Chaycuscacta lluytapis cuyaycuśhun
2
Cuyaśhäcuna,
sumä altuman juluycuśha cä Jesusninchicman chalapacü-masí cayalcalꞌa ¿imanuypatá chaycuscacta lluytapis mana licaycälinquimanchu?
2 Má,
juntunaculcäśhayquiman sumä allin cäniyu puydïnin nuna sumä müdapacüśha,
üru surtijawan surtijapacüśhalä canpis yaycamuchun.
Jinaman juc waccha nuna pasaypi lataśh müdanallanwan yaycamuchun.
3 Jinaptin chay allin cäniyücäta sumätalä atindiycul “Taytay,
cayman-ari täcucuy” nil allinninmanlä taycaycachinquimanpis.
Chay wacchätañatac “Munalꞌa chay chayćhu täcamuy,
ütac wic wicćhu śhäcuy” nil niyalcanquimanpis.
4 ¿Chayurá manachun juc-jucpa licanacuyalcanqui?
¿Manachun śhunꞌuyquip mana allin munayninwan licaycuyanqui?
5 Cuyaśhá chalapacü-masïcuna,
uyalipämay.
¿Manachun Tayta Dios cay pachäćhu wacchacunäta aclala chalapacuyninćhu rïcu cananpä,
jinaman cuyacünincunapä limalicuśhan gubirnunćhülä capäcunanpä?
6 Chaynu cayalcaptinpis amcunam ichá wacchacunäta uyshulächipäcunqui.
Ñatac cäniyücunacá ¿manachun ñacachipäcuśhunqui?
¿Manachun prinsipal yaśhacunämanpis aysapäcuśhunqui?
7 ¿Manachun chalapaculcäśhayquipa sumä-sumä śhutintapis jalutacuyalcan?
8 Ñatac isquirbishancunaćhu sumä-sumänin camachimäśhanchic “Quiquiquitanuy nuna-masiquita cuyacuywan licaycuy”a nishancäta lulalꞌa allincätam lulayanqui.
9 Juc-jucpa licaycuyalñatacmi ichá juchacta lulayanqui.
Chayurá Tayta Diospa camachicuyninta jalutacuśhayquipïmá quiquin camachicuynin cäraycuśhunqui.
10 Mayanpis Tayta Diospa lluy camachicuyninta cäsucuyalpis jucllanta mana cäsuycülulꞌa llapan camachicuyta jalutacuśhannüñamá juchachäśha cayan.
11 Ñatac “Amam mansibacunquichu” nïcämi “Amam nuna-masiquita wañuchinquichu” niyanpis.
Chayurá mana mansibaculpis nuna-masinta wañuchïcá Diospa camachicuyninta jalutacülunñam.
12 Jinamanꞌa julaycamäninchic camachicuywan cäraycuśha cananchicta umanchicćhu uywaycul-ari licacuycuśhun limayninchictapis lulayninchictapis.
13 Mayanpis mana llaquipaycücá,
mana llaquipaycuśhatacmi cäraycuśha canꞌa.
Juccunäta llaquipaycücämi ichá cäraycunan muyuncäćhu imapi mana manchacunan canꞌachu.b
Chalapacuyninchicta mana camalaycachishá wañüśham
14 Cuyaśhá chalapacü-masïcuna,
“chalapacümi cá” niyalpis lulaynin mana captinꞌa ¿ima allinmá?
¿Chay chalapacuyllan salbaycunꞌachućh?
15 Má,
jucnin chalapacü-masinchic micuypi pishïsha,
müdanapi palpüśha cayächun.
16 Jinaptin ima pishipacüśhallantapis mana uycul:
“¡Imay śhunꞌulla,
jawcallari caycuy;
unuy-unuyllacta müdaculcul maćhaycunayquicama micucuycuypis!”
nil nishanchicꞌa ¿imapämi bälillan?
17 Chaynümi chalapacuyninchicpis,
lulayninchicćhu mana wayuycachishá pasaypi wañüśha cayan.
18 Ñatac waquinnin ninꞌaćh:
“chalapacuyllanchicpam” nil,
waquinninꞌa “lulaycuyllanchicpam” nil.
Yaꞌañatacmi ní:
¡Má,
imactapis mana lulallalꞌa chalapacuyllayquita camalaycachimay-ari!
Yaꞌañatacmi ichá allin lulaynïpa tantiaycachishä chalapacuyní caśhanta.
19 Chaynütac amcuna jucllaylla Tayta Dios caśhanta quiripäcuśhayquicá allinmi.
Chaynüllá aśhta supaycunäpis quiripäculmi chucchupäcun.
20 Tullu umacuna,
chalapacuyninchic ¿mana imactapis lulaptinchicꞌa imapäpis nï bälï caśhanta licaycachinactalächun munayalcanquipis?
21 Má,
¿manachun lulayninpa awquillunchic Abrahamta Tayta Dios allinpa licaycula chay chulin Isaacta wañuycäpä uycuśhanpa?
22 ¿Manachun chalapacuynin lulayninwan cusca caycula?
Cay lulayninpamari chalapacuynin sumä camalaycachisha tacyaycachisha cala.
23 Cay lulayninpam lulacacüla:
“Abraham Tayta Diosman chalapacuptinmi allinpäña ćhasquiycula”c nil isquirbishanca.
Jinaman “amigun” nishalämi cayculapis.
24 Licay-ari,
chaynümá lulayninchicpa nunaca allinpa licaycuśha canchic;
manam chalapacuyllanchicpachu.