Santiago Cartacuśhan
1
Tayta Diospawan Duyñunchic Jesuspa nunan Santiagoma limaycälimuc ćhunca ishcayniyu ayllu jinantin pachäćhu chiꞌisha caśhta-masïcunapä.
Sasachacuycunäćhu imanuy cawsananchicpäpis
2 Cuyaśhá chalapacü-masïcuna,
imaymana sasachacuycuna śhamuptinpis allinniquipä caśhanta licaycul-ari sumäta cushiculcay.
3 Yaćhapäcunquiñamá chaycuna chalapacuyniqui licaycuśha cananpä śhamuptin sumä pasinsia wayuycunanta.
4 Jinaman chay pasinsiayniqui ćhaycuchun cabalalpunancama mana imallapis pishiycü,
cabal allinña capäcunayquipä.
5 Ñatac mayanniquipäpis caycunapi tantiayniqui sumä mana captinꞌa Tayta Diosninchicta mañaculcaptiquiꞌa uycälishunquim.
Payꞌa mañacünincunactá mana chalat-chalatyallalmi ćhani-ćhaninta uycun.
6 Ñatac mañaculꞌa mana ishcayyällal sumä chalapacuyniquiwan mañacuy.
Mayanpis ishcayyäcá lamar yacüta wicman cayman waywa apaycaćhaśhancänümi cayan.
7 Chaynu cäcunacá Taytanchic uycunanpïta manañamá ćhasquipäcunan canñachu.
8 Chaynu ishcay śhunꞌuyu nuná manamá jucllayllaćhu caycunmanchu.
9 Ñatac mana cäniyu chalapacücá Tayta Diosninchic altuman juluycuśhuśhayquipïta sumä cushicunayquim.
10 Chaynütacmi sumä cäniyu chalapacücunäpis Tayta Dios uyshulächiptinꞌa cushiculcänan.
Sumä cäniyücunacá jaćhacunäpa chaqui camacä waytannüllamá cayalcan.
11 ¿Manachun inti allicta lupämuptin ulacunäpa maynu tuqui-tuqui waytanpis chaquïlul śhuśhülun?
Chaynümari maynu-maynu cayninpis chincälun.
Chaynu mana alcaśhancäćhümá rïcucunäpa ima cänincunapis chincacunꞌa.
12 Maynu cushicuymi mana allinta lulachiy munaśha cayalpis allincäćhu tacyaycücäpá;
chaynu Tayta Diosta cuyäcunaca wiñay simpri allin cawsay limalicuśhan primiuctalämi ćhasquiycunꞌapis.
13 Ñatac mayanpis mana allincäta lulayta munapäcuyalꞌa ama-ari “Tayta Diosmi cayman aysacayäman” niyaychu.
Manam Diostá pipis mana allincäman aysaycunmanchu,
nïtac quiquinpis aysaycunmantacchu.
14 Aśhwanpa śhunꞌunćhu mana allin munaynincuna jicutämuptinmi quiquillan aysaycachicun.
15 Cay mana allin munaycäpïmi yalamun juchaca.
Chay juchap quillan ćhämuptinñatacmi wiñay wañuyca yalamun.
16 Chayurá cuyaśhá chalapacü-masïcuna,
ama-ari quiquillayqui chaycunapi ingañacuyalcaychu.
17 Aśhwanpa lluy-lluy ima allinnin allin uycamäśhanchicꞌa janay pachäćhu acchicunäta camä Tayta Diosninchicpïmari śhayämun.
Payꞌa jucman-jucman mana muyullalmi jinalla caycun.b
18 Paymi munala sumä limayninwan muśhü cawsayta uycamaptinchic,
lluy camaśhancunäpi wamä sumä-sumänin wayuynincuna caycunanchicpä.
Ama limaylla limaśhunchu, aśhwanpa lulaycuśhun
19 Chaymi cuyaśhá chalapacü-masïcuna,
linliqui uyat-uyatlla caycunman allinta uyaliycälinayquipä.
Limayniquiwan piñacuyniquim ichá ñacaytalä caycunman.
20 Chay nunap piñacuynin manamari Tayta Diospa śhunꞌunpänüchu wayuycun.
21 Chaymi lluy imaymana anlacunäta,
mana allin sumä timpücunäta wicapaycul,
mana nunatucullal salbaśhüniqui allin willacuy śhunꞌuyquićhu talpüśhäta cäsucunayqui.
22 Ñatac ama-ari ingañacuyalcaychu “Taytanchicpa willamäśhanchicꞌa uyaliycunallanchicpämi” nil.
Aśhwanpam nimäśhanchicta lulayman ćhulaycunanchic.
23 Mayanpis chay willacuyta mana lulaycul uyaliylla uyalïcá juc nuna ispïjućhu licacücänümi.
24 Chayćhu caśhancamallá imanuy caśhantapis licacülunmi;
muyulcul-pachañatac imanuy caśhantapis unꞌälun.
25 Ñatac chay julaycamäninchic allin willacuyllaćhu śhunꞌunpis caycuptinmi ichá,
jinaman mana unꞌallal chayćhu masïsu tacyaycul lulaycücäpá,
maynu sumä jatun cushicuymi lulayninpi canꞌa.
26 Ñatac mayanpis “Dios munaśhannülämi cawsacuyá” nilpis shiminta mana sujitacücá quiquillanmi ingañacuyan;
chalapacuyninpis yanꞌalpämá.
27 Chayurá Tayta Diospa munaśhanmannuy sumä chalapacü chuyaña cäcunacá,
caynümi cawsaycun:
wacchacunätawan japanyäśhacunätam yanapaycun,
mana allincunäwanpis manatacmi anlatacunchu.