Tayta Diosmi chulincunacta ishpiycachin
12
Chayurá caynu sumä achca-achca licäninchiccuna muyülïninchicćhu cayaptinꞌa atajaycaćhamäninchiccunätawan,
ćhänalächimäśhanchic juchacta juc-lädumanña caćhaycul,
jicutaycuywan puntaman lishun ćhänanchiccama.
2 Chalapacuyninchicta allaycachï,
tacyaycachï Jesusllanchicmanñari ñawinchicta ćhulaycuśhun.
Pay cushicuyta ćhasquinanta licalmi curuśhcäćhu sumä uyshulächisha cayalpis imactapis mana ucul awantaycula.
Chaypam cananꞌa Tayta Dios caśhancäpa allïnin-lädunćhu täcuyan.
3 Chayurá jucha-sapacuna sumä cuntraculcäśhan Jesustari licaycäliy mana jucmanyapäcunayquipäpis nï pishipapäcunayquipäpis.
4 Ñatac amcuna juchacunäwan pilyayniquićhu manam yawarniquita jićhaycapäcunquilächu.
5 Jinaman ¿lluyñachun unꞌälälinqui am chulincunacta Dios callpanchaycuśhunayquipä isquirbishanta,
imatá?
Niyanmari:
“Taytayqui allinniquipä sumäpa ishpiycachishuśhayquita ama jamuyaychu,
anyaycuśhuptiquipis jucmanyaychu.
6 Taytanchic cuyaycuśhancunätam sumäpa ishpiycachin;
chulinpä ćhasquishancunätam asutiycun”a nil.
7 Chayurá ñacaycuna pasapäcuśhuśhayquita allinniquipäri licaycäliy;
Tayta Diosꞌa chulintanümi uywaycälishunqui.
¿Mayan chulillactá allin cananpä taytan manatan sumäta ishpichinchu?
8 Ñatac lluy chulipis ishpiycachina cayaptin amcunacta jinallacta caćhaycälälishuptiquiꞌa ishunćha cayalcanqui;
manaćhá chulinchu.
9 Chaynütac uchuchälla cayal taytanchicta allinpa licayculanchic sumäpa ishpiycachimaptinchicpis.
Chaychun ¿cawsayta umäninchic taytanchicpa munayninman ćhulacuycul-lä mana cawsaycuchwanchu ampá?
10 Cay pachäćhu taytanchiccuna tantiaśhallanmannümi rätullapä caminaycamälanchic.
Ñatac Tayta Diosꞌa rasun allinninchicpämi ishpiycachimanchic,
quiquinnuy sumä chuya caycunapä.
11 Rasunpa ima ishpiycachiyćhüpis sasam;
manamá chayurallá cushicuy canchu,
sinuꞌa,
nanacuymá.
Chaypïtam ichá chaymannuy allin cayta,
jawca cayta wayuycun “allinnïpämi” nil ćhasquiycücunäpá.
12 Chayurá uticäśha maquiyü-yupaycuna,
chucchuyä ćhaquiyü-yupaycuna,
callpanchaculcay.
13 Ama-ari caminuyquiman yanꞌal imacunactapis ćhulayaychu mitcacacachishunayquipá.
Sinuꞌa pishi callpayqui allinyaycachisha caycuchun.
Tayta Diosta ama ipanchapäcuychu
14 Lluywanpis jawca cawsaytawan chuya allin cawsaycäta ashiycäliy.
Chaynu chuya mana cayalꞌa manamari mayanpis Taytanchicman ćhanꞌachu.
15 Chaynütac quiquiqui-pulacuna licanacaycäliy Tayta Diospa llaquipayninta mana ipanchapäcunayquipä.
Ama-ari ćhacćhä mana allin jaćha chillquimücänuy amcunaćhu cachunchu.
Chay ćhacćhayninwanćhari achca nunacunap allin cawsayninta lluy bininälunꞌa.
16 Nïtac mayanniquipis anla juchacunacta lulayalcaychu,
nïtac Esaüpanüpis Diospi imactapis mana ucul cay pachällaćhu śhunꞌun cayächunchu.
Paymari wamä chuli allin ćhasquinancäta ash micuyllapä uycüla.
17 Yaćhapäcunquiñamá ima pasaśhantapis:
chay allin cayninta ćhasquiyta munaptin masqui maynu-maynüpa awćhuptinpis manañam cäsu calañachu.
18 Amcuna manamá Israelcunänüchu aśhuycapämulanqui yataycuna nï nina latayä ulumanchu,
nïtac tutapämanchu,
nïtac yanawyayä pucutaymanchu,
nïtac sumä waywamanchu,
19-20 nïtac curnitillacta sumä tucalpamümanchu,
nïtac Dios limalpamümanchu.
Chay “¡Cay uluman nunapis uywapis jaluycämuptinꞌa tamshaywanpis wañüchisham canꞌa!”
nil nilpamuśhanta uyalilmari,
manaña awantayta atipal,
mañaculcäla masta manaña limalcamunanpä.
21 Chay sumä-sumä manchanaśh captinmari quiquin Moisespis “Sumä ispantäśham chucchucuyá”b nila.
22 Amcunañatacmi ichá aśhuycapämulanqui Sion uluman,
janay pacha Jerusalenman,
cawsä Tayta Diospa malcanman,
sumä cushisha juntulayä walanganpi-walanganpi anjilcunäman.
23 Chaynütacmi punta wamä chalapacücunäpä janay pachäćhu śhutin isquirbïsha cäcäman,
lluytapis cäraycamäninchic Diosman,
allinman chuyanchaycuśha nunancunäman.
24 Chaynütac muśhü limanacuyta ishpichï Jesusman,
ñatac Abelpa yawarninpi mas allincunactalä limä yawarninmanpis.
25 Chaymi limapämäninchicta yanꞌal-lätac jalutacuyalcanquiman.
Cay pachällaćhu nishancäta jalutacücunäca mana ayiyaptinchun ¿janay pachäpïlä niyämaptinchic ipanchälulꞌa ayïluchwan,
ampá?
26 Chay timpu Diosninchic limayninwan cay pachäta sumämi śhaśhächila.
Ñatac cananꞌa niyan:
“Canan yapam śhaśhachishä,
manañam allpällactachu,
sinuꞌa lluy janay pachantintañam” nil.
27 Cay “yapam śhaśhachishä” nishanwan tantiachimanchic lluy camaśhancunaca śhaśhalcachil julüśha canantam,
mana cuyü wiñaypä cäcunalla quïdanantamá.