3 Chaynütac yaśha walmicunäpis capäcunman:

Diosllapä sumä cawsaycü-camam,

mana waśha limacü-camam,

mana upyayta pulicü-camam,

aśhwanpa allincäta yaćhachicü-camam.

4 Chaymi lasac walmicunätapis wayapantawan wawincunacta cuyayta yaćhaycachinan.

5 Chaynütacmi allin pinsayniyu cayta,

allin chuya śhunꞌuyu cayta,

wasinta sumäpa licaycuyta,

alli nuna cayta,

wayapanman sujitacuyta yaćhaycachinan.

Chayćha Tayta Diospa allin willacuyninta mayanpis mana jamuyänan canꞌachu.

6 Chaynütac müsucunätapis limapaycuy allin tantiay-sapa sumäpa cawsapäcunanpä.

7 Amꞌa lluy imaćhüpis sumä allin licachipäri caycuy.

Yaćhachilpis tincüllanman rasuncällacta sumäpa yaćhaycachiy.

8 Imam cäcällactatac willacuy;

chayćha ćhïnicücunaca uyshulapäcul imallactapis mana nipäcuśhunayqui canꞌachu.

9 Llapa uyway nunacunätapis limapaycuy,

patrunninta cäsuculcänanpä,

śhunꞌunpänuy caycälinanpä,

ñatac mana shimi-sapa capäcunanpäpis.

10 Amatac patrunnincunap imantapis chalayäpuchunchu,

aśhwanpa chalapacuna capäcuchun.

Chayćha Salbaycamäninchic Tayta Diospa yaćhachicuyninta sumä-sumä tuquicta waytaycälichinꞌa.

11 Tayta Diosninchicmari llaquipayninta camalaycachin jinantin pachäćhu nunacunäta salbaycunanpä.

12 Llaquipayninmari cay pachäćhu mana allincunäpi wanachimanchic.

Jinamanꞌa mana allincälla cayä pachäćhümi allin tantiaywan,

Tayta Diosllap munayllanćhu cawsachimanchic.

13 Jinaśhancamam sumä wañupacuśhanchicta cushisha alcanchic:

sumä Dios Salbamäninchic Jesuspa sumä cutimuynintamá.

14 Paymi yaꞌanchic-laycu wañuycäman quiquin ucula llapa mana allincäpi juluycul quiquinpa chuya malcanña cananchicpä,

jinal allincällacta lulaypi wañupacuyalcänapä.

15 Chayurá caycunacta yaćhachinayquipäpis callpanchanayquipäpis,

anyanayquipäpis cäsu canmi.

Ama-ari mayanwanpis jamuyächicuyaychu.