Titoman Pablo Cartacuśhan
1
1-2 Diospa nunan Jesusninchicpa jucnin puydï caćhan yaꞌa Pablom anman isquirbiycamuc.
Paymi caćhamäla aclaśhancunäta payman chalapacachinäpä,
jinaman allin cawsayta wayuycachï willacuyta yaćhaycachinäpäpis.
Cay rasuncämari wiñay cawsayta alcaycachin manalä imapis captin Dios limalicuśhanmannuy.
Payꞌa manamá articunchu.
3 Chalapacuna captïmá,
Salbacü Diosninchic unanchaśhan timpućhu “Caymi lulanayqui” nil allin willacuyta camalaycachinäpä caćhamäla.
4 Chaymari sumä chalapacü-masí Tito walaśhní canan isquirbimuc.
Quiquin Tayta Diosninchicwan Duyñunchic Salbacü Jesuspa llaquipayninpïta jawca cawsay amćhu caycuchun.
Caminaycücunaca imanuy capäcunanpäpis
5 Chay Creta malcaćhu caćhaycamulac allichaypä cäcunäta cäninman-cama ćhulalpunayquipämi,
chaynütac nishämannuy chalapacücunäpä puydï caminaycünincunactapis malcan-malcan ćhulaycunayquipämi.
6 Cay caminaycüca canman:
imapi mayanpis mana jamuyaycunallanpis cämi,
juc walmiyüllam,
chulincunapis chalapacü-camam,
jinaman munaśhanćhu pulicüpä nï pasaypi cullu-camapä uchuyllactapis licaycälinmanchu.
7 Cay caminaycüca Tayta Diosninchicpa lulaynincunacta licaycüca calmi allin tincüninman cawsaycunman mana mayanpis jamuyänanpä:
mana nunatucüśhalla,
imallapïpis mana piñacullal,
mana shincacullal,
pilyallacta mana ashiyal,
nïtac juyucunallawan gänaypi mana wañupacuyalcalpis.
8 Aśhwanpam canman:
wasinćhu jamaycachï,
allincällapi wañupacü,
allin cäninman tantiaycü,
allin tincüllanman lulaycü,
Tayta Diosllanchicpä cawsaycü,
quiquinta sujitacüpis.
9 Chaynütac yaćhachishan chalapacuna willacuyta śhunꞌunman ćhulaycü canman,
juccunactapis yaćhaycachinanpä,
chaynütac cuntracücunäwanpis sumä tincunanpä.
10 Rasunpa,
achcamá pasaypi cullucuna yanꞌal articunawan ingañacücuna cayalcan.
Mastá chay Israel caśhta aychanchicćhu siñalachicuypi wañuyäcunämi.
11 Chaycunap shiminta quillpänanchicmi,
mana yaćhachinacunacta wasintin-wasintin nunacunäta yaćhayalcächiptinꞌa.
Caytapis illayta juluyninwanlämi lulapäcunpis.
12 Caycunapi quiquin Creta malcapi willacüninpis malca-masincunapïta nila:
“Creta nunacuna casquish-camam,
chucaru uywacunanümi,
micuyllapi wañupacuyalcä illacunam” nil.
13-14 Cay nishanca rasunpam.
Chaymi chay yanꞌal yaćhachicücunäta sumäta anyanayqui,
chalapacuyninćhu allin cananpä chaynütac allincäta ipanchä Israelcuna yanꞌal apaycaćhaśhan cuintuncunacta camachicuynincunacta mana cäsuculcänanpä.
15 Ñatac allin śhunꞌuyu allin pinsayniyücäpá imapis allinmi.
Pasaypi śhunꞌuyu mana chalapacücunäpäñatacmi ichá imapis mana allinlla,
aśhta pinsayninpis,
pasaypi anla śhunꞌuyüllañam cayan.
16 “Diosllawanmi cayá” nipäcuptinpis,
lulaynincunañatacmi ichá mana tincunchu.
Chay pasaypi cullu-cama,
ćhïnisha-cama,
allincäta uchuyllactapis mana lulaycuyta atipä-camam.