Mana allincunäwan ama cunchawaychu
4
Canan ¿quiquiqui-pulacunaćhu ćhïninacuycuna lïtunacuycuna maypïtá śhalcamun?
¡¿Manachun śhunꞌuyquićhu cä mana allin munayniquicuna lüchanacuśhanpi?!
2 Amcuna maynu wañupacuyalpis manam taliycälinquichu.
Masqui wañuchiyta jicutayalcal,
wañupacuyal,
lüchanacuyal maynu-maynüpa umayquip śhalcuyalpis manatac munaśhayquita talipäcunquichu.
Rasunpa nï uywanquichu Tayta Diosta mana mañaculcalmá.
3 Ñatac mañaculpis mana ćhasquipäcunquichu juyu śhunꞌuyquiwan aychayquip munayllanpä captinmá.
4 ¡Pasaypi ipanchäcuna!
¿Manachun yaćhapäcunqui cay pachap cunchawänin cayniquiwan Tayta Diospa ćhïnicünin caśhayquita?
Mayanpis cay pachap cunchawänin cayta munäcunacá Tayta Diospa ćhïnicüninmanñam licalïlun.
5 ¿Icha yanꞌalchun isquirbishancunaćhüpis niyan:
“Ćhulamäśhanchic ispiritunmi wañuy-wañuy payllapäña munamanchic” nil?
6 Ñatac Tayta Diosꞌa llaquipayninwanmi allincäćhu canapä masta callpanchaycamanchic.
Chaymi Diospa shiminćhüpis niyan:
“Nunatucücunätá Tayta Diosmi śhaycachin;
mana nunatucücunätam ichá llaquipayninwan yanapaycun”a nil.
7 Chayurá Diosllanchicpa maquillanman-ari ćhulacuy.
Jinaman supaycäta awantaycuptiquiꞌa ayicunꞌam.
8 Tayta Diosninchicman aśhuycälimuy;
chayćha paypis aśhuycälimuśhunqui.
¡Jucha-sapacuna,
maquiquita paꞌacänuy,
mana allin lulayniquicunacta caćhaycuy!
¡Ishcay cäracuna,
śhunꞌuyquita allichaculcay!
9 ¡Juchayquipïta llaquiculcay,
waꞌapäcuy,
awćhupäcuy!
¡Chay asicaćhacuyniquitapis waꞌacuyman-ari muyuchiy;
cushicuyniquitapis llaquicuyman-ari muyuchiy!
10 Ñatac Taytanchicman-ari uyshuycäliy altuman julaycälishunayquipä.
11 Chalapacü-masïcuna,
ama-ari jamuyänacuyalcaychu.
Mayanpis chalapacü-masinta jamuyäcá ütac cäraycücá camachicuytapis jamuyayanmi,
cäraycuyanmi.
Chaynu camachicuytapis cäraycuyalꞌa manañam lulaycüninchu canqui sinuꞌa cäraycüninñam.
12 Ñatac jucllay cäraycamäninchic salbaycamäninchiccällamari camachicuyta uycüca,
cäraycüca cayan.
Chayurá ¿mayantucultan juccunacta jamuyal cäraycuyanquiman?
Śhamücunaćhu ima pasanantapis manam yaćhanchicchu
13 Canan sumäta uyalipämay “Canan muyun wala muyun wic malcactam cay malcactam lishun;
chayćhümi wata intiru alli-allin nigusyucunacta lulal illaypa janallanćhu caśhun” nïcuna.
14 Amcuna manamá yaćhapäcunquichu wala muyun ima pasanantapis.
¿Imamá cawsayninchic?
Pucutaynüllamá,
rätulla licalilcamul chincacüllamari.
15 Chaymi limayniqui caynu canman:
“Tayta Dios munaptinꞌa cawsaśhunmi;
jinalćha caytapis wictapis lulaśhun” nil.
16 Amñatacmi ichá yaćhätucul quiquillayqui nunatucuyanqui,
alawacuyanqui.
Chaynu nunatucuy manamá allinchu.
17 Chayurá mayanpis allin lulana caśhanta yaćhayal,
mana luläcá juchactam lulayan.