu awisili liku naa mundengi! Opalimunge langi molo mélema aku opali, kiniémonga langi molo mélema kinie, opalimunge kinie, liku tere leko naa piliengi! Enamanga yu-mele-mele umbunema pelemo pembama kanu enamanga mindi. Kinié umbune wendo ombáma kinie, opali talou umbune wendo ombámanga kinie, tere leko konopu liku naa mundengi!” ˻nirimu.˼