Paulo Filipo wamêtiri maka Macedônia di'tapɨ niirí makakãharãre ohâkɨ niîwĩ.

Too dɨpóropɨre tii makápɨta Jesu Cristo yee kitire werê, kɨ̃ɨ̂re ẽho peóri kurakãharã sãhakã́ weékɨ niîwĩ. Romapɨ bu'îri da'rerí wi'ipɨ niîgɨ, ohâkɨ niîwĩ.

Tii makákãharã Jesu Cristore ẽho peórã kɨ̃ɨ̂re niyéru wee tamú'kere wãkûgɨ, naâre “Ãyú'” niîkɨ niîwĩ. Naâ teé niyérure Paulore Romapɨ niigɨ́re Epafrodito me'ra o'ôo'kãrã niîwã. Kɨ̃ɨ̂ papéra miáari masɨ niîkɨ niîwĩ. Be'ró Paulo tiropɨ dutitía wa'âkɨ niîwĩ. Tohô wa'akã́, Paulo kɨ̃ɨ̂re ko'tê, be'ró Filipopɨ o'ôo' tõrokɨ niîwĩ taha.

Paulo tii makákãharãre ohâgɨ, neê kã'ró mehêkã uúkũ ma'atikɨ niîwĩ. E'katísere, naâ ãyuró ẽho peóse pe'ere uúkũ yɨ'rɨ nɨ'kakɨ niîwĩ. “Mehô niirã́ niî' niisére wãkûya”, niîkɨ niîwĩ. Tohô niikã́ Jesu Cristore ẽho peórã keoró weeyá niisére ohâkɨ niîwĩ.