9
Ñatac pishipacüśha chalapacü-masinchiccunapä juntupäcuśhayquipïtá manañam isquirbiycamuná canñachu.
2 Tuquictam yaćhá amcuna maynu wañupacuywan yanapaycuyta jicutaycälishayquita.
Chaymari Macedonia nunacunäćhüpis sumä cushisha amcunapïta alawaculá:
“Acaya-lädućhu chalapacü-masinchiccuna anyan watapïñamá juntuyta allaycapäcula” nil.
Chay sumä wañupaculcäśhayquimari lluy-yupayta callpanchaycula yanapayta allaycapäcunanpä.
3 Chaymi cay chalapacü-masinchiccunacta caćhayämú amcunapi allin limaśhäca mana yanꞌal cananpä,
aśhwanpa nishänüpis listuña cayalcänayquipä.
4 Yanꞌal-lätac Macedoniapi waquinninwan śhapämul chaynüta mana talipäcucmanchu.
Chayurá amcunapi allinta limayalcaptiꞌa cäräpis pampäćhüćha canman.
Chaynütac amcunapis pinꞌayćha capäcunquiman.
5 Chaynu mana cananpämi ñawpayächimú cay chalapacücunäta chay cuyacuy juntuyta limaliculcäśhayquimannuy yanapaycälishunayquipä.
Chayurá alli śhunꞌuwan upäcuśhayquimari camalaycunꞌa,
manamá mićhanüchu.
Achcacta talpücá achcactatacmi cusichanꞌapis
6 Cayta sumäta yalpapäcuy:
“Ashllacta talpucücá ashllactatacmi cusichanꞌapis;
achcacta talpucücá achcactatacmi cusichanꞌapis” nishanta.
7 Chaymi śhunꞌunchicpi yalamuśhancäta uycunanchic,
manam mala-buluntäpachu,
nï lulananchic callaptinchu.
Chaynu cushisha uycücätamari Tayta Dios cuyan.
8 Jinamanꞌa amcunaćhu Tayta Dios lluy llaquipayninta llüllaycachinmanmi imaypis imaćhüpis mana pishiycälishunayquipä,
jinaman allin lulaycunalla amcunaćhu llüllaycunanpäpis.
9 Isquirbishaćhüpis niyanmi:
“Mana cäniyücunämanmi cänincunacta ayputityäla;
allin caynin wiña-wiñaypämari”a nil.
10 Chayurá talpucücäta mujuctapis micuytapis uycü Tayta Diosmi ancha ancha llaquipay talpucuyniquitapis wiñaycachinꞌa allincäta sumä wayuycunanpä.
11 Paymi ima cäniquicunactapis usuy-usuy caycachinꞌa imaćhüpis imaypis yanapaycälinayquipä.
Chay juntupäcuśhayquita yaꞌacunawan apachimäśhayquipïćhari Tayta Diosta sulpayta achca uculcanꞌa.
12 Ñatac caywan Diospa nunancunacta pishipacuyllanćhüchu manam yanapayalcanqui,
sinuꞌa Tayta Diosman sulpäta ucuytapis allictamari wayuycuyalcan.
13 Chaynu upäculꞌa chalapacuśhayquitam rasun caśhanta camalachipäcunqui.
Chayurá manam paycunactapis juccunactapis yanapaycuy uycälishallayquipïchu Tayta Diosta altuman julunꞌa,
sinuꞌa Jesuspi allin willacuśhayquimannuy cawsayniquipis tincuycuptinmari.
14 Jinamanꞌa Dios sumä-sumäta llaquipaycälishuśhayquipïmi paycuna llapan śhunꞌunwan amcunapi mañaculcanꞌa.
15 ¡Sulpay cachun Tayta Diospa mana tantiayta atipana uycamäśhanchic llaquipayninpïta!