Efesoćhu Chalapacücunäman Pablo Cartacuśhan
1
Tayta Diospa munayninwan Jesusninchicpa jucnin puydï caćhan yaꞌa Pablom isquirbiyämú,
Taytallanchicpäña japächaycuśhan Jesusman chalapacü-masí Efesoćhu cäcunäpä.
2 Quiquin Tayta Diosninchicwan Duyñunchic Jesuspa llaquipayninpïta jawca cawsay amcunaćhu caycuchun.
¡Jesusninchic maynu maynümi llaquipaycamälanchic!
3 ¡Jesusninchicpa Taytan Dios sumä alawaycuśha cachun!
Paymi Jesusninchicćhu lluy imaymanactalä janay pachäpä allinninchicpä uycamanchic.
4 Payćhümi cay pacha manaläpis captin aclamälanchic mana juchayu chuyallactaña licaycamänanchicpä.
5 Paypa śhunꞌunpi yaluycamuśhanpam sumä cuyacuyninwan Jesusninchicćhu unanchaycamälanchic chulinpäña licaśha cananchicpä.
6 Chaymi maynu sumä llaquipayniyu caśhanta cuyay śhuñayninwan camalaycachimäśhanchicpi alawanchic.
7-8 Yawarninpa ćhaninwanmi juchanchicta pampachaycamälanchic.
Masqui lluy imanuy caśhanchicta tuquicta yaćhayalpis,
tantiayalpis caywanmi sumä-sumä llaquipaycamäśhanchicta camalaycachimälanchic.
9 Jinamanꞌa pacalä munaynintam Jesusta caćhamuśhanwan sumä cushicuywan lisiycachimälanchic.
10 Caymi munaynin:
Lluy pasanancuna pasäluptin cay pachäćhu janay pachäćhu lluy cäcunäta Salbacü Jesusllanchicpa maquillanman ćhulaycuymi.
11 Manalä imapis captin,
munayninmannuy tincüninmannuy lulaycü quiquin Tayta Diosmi:
“Yaꞌallapä capäcunꞌa” nil aclaycälimäla.
12 Ñatac cay calꞌa Jesusman yaꞌacuna wamä chalapacücunaca sumä cayninta altuman julaycälinäpämi.
13 Canan amcunactapis cay rasun allin willacuy salbaycücäta uyalipäcuśhayquipam Jesusninchicman ćhulaycälishulanqui.
Cayman chalapaculcaptiquim limalicuśhan Chuya Ispiritunta uycuśhuśhayquiwan payllapäña caśhayquita unanchaycälishulanqui.
14 Cay Ispiritun yaꞌanchicćhu caśhancäwanmi tacyalpachimanchic paypa lluy cäcunäta Tayta Dios salbaycuptin tücäninchicta ćhasquiycunapä.
¡Chayurá sumä cayninpi alawäśha cachun!
Chalapacücunäpämi Pablo mañacun
15-16 Chaymi amcunapis Jesusninchicman maynu sumä chalapaculcäśhayquita,
jinaman chalapacücunäta cuyapäcuśhayquita yaćhaśhá pachapi,
imaypis jinallam amcunapi sulpayta ucú.
17 Chaymi imaypis Jesusninchicpa maynu sumä-sumä Dios Taytanta mañacuyá;
yaćhayta tantiayta uycälishuptiqui imanuy caśhantapis sumäta yaćhaycälinayquipä.
18 Chaynütac imapä ayaśha capäcuśhayquitapis tantiayniquita quićhaycul tantiaycälichishunayquipämi;
jinaman nunancunapä maynu tücäninchiccuna llüllay-llüllay caśhantapis yaćhaycunayquipämi;
19 chaynütac maynu maynu sumä munayninta chalapacünincunaman ćhulaycuśhanta tantiaycälinayquipäpis.
20-21 Chay quiquin munayninwanmari Jesusta wañuycäpi śhalcalcachimul allïninmanlä taycaycachila lluy ima munayniyüpäpis mandacücunapäpis,
puydïcunapäpis,
cay pachäćhu janay pachäćhu lluy lluypa altunninmanlä caynu munayniyülla cananpis imaycamapis cananpä.
22 Jinamanꞌa Tayta Dios paypa maquillanmanmi lluy imacunactapis ćhulaycula.
Chaynütacmi llapa chalapacünincunap umanpä ćhulaycula.
23 Cay chalapacünincuna quiquin Jesuspa aychanmi cayan,
lluy imactapis cabalalpücäpa cabalalpüśha cayal.