Diospa pacacuynintam camalachin
3
Cay-laycumari canan yaꞌa Pablo carsilćhu wićhalayá Jesuspa allin willacuyninta am mana-Israelcunäman willaycälishacpïta.
2 Uyalipäculanquiñam Tayta Diospa llaquipayninta amcunaman apaycamunäpä nimäśhanta.
3 Cay pacaläcäta Diosninchic yaćhaycachimäśhanpïmari janayćhu uchucllacta isquirbiycälilac.
4 Cay cartacamuśhäta licaycälilꞌa tantiapäcunquim Salbacü Jesuspa cay pacacuyninta maynu allicta lisishätapis.
5 Cayta manam mayantapis unay lisiycachilachu.
Cananmi ichá Chuya Ispiritunpa puydï caćhancunactawan willacünincunacta camalaycachin.
6 Caymi chay pacacuynin:
Cay allin willacuypam juc caśhtacunäpis Israelcunap tücäninta ćhasquï-masin capäcunꞌa;
juc nunanüllamari caycälinꞌa;
jinamanmi Diosninchic Jesusninchicpa lluy limalicuśhancunätapis ćhasquipäcunꞌa.
7 Tayta Diosmi yaꞌacta llaquipaycul cay allin willacuyninta jinantin pachäman willaycunäpä jatun munayninwan ćhulaycamäla.
8 Masqui lluy chalapacücunäpi mana cäpa licaśhannin cayaptïpis Tayta Diosmi llaquipayninćhu cay Salbacü Jesuspi sumänin allin willacuyninta mana-Israelcunäman willaycunäpälä aclaycamäla.
9 Lluy imactapis lulä Tayta Dios una-unaypi pacacuyninta imanuypa camalaycachinanta camalaycachinäpämi aclaycamäla.
10 Chaynüpamari sumä-sumä yaćhayniyu caśhanta chalapacünincunawan tantiachinꞌa janay pachäćhu munayniyücunätapis.
11 Lluy caycuna cumplicacunanpämi una unaypi camachishancäta Salbacü Jesusninchicwan cabalalpun.
12 Cananmi ichá Jesuspa cayninchicwan chalapacuyninchicwan mana manchalillalña cunfiacuywan Tayta Diosninchicman aśhuycuchwan.
13 Chaymi amcuna-laycu sasachacuycunacta pasaśhäpi ama jucmanyapäcuychu,
aśhwanpa tantiapäcuy allinniquipä caśhanta.
Chalapacücunäpämi yapa mañacun
14-16 Cay-laycumari unꞌulacuycul janay pachäćhu cay pachäćhu cäcunäta juc ayllullaman ćhulaycämäśhanchic Taytanchicta mañacú caycunapä:
Pay sumä jatun cayninman tincüta Chuya Ispiritunwan śhunꞌuyquiman munayninta ćhulaycul,
callpanchaycälishunayquipä;
17-18 chaynütac Jesusninchic masïsu śhunꞌuyquićhu tacyaycachishunayquipä;
chaynu sumä sapichacüśha cuyacuyćhu tacyaycälil llapa chalapacü-masiquicunawan Jesusninchicpa cuyacuynin maynu-maynu altumanpis,
lulimanpis mana camacaycü sïlup camacaynincamapis caśhanta tantiaycälinayquipäpis.
19 Jinamanꞌa cay mana lisiyta atipäśhanchic sumä-sumä cuyacuyninta lisiycälinayquipä;
chaynütac Tayta Dioswan mana camacaycü juntay-juntayta quiquinta lisiycälichishunayquipäpis.