Anyapan cäniyücunätam
5
Sumäta uyalipäcuy cäniyücuna:
ñacayniquicuna śhamunanpïta waꞌapäcuy,
awćhupäcuy.
2 Canan cäniquicunapis ismüśhañam.
Müdanayquipis puyup camacäśhañam.
3 Chay illayniquipis,
üruyquipis ismüśhañam.
Chaycunam cuntrayqui cäralpuśhunqui;
cawsayniquitapis nina-yupaymi mana caśhanman lluy cutichishunqui.
Amcunamari śhamü muyuncunäpälä sumä-sumä tawacälälinquipis.
4 ¡Ćhaclayquićhu lulachiculcäśhayqui nunacunäta mana pägaśhayquipi ayacuyninmari sumä munayniyu Tayta Diospa linlinmanlä ćhälun!
5 Ćhipïsha cananpä wirayäcänümi cay pachäćhu sïbacuyalcanqui sumä alli cäniquicunawan śhunꞌuyquip munayllanćhu wañuyniquipä.
6 Jinaman allin cacü nunacunätam cäraycul,
mana cutipacü-camacta wañuyman ćhulapäculanqui.
Jesuspa cutimuyninta pasinsiawan alcaycuy
7 Chaynu cayaptinpis,
chalapacü-masïcuna,
Jesusninchic cutimunancama pasinsiawan alcaycäliy.
Maynümi talpucü nuna pasinsiawan alcaycun sumä ćhaniyu talpuynin ishpinancama tamyaca caycunanta,
chaynu-ari amcunapapis pasinsiayniqui caycuchun.
8 Masïsu tacyaycäliy Jesusninchicpa cutimuynin cayllaćhüña cayaptinꞌa.
9 Chalapacü-masïcuna,
mana cäraycuśha canayquipá quiquiqui-pulacuna ama-ari jamuyänacuyaychu.
Chay Sumä Cäraycü Fisca puncullaćhüñam cacuyan.
10 Cuyaśhá chalapacü-masïcuna,
Tayta Diospa una-unay willacünincunap ñacaynincunaćhu pasinsiayninta atiycachishun.
11 Má,
chay pasinsiayniyücunäta Tayta Diosninchicpa llaquipayninćhu cushicuyninćhu cayäta yaꞌanchicmi licanchic.
Yaćhanchicmi Job ñacayninćhu pasinsiawan caycuśhanta,
ñatac chaypi Taytanchic imanuypa uycuśhantapis.
Caywanmari licachimanchic maynu maynu llaquipayniyu,
allin śhunꞌuyu pay caśhanta.
12 Ñatac lluy imapïtapis,
cuyaśhá chalapacü-masïcuna,
ama-ari imactapis limalicuyaychu janay pachäta,
nï cay pachäta,
nï imallactapis śhaycaycachilꞌa.
Mana cäraycuśha canayquipá limayniqui juc pasällari cachun “aw” ütac “manam” nïlla.
Chalapacuywan mañacuśhun
13 Ñatac mayanniquipis llaquićhu cayalꞌa Tayta Diosta mañacuy.
Mayanniquipis cushisha cayalꞌa taquicunawanpis alawaycuy.
14 Chaynütac mayanniquipis ishyapäculꞌa caminaycücunäta ayaculcay Jesusninchicpa pudirnin cayninwan asaytiwan llushiycul mañaculcänanpä.
15 Chalapacuywan mañacuptinꞌa Taytanchicćha sänaycachinꞌa.
Juchan captinpis pampachaycunꞌam.
16 Ñatac quiquiqui-pulacunari juchayquicunacta ninacaycälil jucniqui jucniquipä mañaculcay allin caycälinayquipä.
Diospa śhunꞌunpänuy cawsäcäpa jicutaywan mañacuyninꞌa callpayümi.
17 ¿Manachun willacü Elias yaꞌanchicnu nunalla cala?
Pay Tayta Diosta jicutaywan mañacuptinmi quimsa wata partin śhutuycuyllapis nï tamyamulachu.
18 Chaypi yapa mañacuptinꞌa tamyamulatacmi,
talpuycunapis ishpilatacmi.
19-20 Cuyaśhá chalapacü-masïcuna,
cayta yalpapäcuy:
mayanniquipis rasuncäpi pintïsha cayaptin,
cutichimücá wañuycäpäña cäcätaćh salbaycunꞌa.
Jinaman maynu juchancunactapis pampachaycachinꞌaćh.