Camacalpunäpä caycunacta yalpapäcuy
13
Quiquiqui-pula wawi-caśhanuy jinallari lluy cuyanaculcay.
2 Chaynütac jamachiytapis ama unꞌapäcuychu;
chaypamari waquincuna mana tantial anjilcunactalä jamachipäcula.
3 Chaynütac carsilcäćhu cäcunäta watucaycäliy,
quiquiqui carsilcäćhu cayä-yupay,
chaynütac quiquiqui ñacä-yupay ñacäcunätapis.
4 Ñatac lluypis casaracuśhayqui limalicuyniquita ama jalutacuyalcaychu.
Aśhwanpa chuyallacta caycachipäcuy.
Ñatac mansibacücunätapis imaymana anla luläcunätapis Tayta Diosmi cäraycunꞌa.
5 Amatac illaycällamanñá atipacuyalcaychu;
aśhwanpa capuśhuśhayquillawan jawca capäcuy;
Taytanchic niyanmari:
“Manam caćhaycuśhayquichu nïtac unꞌaśhayquichu”a nil.
6 Chayurá masïsu chalapaculmi nichwan:
“Yanapaycamäní Taytá cayaptinꞌa manam manchacüchu.
¿Nunacunalla imanämanꞌatá?”b
nil.
7 Chaynütac Tayta Diospa limayninta willaycul caminaycälishüniquicunacta yalpaćhaculcay.
Paypa lluy cawsaynin imanuy caśhantapis licaycul,
chalapacuyninta atichipäcuy.
8 Jesusninchicꞌa unaypis cananpis śhamücunäćhüpis wiña-wiñaypä payllam.
9 Amatac imaymana iwïsha muśhünuy cä yaćhachicuycunäwan aysachicuyalcaychu.
Micunapä imaymana camachisha cäcunäta atiycachishanchicnuꞌa,
aśhwanpa Diosninchicpa llaquipayninwan śhunꞌunchic tacyaycachisha cachun.
Chay micuycunacá manam ima allintapis lulaycunchu.
10 Yaꞌanchicpañatacmi ichá juc uycuna sityu juc licchä micuywan cayan;
chaypïmá micunchic.
Unay limalicuypa alawana carpaćhu sirbï sasirdüticunäñatacmi ichá chaypi micunanpä nï cunsintishachu.
11 Chay puydï sasirdüticunaca malcäpa juchan pampachaycuśha cananpä yawartam apaycula chay Sumä Chuya Sityuman.
Aychannintañatacmi malcapi waśhaman julalcamul cañapäcula.
12 Chaymari Jesusninchicpis malcapïta julüśha ñacala,
nunacunäpa juchanta yawarninwan chuyanchaycunanpä.
13 Chayurá yaꞌanchicpis malcapi waśhaman Jesusninchicman lishun paynuy pinꞌayman ćhulaśha caśhanta apawshishtin.
14 Aw-ari,
cay pachäćhuꞌa manam wiñaypä malcanchic canchu,
sinuꞌa wiñaypä cäcätam ashiycuyanchic.
15 Shiminchicwan “lisïmi” niyalꞌa chay shiminchicwan Jesuspa imaypis Tayta Diosninchicta alawaycuśhun-ari
16 Ama-ari unꞌapäcuychu allincäta lulayta,
pishipacücunäta cäniquicunawan yanapaycuytapis.
Cay uycuśhanchiccunämari Tayta Diospa śhunꞌunpä.
17 Chaynütac caminaycälishüniquicunacta uyalicul sujitaculcay.
Paycunam allinpa licaycälishunqui lulaśhanpi niycunan cayaptinꞌa.
Uyalicuyniquiwanmari cushichipäcunqui;
mana uyalicuyniquiwanꞌa paycunapä sasaćh capäcunqui.
Amcunapäpis ima allinniquipäpis manaćh canꞌachu.
18 Má,
yaꞌacunapä Taytanchicta mañaculcay;
śhunꞌú imaniycamänan caśhanta yaćhaculpis lluywanpis mayćhüpis allinpa caycäliytam munapäcú.
19 Mastá ćhuncay-ćhuncayta mañaculcac amcunawan yapa tincuycunanchicpä mañaculcänayquipämi.
20-21 Diosninchic jawcacta cawsaycachïca,
wañuycäpi Jesusta śhalcachimüca,
sumä puydï Michïman muyuycachïca,
yawarninwan muśhü limanacuyta amcunawan tacyaycachï Taytallanchic-ari,
lluy imawanpis tantiaycälichishunqui munaśhanta lulapäcunayquipä,
jinaman yaꞌanchicćhu lulaycuchun śhunꞌunpä cäcunätapis.
Jesusninchicpa wiñay simpripä altuman juluycuśha cachun.
Chaynu cachun.
22 Chalapacü-masïcuna,
callpanchaculcänayquipä ashllacta canan niycälishacta sumä tantiaywan licaycäliy.
23 Yaćhapäcuy-ari chalapacü-masinchic Timoteo carsilcäpi yalämuśhaña caśhanta.
Pay ćhämuptinꞌa amcunaman watucaycälïmi śhapämuśhä.
24 Llapa caminaycälishüniquicunacta limaycäliy,
jinaman Diosninchicpa llapa nunancunactapis.
Chaynütac chalapacü-masinchic Italia-läducuna limaycälimuśhunqui.
25 Tayta Diosninchicpa llaquipaynin amcunawan caycuchun.
Chaynu cachun.